🔴 LIVE | News Updates 29th November 2025: ବିଶ୍ୱର ତୃତୀୟ ବୃହତ୍ତମ ପ୍ରତିରକ୍ଷା ଶକ୍ତି ପାଲଟିଲା ଭାରତ, କଟକରେ ହିଟ୍‌ ଆଣ୍ଡ ରନ୍‌: ଜଣେ ମୃତ

ଆମେ ଆମର ପାଠକଙ୍କୁ ପ୍ରତ୍ୟେକ ମୁହୂର୍ତ୍ତରେ ଖବର ସହିତ ଅପଡେଟ୍ କରିବାକୁ ଉଦ୍ୟମ କରୁଛୁ। ଆପଣଙ୍କ ପାଇଁ ସଦ୍ୟତମ ଏବଂ ବ୍ରେକିଂ ନ୍ୟୁଜ୍ ଆଣିବାକୁ ଆମେ ପ୍ରତିବଦ୍ଧ। ପ୍ରାରମ୍ଭିକ ସୂଚନା ମାଧ୍ୟମରେ ଏହି ଖବରକୁ ନିରନ୍ତର କ୍ରମାଗତ ଭାବେ ଅପ୍‌ଡେଟ୍‌ କରୁଛୁ। ସଦ୍ୟତମ ବ୍ରେକିଂ ନ୍ୟୁଜ୍ ଏବଂ ଅପଡେଟ୍ ପାଇଁ sambad.in ସହିତ ଯୋଡ଼ି ରୁହନ୍ତୁ।

New Update
Nov 29, 2025 23:08 IST

କଟକରେ ହିଟ୍‌ ଆଣ୍ଡ ରନ୍‌: ଜଣଙ୍କ ମୃତ୍ୟୁ

କଟକ: କଟକର ଖାନ୍‌ନଗରରେ ଆଜି ରାତିରେ ଜଣେ ବ୍ୟକ୍ତିଙ୍କର ମୃତ୍ୟୁ ଘଟିଛି। ରାସ୍ତାକଡ଼ ଦୋକାନରେ ବସିଥିବା ବ୍ୟକ୍ତି ଜଣଙ୍କ ଉପରେ ଦ୍ରୁତଗାମୀକାର୍‌ ଚଢ଼ି ଯିବାରୁ ଏହି ଅଭାବନୀୟ ଘଟଣା ଘଟିଛି। ରିପୋର୍ଟ ଲେଖାଯିବା ବେଳକୁ ମୃତକଙ୍କ ପରିଚୟ ମିଳିପାରି ନାହିଁ। ପୁଲିସ ମୃତଦେହ ଉଦ୍ଧାର କରିଛି। ଏହି ଘଟଣା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି। ପୁଲିସ ଘଟଣାର ତଦନ୍ତ ଆରମ୍ଭ କରିଛି। 

Nov 29, 2025 22:50 IST

ଗୋରୁମହିଷାଣୀରେ ଖଣି ସୁରକ୍ଷା ସପ୍ତାହ ପାଳନ 

ରାଇରଙ୍ଗପୁର/ଗୋରୁମହିଷାଣୀ: ରାଇରଙ୍ଗପୁର ବ୍ଲକର ଗୋରୁମହିଷାଣୀ ଲୌହଖଣି ଲିଜଧାରୀ ମେସର୍ସ ଘନଶ୍ୟାମ ମିଶ୍ର ଏଣ୍ଡ ସନସ ପ୍ରା.ଲି. ଆନୁକୁଲ୍ୟାରେ ଖଣି ପ୍ରବନ୍ଧକ ବିକାଶ ରଞ୍ଜନ ନାୟକଙ୍କ ପ୍ରତ୍ୟକ୍ଷ ତତ୍ୱାବଧାନରେ ୪୩ତମ ଖଣିସୁରକ୍ଷା ସପ୍ତାହ ପାଳିତ ହୋଇଯାଇଛି। ଉକ୍ତ କାର୍ଯ୍ୟକ୍ରମରେ ଅତିଥି ଭାବେ ଓଏମସିର ପ୍ରବୀଣ ମହନ୍ତ, ମନହର୍ ମହାନ୍ତ, ସିରାଜୁହୁଦ୍ଦିନ ମାଇନ୍ସର ଦାଶରଥି ବେହେରା ପ୍ରମୁଖ ଯୋଗ ଦେଇଥିଲେ। ଅତିଥିମାନଙ୍କୁ ଖଣି କର୍ମଚାରୀମାନେ ଫୁଲତୋଡା ଦେଇ ସ୍ୱାଗତ କରାଯାଇ ଖଣି କାର୍ଯ୍ୟାଳୟଠାରେ ସମ୍ବର୍ଦ୍ଧନା ଜ୍ଞାପନ କରାଯାଇଥିଲା। ତତପରେ ଅତିଥିମାନେ ଗୋରୁମହିଷାଣୀ ପାହାଡରେ ଚାଲିଥିବା ଖଣିକାର୍ଯ୍ୟରେ ଖଣି ସୁରକ୍ଷା ତଥା କର୍ମଚାରୀ ସୁରକ୍ଷା, ପରିବେଶ ସୁରକ୍ଷା ଇତ୍ୟାଦି ତଦାରଖ କରିଥିଲେ। ଏତଦବ୍ୟତୀତ ପାହାଡ ଉପରେ ଏସିଆ ମହାଦେଶର ପ୍ରଥମ ଆବିଷ୍କୃତ ହୋଇଥିବା ଲୁହାପଥର ସ୍ତୁପ ଅତିଥି ମାନଙ୍କୁ ମନ୍ତ୍ରମୁଗଧ କରିଥିଲା।



