ପାଇକମାଳ :  ଦୀର୍ଘ ୯ ମାସ ପରେ ନୃସିଂହନାଥ ମନ୍ଦିର ଖୋଲିଛି। ଭକ୍ତମାନଙ୍କୁ କଟକଣା ମଧ୍ୟରେ ଦର୍ଶନର ସୁଯୋଗ ମିଳିଛି।  ବୁଧବାର  କଡ଼ା ସୁରକ୍ଷା ଭିତରେ ସମସ୍ତ ସତର୍କତା ଅବଲମ୍ବନ କରି ଭକ୍ତଙ୍କ ଦର୍ଶନ ପାଇଁ ସକାଳ ୮ଟାରେ ମହାପ୍ରଭୁଙ୍କ ମନ୍ଦିର ଖୋଲା ଯାଇଥିଲା । ଉପଜିଲ୍ଲାପାଳ  ତନ୍ମୟ  ଦରୱାନଙ୍କ ଉପସ୍ଥିତରେ  ମନ୍ଦିର ପରିଚାଳନା କମିଟି କର୍ମକର୍ତ୍ତା, ସେବାୟତ ,ସ୍ବେଚ୍ଛାସେବୀ,  ଟ୍ରଷ୍ଟ ବୋର୍ଡ ଟ୍ରଷ୍ଟି  ସୁରେନ୍ଦ୍ର ମେହେର, ତହସିଲଦାର ମନୋଜ  ମେହେର,  ଆଇଆଇସି ବିଶ୍ବଜିତ୍ ମନବୋଧ, ଡା. ଶ୍ରୀଧର ପ୍ରଧାନ, ଉପଖଣ୍ତ ସୂଚନା ଓ ଲୋକସଂମ୍ପର୍କ ଅଧିକାରି ପୂଣ୍ଣଚନ୍ଦ୍ର ପାଣିଗ୍ରାହୀ, ସୁବୋଧ ପଣ୍ତା ଉପସ୍ଥିତ ଥିଲେ। ସିଂହ ଦ୍ବାର ଦେଇ ଗୋଟିଏ   ରାସ୍ତାରେ ଭକ୍ତମାନେ ମନ୍ଦିର ସମ୍ମୁଖରେ ମହାପ୍ରଭୁଙ୍କୁ ଦର୍ଶନ କରି ଅନ୍ୟ ଏକ ରାସ୍ତାରେ ଫେରୁଛନ୍ତି ।

Advertisment

ଆସନ୍ତା ୧୩ ତାରିଖ ପର୍ଯନ୍ତ କେବଳ ବରଗଡ଼ ଜିଲ୍ଲାର ଶ୍ରଦ୍ଧାଳୁ ଦର୍ଶନ କରିପାରିବେ। ପାଇକମାଳ ଚିକିତ୍ସାଳୟ ପକ୍ଷରୁ ନୃସିଂହନାଥର ସମସ୍ତ ସେବାୟତଙ୍କ କୋଭିଡ ପରୀକ୍ଷା କରାଯାଇଛି । ଶ୍ରଦ୍ଧାଳୁମାନେ ନିଜର ପରିଚୟ ପତ୍ର ଧରି ମହାପ୍ରଭୁଙ୍କୁ ଦର୍ଶନ କରୁଛନ୍ତି । ଏହାସହିତ ମନ୍ଦିର ପରିସରରେ ଥର୍ମାଲ ସ୍କ୍ରିନିଂ କରାଯାଇ ସାନିଟାଇଜର୍‌ ଦିଆ ଯାଉଛି । ଜିଲ୍ଲା ବାହାରୁ ଆସିଥିବା କିଛି ଭକ୍ତ ଦର୍ଶନ ନପାଇ ନିରାଶ ହୋଇ ଫେରିଛନ୍ତି। ୧୩ ତାରିଖ ପରେ ଅନ୍ୟ ଜିଲ୍ଲାର ଭକ୍ତ କୋଭିଡ୍‌ ନେଗେଟିଭ ରିପୋର୍ଟ ସାଙ୍ଗରେ ଆଣି ମହାପ୍ରଭୁଙ୍କ ଦର୍ଶନ କରି ପାରିବେ।