ବାରିପଦା : ମାଟ୍ରିକ୍ରେ ଚମକିଲେ ୯ ଶିଶୁ ଶ୍ରମିକ
ସମସ୍ତଙ୍କର ନମ୍ବର ୬୦% ଅଧିକ, ଢାବା, ହୋଟେଲରେ କାମ କରୁଥିଲେ
ବାରିପଦା : ୨୦୧୬ ମସିହାରେ ଏ ଛୋଟ ପିଲାମାନେ ରାସ୍ତାକଡ଼ ହୋଟେଲ, ଜଳଖିଆ ଦୋକାନ, ଢାବା ଆଦିରେ ଥାଳି ପ୍ଲେଟ୍ ଧୋଉଥିଲେ। ହେଲେ ପଙ୍କରୁ ପଦ୍ମ ଫୁଟିଲା ପରି ଏମାନେ ଆଜି ସମସ୍ତଙ୍କର ଆଖି ଖୋଲି ଦେଇଛନ୍ତି। ସୁବିଧା ସୁଯୋଗ ପାଇଲେ ସେମାନେ ମଧ୍ୟ ସଫଳତାର ଶୀର୍ଷକୁ ଯାଇପାରିବେ, ଏ କଥା କାମରେ କରି ଦେଖାଇଛନ୍ତି। ମହାମାରୀ କରୋନାର ଭୟ ଭିତରେ ଏକଦମ୍ ଖୁସି କରିଦେବା ଭଳି ଖବର ଆସିଛି ଆଦିବାସୀବହୁଳ ମୟୂରଭଞ୍ଜ ଜିଲ୍ଲାରୁ। ୨୦୧୬ରେ ଢାବା, ହୋଟେଲରୁ ଉଦ୍ଧାର ହୋଇଥିବା ୯ ଜଣ ଶିଶୁ ଶ୍ରମିକ ଚଳିତ ମାଟ୍ରିକ୍ ପରୀକ୍ଷାରେ ୬୦ ପ୍ରତିଶତରୁ ଅଧିକ ନମ୍ବର ରଖି ପାସ୍ କରିଛନ୍ତି। ସେମାନଙ୍କ ପାଖରେ ଯେ ପ୍ରତିଭାର ଊଣା ନ ଥିଲା, ତାହା ଏହି ବାଳକମାନେ ପ୍ରମାଣିତ କରିଛନ୍ତି। ଏସବୁର ଶ୍ରେୟ ମୟୂରଭଞ୍ଜର ତତ୍କାଳୀନ ଲୋକପ୍ରିୟ ଜିଲ୍ଲାପାଳ ରାଜେଶ ପ୍ରଭାକର ପାଟିଲ (ମା ମୁଁ କଲେକ୍ଟର ହୋଇଗଲି ପୁସ୍ତକର ଲେଖକ)ଙ୍କର କହିଲେ କିଛି ଅତ୍ୟୁକ୍ତି ହେବନାହିଁ।
Sambad is now on WhatsApp
Join and get latest news updates delivered to you via WhatsApp
୨୦୧୩-୧୪ ମସିହାରେ ତତ୍କାଳୀନ ମୟୂରଭଞ୍ଜ ଜିଲ୍ଲାପାଳ ରାଜେଶ ପ୍ରଭାକର ପାଟିଲ ଆରମ୍ଭ କରିଥିବା ‘ମୁଁ ବି ପଢ଼ିବି ଯୋଜନାରେ ଏହି ପିଲାମାନଙ୍କୁ ବିଭିନ୍ନ ସ୍ଥାନରୁ ଉଦ୍ଧାର କରାଯାଇ ବିଶୋଇ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ ଭର୍ତ୍ତି କରାଯାଇଥିଲା। ସରକାରୀସ୍ତରରେ ମିଳିଥିବା ସହଯୋଗ ଓ ନିଜ ଦୃଢ଼ ଇଚ୍ଛାଶକ୍ତିକୁ ଉପଯୋଗ କରି ଅନ୍ୟମାନଙ୍କ ପାଇଁ ଉଦାହରଣ ସାଜିଥିବା ଏହି ୯ ଜଣ ଛାତ୍ର ହେଲେ ଅଜୟ କୁମାର ପାତ୍ର, ଜିତେନ୍ଦ୍ର କୁମାର ନାୟକ, ହେମନ୍ତ କୁମାର ମୁର୍ମୁ, ପାଣ୍ତୁ ସିଂ, ଗୁଜା ମୁର୍ମୁ, ଦୀପୁ ମହାକୁଡ଼, କାର୍ତ୍ତିକ ମହାକୁଡ଼, ଦୁର୍ଗା ମାର୍ଣ୍ତି ଓ ରାଜେଶ ପାତ୍ର। ସଫଳତା ପାଇବା ପରେ ଏହି ପିଲାମାନେ ପୂର୍ବତନ ଜିଲ୍ଲାପାଳ ରାଜେଶ ପ୍ରଭାକର ପାଟିଲ, ସର୍ବଶିକ୍ଷା ଅଭିଯାନର ପୂର୍ବତନ ପ୍ରକଳ୍ପ ସଂଯୋଜକ ଦିଗନ୍ତ କୁମାର ରାଉତରାୟ ଓ ବିଶୋଇ ବିଦ୍ୟାଳୟର ସମସ୍ତ ଶିକ୍ଷକ ଶିକ୍ଷୟିତ୍ରୀଙ୍କୁ ନିଜ ନିଜ ହୃଦୟରୁ ଧନ୍ୟବାଦ, କୃତଜ୍ଞତା ଅଜାଡ଼ି ଦେଇଛନ୍ତି।