ଅପରାହ୍ନରେ ଅନୁଷ୍ଠିତ କାର୍ଯ୍ୟକ୍ରମରେ ଅତିଥିମାନେ ପାହାଡ ଉପରେ ହେଉଥିବା ଖଣି ଖନନ କାର୍ଯ୍ୟର ଅବିକଳ ମଡେଲର ଶୁଭଉଦଘାଟନ କରାଯାଇ ଅତିଥିମାନଙ୍କୁ ଖଣି ଖନନ କାର୍ଯ୍ୟର ସମସ୍ତ ତଥ୍ୟ ପ୍ରଦାନ କରାଯାଇଥିଲା। ବିଭିନ୍ନ ବିଦ୍ୟାଳୟରୁ ଆସିଥିବା ଛାତ୍ରଛାତ୍ରୀମାନଙ୍କ ଦ୍ୱାରା ଖଣି ସୁରକ୍ଷା ସମ୍ବନ୍ଧୀୟ କ୍ଷୁଦ୍ର ନାଟକ ତଥା ସାଂସ୍କୃତିକ କାର୍ଯ୍ୟକ୍ରମ ଅନ୍ତର୍ଗତ ନୃତ୍ୟ ପ୍ରତିଯୋଗିତା ଓ ସଂଗୀତ ପ୍ରତିଯୋଗିତାର ଆୟୋଜନ କରାଯିବା ସହିତ କୃତି ପ୍ରତିଯୋଗୀମାନଙ୍କୁ ପୁରସ୍କୃତ କରାଯାଇଥିଲା। ଏଥି ସହିତ ଖଣି କାର୍ଯ୍ୟରେ ଦୀର୍ଘ ସମୟ ଧରି ସୁରକ୍ଷିତ କର୍ମୀମାନଙ୍କୁ ଅତିଥିମାନଙ୍କ ଦ୍ୱାରା ସମ୍ବର୍ଦ୍ଧିତ ହୋଇଥିଲେ। ଉକ୍ତ କାର୍ଯ୍ୟକ୍ରମରେ ଖଣିର କର୍ମଚାରୀମାନେ ଅଂଶ ଗ୍ରହଣ କରି ସକ୍ରିୟ ସହଯୋଗ କରିଥିଲେ।

Nov 29, 2025 20:23 IST

ଭିଜିଲାସନ୍ସ ହାତରେ ନିମାପଡ଼ା ଏନ୍‌ଏସି ପରିମଳ ଅଧିକାରୀ

ବାମନାଳ: ପୁରୀ ଜିଲ୍ଲା ନିମାପଡ଼ା ଏନ୍‌ଏସିରେ କାର୍ଯ୍ୟରତ ଅମିନ ତଥା ପରିମଳ ଅଧିକାରୀ ବିଜୟ କୁମାର ଗ୍ରହାଚାର୍ଯ୍ୟଙ୍କୁ ଆଜି ସନ୍ଧ୍ୟା ବେଳେ ଲାଞ୍ଚ ନେଲାବେଳେ ଭୁବନେଶ୍ୱର ଭିଜିଲାନ୍ସ ଟିମ୍‌ ମାଡ଼ିବସିଥିବା ଜଣାପଡ଼ିଛି। ଗଡ଼ଟୋରିହେଁ ଗ୍ରାମର ରଘୁନାଥ ଦାଶ ନିମାପଡ଼ା କଲେଜ ପାଖର ଏକ ପୌରାଞ୍ଚଳ ଜାଗାରେ ଗୃହ ନିର୍ମାଣ ପାଇଁ ପ୍ଲାନ ଅନୁମୋଦନ ଓ ଅନୁମତି ପାଇଁ ଅମିନ ତଥା ପରିମଳ ଅଧିକାରୀ ୩୪ହଜାର ଟଙ୍କା ଦେଲେ ଘର ନିର୍ମାଣ ପାଇଁ ସମସ୍ତ ଅଫିସ କାର୍ଯ୍ୟ କରିଦେବେ ବୋଲି କଥାଦେଇଥିଲେ। ସେ ପର୍ଯ୍ୟାୟ କ୍ରମେ ୩ହଜାର, ୧୦ହଜାର ଓ ଆଜି ୧୭ହଜାର ଟଙ୍କା ମୋଟ ୩୦ହଜାର ଟଙ୍କା ନେଇଥିଲେ।

