ଭୁବନେଶ୍ୱର: ଅଲିମ୍ପିକ୍ସରେ ଆଜି ଜାଭଲିନ ଥ୍ରୋରେ ସ୍ବର୍ଣ୍ଣ ଜିତି ଭାରତ ପାଇଁ ଗର୍ବ ଆଣିଛନ୍ତି ନୀରଜ ଚୋପ୍ରା | ଖାଲି ଗର୍ବ ନୁହେଁ ବରଂ ଭାରତର ୧୨୫ ବର୍ଷର ସ୍ବପ୍ନକୁ ପୂରଣ କରିଛନ୍ତି ଜାଭଲିନ୍ ଫିଙ୍ଗାଳି ନୀରଜ ଚୋପ୍ରା | ତେବେ ନୀରଜଙ୍କ ସ୍ବର୍ଣ୍ଣ ବିଜୟ ପଛରେ ଓଡ଼ିଶାର ବି କିଛି ମାତ୍ରାରେ ସମ୍ପର୍କ ରହିଛି | ଅନେକଙ୍କ ପାଇଁ ଏହି କଥାଟି ଅଜଣା ହୋଇଥାଇପାରେ | କିନ୍ତୁ ନୀରଜଙ୍କୁ ସ୍ୱତନ୍ତ୍ର ପରିଚୟ ଦେଇପାରିଛି ଭୁବନେଶ୍ୱରର କଳିଙ୍ଗ ଷ୍ଟାଡିୟମ | କଳିଙ୍ଗ ଷ୍ଟାଡିୟମର ବକ୍ଷରେ ନୀରଜ ଅଭ୍ୟାସ କରିଛନ୍ତି, ଆଉ ଟୋକିଓରେ ଦେଖାଇଛନ୍ତି ନିଜର କୃତିତ୍ୱ | ଏହି କାହାଣୀ ୨୦୨୦ ମସିହାର | ୨୦୨୦ ମସିହା ଡିସେମ୍ବରରେ ନୀରଜ ଆସିଥିଲେ କଳିଙ୍ଗ ଷ୍ଟାଡିୟମ |
Sambad is now on WhatsApp
Join and get latest news updates delivered to you via WhatsApp
ପଞ୍ଜାବର ପଟିଆଲାରେ ଥିବା ନେତାଜୀ ସୁଭାଷ ନ୍ୟାସନାଲ ଇନଷ୍ଟିଚ୍ୟୁଟ ଅଫ ସ୍ପୋର୍ଟ୍ସରେ ନୀରଜଙ୍କ ସହ ଅନ୍ୟ ଖେଳାଳି ଅଭ୍ୟାସ କରୁଥିବାବେଳେ ପ୍ରବଳ ଥଣ୍ଡା ଯୋଗୁଁ ଅଭ୍ୟାସରେ ବାଧା ଉପୁଜିଥିଲା | ଆଉ ଅପେକ୍ଷାକୃତ କମ ଥଣ୍ଡା ଭୁବନେଶ୍ୱରର କଳିଙ୍ଗ ଷ୍ଟାଡିୟମକୁ ପରିବର୍ତ୍ତନ ହୋଇଥିଲା ଟ୍ରେନିଂ କ୍ୟାମ୍ପ | ନୀରଜଙ୍କ ସହ ସେତେବେଳେ ଜାଭଲିନ୍ ଫିଙ୍ଗାଳି ଶିବପାଲ ସିଂହ, ଅନୁ ରାଣୀ, ରୋହିତ ଯାଦବ ଓ ରାଜେନ୍ଦର ସିଂହ ଓଡିଶା ଆସିଥିଲେ | ଓଡ଼ିଶାରେ ରହିଥିଲେ ଆଉ ପ୍ରତିଦିନ କଳିଙ୍ଗ ଷ୍ଟାଡିୟମ ଯାଇ ଟ୍ରେନିଂ ନେଇଥିଲେ |
ସେତେବେଳେ ନୀରଜ କହିଥିଲେ ଯେ, ‘ଅଲିମ୍ପିକ୍ସ ପାଇଁ ଏଠାକୁ ଅଭ୍ୟାସ କରିବାକୁ ଆସିଛି | ୨୦୧୭ ଏସିଆନ ଚମ୍ପିୟାନସିପରେ ମୁଁ ଏଠାରେ ସ୍ବର୍ଣ୍ଣ ଜିତିଥିଲି | ଏହି ସହର ସହ ଅନେକ ସ୍ମୃତି ମୋର ଜଡିତ ହୋଇ ରହିଛି | ଅଲିମ୍ପିକ୍ସରେ ସଫଳ ହେବା ପାଇଁ ଯଥାସାଧ୍ୟ ଚେଷ୍ଟା କରିବି’ | ସେଦିନ ଯାହା କହିଥିଲେ ଆଜି କାମରେ କରି ଦେଖାଇଦେଇଛନ୍ତି ନୀରଜ ଚୋପ୍ରା |