ବିଜେଡିରେ ଯୋଗ ଦେଲେ ବିଶିଷ୍ଟ ଶିକ୍ଷାବିତ୍ ଶାନ୍ତି ମଞ୍ଜରୀ ଦେଇ

ଦେବଗଡ଼: ବିଜେଡିରେ ଯୋଗ ଦେଇଛନ୍ତି ଦେବଗଡ଼ର ବିଶିଷ୍ଟ ଶିକ୍ଷାବିତ୍ ଶାନ୍ତି ମଞ୍ଜରୀ ଦେଇ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ବିଭିନ୍ନ ଜନକଲ୍ୟାଣକାରୀ ଯୋଜନା ସମସ୍ତଙ୍କୁ ବିଜେଡି ପ୍ରତି ଆକୃଷ୍ଟ କରିଛି । ତେବେ ଶ୍ରୀମତୀ ଦେଇ ଆଜି ବିଧିବଦ୍ଧ ଭାବେ ବିଜେଡିରେ ଯୋଗ ଦେଇଛନ୍ତି । ଶାନ୍ତି ମଞ୍ଜରୀ ଦେଇ ରାଷ୍ଟ୍ରପତି ଓ ରାଜ୍ୟପାଳ ପୁରସ୍କାରପ୍ରାପ୍ତ ଶିକ୍ଷୟିତ୍ରୀ । ସେ ୨୦୧୯ ମସିହାରେ ତିଲେଇବଣି ବ୍ଲକର ସୁନାମୁଣ୍ଡା ବିଦ୍ୟାଳୟରୁ ପ୍ରଧାନଶିକ୍ଷୟତ୍ରୀ ଭାବେ ଚାକିରି ଜୀବନରୁ ଅବସର ନେଇଥିଲେ।

ଚାକିରି ଜୀବନରୁ ଅବସର ନେବା ପରେ ବିଭିନ୍ନ ସଂଗଠନ ସହ ଜଡିତ ଥିବା ସହିତ ସମାଜସେବା‌ କରୁଛନ୍ତି । ଏବେ ସେ ରାଜନୀତିରେ ପାଦ ଦେଇଛନ୍ତି ଏବଂ ଲୋକମାନଙ୍କ ପାଇଁ କାର୍ଯ୍ୟ କରିବେ ବୋଲି ସେ ପ୍ରକାଶ କରିଛନ୍ତି । ଏହାସହିତ ତାଙ୍କ ପୁଅ ରାଜ କିଶୋର ମଧ୍ୟ ବିଭିନ୍ନ ସମୟରେ ରାଜନୀତିରେ ସକ୍ରିୟ ରହିଛନ୍ତି।

ମୁଖ୍ୟମନ୍ତ୍ରୀଙ୍କ ଅନୁମୋଦନ କ୍ରମେ ଶାନ୍ତି ମଞ୍ଜରୀଙ୍କୁ ଦଳରେ ସାମିଲ କରିଛନ୍ତି ବିଜେଡି ସଂଗଠନ ସମ୍ପାଦକ ତଥା ବିଧାୟକ ପ୍ରଣବ ପ୍ରକାଶ ଦାସ । ଏହାସହିତ ଯୁବ ନେତା ରାଜକିଶୋର ଦାଶ ଏବଂ ତାଙ୍କର ସମର୍ଥକମାନେ ବିଜେଡିରେ ସାମିଲ ହୋଇଛନ୍ତି । ଏହି ଅବସରରେ ଦେବଗଡ଼ ଜିଲ୍ଲା ବିଜେଡି ସଭାପତି ରୋମାଞ୍ଚ ରଞ୍ଜନ ବିଶ୍ଵାଳ, ବିଜେଡି ରାଜ୍ୟ ସମ୍ପାଦକ କୁନ ବିହାରୀ ଦାସ ମଧ୍ୟ ଉପସ୍ଥି ଥିଲେ । ଶାନ୍ତି ମଞ୍ଜରୀଙ୍କୁ ନଗରପାଳ ଆସନ ପାଇଁ ବିଜେଡି ଟିକଟ ଦେବା ନେଇ ଚର୍ଚ୍ଚା ହେଉଛି ।