Nov 29, 2025 19:12 IST

ବିଜେଡି ବନ୍ତ ବ୍ଳକ ଅଧ୍ୟକ୍ଷ ନିଲମ୍ବିତ

ଭୁବନେଶ୍ବର: ବିଜୁ ଜନତା ଦଳ (ବିଜେଡି)ର ଭଦ୍ରକ ଜିଲ୍ଲା ବନ୍ତ ବ୍ଲକ ଅଧ୍ୟକ୍ଷ ମନୋରଂଜନ ଘଡ଼େଇଙ୍କୁ ଦଳୀୟ ସଭାପତି ନବୀନ ପଟ୍ଟନାୟକ ନିଲମ୍ବନ କରିଛନ୍ତି। ଦଳ ବିରୋଧୀ କାର୍ଯ୍ୟକଳାପ ଅଭିଯୋଗରେ ବିଜେଡି ଏହି କାର୍ଯ୍ୟାନୁଷ୍ଠାନ ନେଇଛି। ଅନ୍ୟପଟରେ ସାମ୍ବାଦିକ ସମ୍ମିଳନୀରେ ଶ୍ରୀ ଘଡ଼େଇ କହିଛନ୍ତି, ନିଜ ଆଡୁ ଇସ୍ତଫା ଦେଇଛି। 

Nov 29, 2025 18:10 IST

ସୁବର୍ଣ୍ଣପୁରରେ ଜଳିଲା ବିଦ୍ୟୁତ୍‌ ଆଲୁଅ



ଧରାକୋଟ: ଦୀର୍ଘ ଦିନର ଦାବି ପୂରା ହୋଇଛି। ଗଂଜାମ ଜିଲ୍ଳା ଧରାକୋଟ ବ୍ଲକ ସୁବର୍ଣ୍ଣପୁର ଗ୍ରାମରେ ଆଜି ବିଦ୍ୟୁତ ଆଲୁଅ ଜଳିଛି। ଏହି ଗାଁର‌ ଲୋକେ ଅନ୍ଧାର ସମୟରେ ବିଦ୍ୟୁତ ଆଲୁଅ ଜାଳି ଖୁସି ଅନୁଭବ କରିଛନ୍ତି। 

Nov 29, 2025 18:05 IST

ସୋମବାର ଯାଏଁ ଗୃହ ମୁଲତବି

ଭୁବନେଶ୍ବର: ଓଡ଼ିଶା ବିଧାନସଭାର ଶୀତକାଳୀନ ଅଧିବେଶନକୁ ସୋମବାର ଯାଏଁ ମୁଲତବି ରଖାଯାଇଛି। ଆଜି ତୃତୀୟ ଦିନରେ ଅପରାହ୍‌ଣରେ ଗୃହକୁ ବାଚସ୍ପତି ସୁରମା ପାଢ଼ୀ ମୁଲତବି ରଖିଛନ୍ତି।



Nov 29, 2025 06:59 IST

ବିଶ୍ୱର ତୃତୀୟ ବୃହତ୍ତମ ପ୍ରତିରକ୍ଷା ଶକ୍ତି ପାଲଟିଲା ଭାରତ

ନୂଆଦିଲ୍ଲୀ: ଏସିଆ ପାୱାର ଇଣ୍ଡେକ୍ସ ୨୦୨୫ ଅନୁଯାୟୀ, ଭାରତ ବିଶ୍ୱର ତୃତୀୟ ବୃହତ୍ତମ ପ୍ରତିରକ୍ଷା ଶକ୍ତି ପାଲଟିଛି। ଏହା ସହିତ ବିଦେଶୀ ନିବେଶ କ୍ଷେତ୍ରରେ ଭାରତ ଚୀନକୁ ପଛରେ ପକାଇ ଦେଇଛି। ଏହା ଭାରତର ବର୍ଦ୍ଧିତ ସାମରିକ ଶକ୍ତି ଏବଂ ଆର୍ଥିକ ପ୍ରଗତିକୁ ପ୍ରତୀକ କରୁଛି, ଯାହା ଏହାକୁ ବିଶ୍ୱ ସ୍ତରରେ ଗୁରୁତ୍ୱପୂର୍ଣ୍ଣ କରିଥାଏ। 



ଏହି ସୂଚକାଙ୍କ ଭାରତର ସାମରିକ ଶକ୍ତି ସହିତ ଏହାର ଦ୍ରୁତ ବୃଦ୍ଧି ପାଉଥିବା ଆର୍ଥିକ ସମ୍ଭାବନାକୁ ମଧ୍ୟ ଉଲ୍ଲେଖ କରୁଛି। ସୂଚକାଙ୍କ ମାନଦଣ୍ଡ ଆଧାରରେ ଜାପାନ, ରୁଷ, ଅଷ୍ଟ୍ରେଲିଆ ଏବଂ ଦକ୍ଷିଣ କୋରିଆ ଭଳି ଦେଶକୁ ଭାରତ ପଛରେ ପକାଇ ଦେଇଛି। ସେହିପରି ପାକିସ୍ତାନ ୧୬ତମ ସ୍ଥାନରେ ରହିଛି।