ଟିକା ନେବାପରେ କିଭଳି ଲାଗେ, ଅନୁଭୂତି ବଖାଣିଲେ ଓଡ଼ିଆ ଡାକ୍ତର
ଲଣ୍ଡନ/ଭୁବନେଶ୍ୱର: ଓଡ଼ିଶାର ୧୧୦ଟି ସ୍ଥାନରେ କୋଭିଡ ଟିକାର ଡ୍ରାଏ ରନ୍ ଚାଲିଛି | ରାଜ୍ୟର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର, ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର ଓ ମେଡିକାଲ କଲେଜ ସମେତ ୧୧ଟି ଘରୋଇ ହସ୍ପିଟାଲରେ ଚାଲିଛି ଏହି ଡ୍ରାଏ ରନ୍ । ଭାରତରେ ସିରମ ଇନଷ୍ଟିଚ୍ୟୁଟ ଓ ଭାରତ ବାୟୋଟେକ ଦ୍ୱାରା ପ୍ରସ୍ତୁତ ଟିକା ଦିଆଯିବାକୁ ନିଷ୍ପତ୍ତି ନିଆଯାଇଥିବା ବେଳେ ଟିକା ନେବା ପରେ କିଭଳି ଅନୁଭବ ହୁଏ ତାହାକୁ ନେଇ ଏବେ ଅନେକଙ୍କ ମନରେ ପ୍ରଶ୍ନ ଉଙ୍କି ମାରିଛି | ତେବେ ବ୍ରିଟେନରେ ଫାଇଜର କୋଭିଡ ଟିକା ଦ୍ବାରା ଟୀକାକରଣ କରାଯାଉଥିବା ବେଳେ ଜଣେ ବ୍ୟକ୍ତିଙ୍କୁ ଦୁଇ ଥର ଟିକାର ଡୋଜ ଦିଆଯାଉଛି | ଆଉ ଫାଇଜର ଟିକା ନେବା ପରେ କିଭଳି ଅନୁଭବ ହୁଏ, କୌଣସି ପାର୍ଶ୍ୱ ପ୍ରତିକ୍ରିୟା ଦେଖାଯାଏ ନା ନାହିଁ ସେ ବାବଦରେ ବିସ୍ତୃତ ଭାବେ କହିଛନ୍ତି ସେଠାରେ କାର୍ଯ୍ୟରତ ଓଡ଼ିଆ ଡାକ୍ତର ସହଦେଵ ସ୍ୱାଇଁ |
Sambad is now on WhatsApp
Join and get latest news updates delivered to you via WhatsApp
ବ୍ରିଟେନରେ ରହୁଥିବା ଏହି ବରିଷ୍ଠ ଚିକିତ୍ସକ ଏଯାଏଁ ଫାଇଜର ଟିକାର ଦୁଇଟି ଡୋଜ ନେଇସାରିଥିବା ବେଳେ ନିଜର ଅନୁଭୂତି ବଖାଣିଛନ୍ତି | ଡାକ୍ତର ସହଦେଵ ସ୍ୱାଇଁଙ୍କ କହିବା ମୁତାବକ ଫାଇଜର ଟିକା ନେବାର ପ୍ରଥମ ଡୋଜଠାରୁ ତିନି ସପ୍ତାହ ପରେ ତାଙ୍କୁ ଦ୍ଵିତୀୟ ଡୋଜ ଦିଆଯାଇଛି | ପ୍ରଥମ ଥର ଟିକା ନେବା ପରେ କୌଣସି ପାର୍ଶ୍ୱ ପ୍ରତିକ୍ରିୟା ଦେଖିବାକୁ ମିଳିନଥିଲା | ଦ୍ଵିତୀୟ ଥର କିନ୍ତୁ ଟିକା ନେବା ପରେ ଇଞ୍ଜେକ୍ସନ ନେବା ସ୍ଥାନରେ ସାମାନ୍ୟ ଯନ୍ତ୍ରଣା ହୋଇଥିଲା | କିନ୍ତୁ ତାଙ୍କର ଅନ୍ୟ ସହକର୍ମୀ ଟିକା ନେବା ପରେ ସେମାନଙ୍କଠାରେ ଜ୍ୱର ଭଳି ଲକ୍ଷଣ ଦେଖିବାକୁ ମିଳିଥିଲା | ଦେହ-ହାତ ଯନ୍ତ୍ରଣା ହେବା ସହ ପ୍ରାୟ ୨୪ ଘଣ୍ଟା ପର୍ଯ୍ୟନ୍ତ ଅସୁସ୍ଥ ଲାଗିଥିଲା | ତେବେ ଜ୍ୱର ଭଳି ଲକ୍ଷଣ ହେଉ କିମ୍ବା ଇଞ୍ଜେକ୍ସନ ନେବା ସ୍ଥାନ ସାମାନ୍ୟ ଦରଜ ହେବା ହେଉଛି କୋଭିଡ ଭ୍ୟାକସିନ ନେବାର ସାମାନ୍ୟ ପ୍ରତିକ୍ରିୟା | ଆଉ ଟିକା ନେବା ପରେ ବହୁତ କମ ଲୋକଙ୍କ ପାଖରେ ଆଲର୍ଜି ଦେଖାଦେଇପାରେ |
ମୋଟାମୋଟି ଭାବରେ ଟୀକାକରଣର ଲାଭ ପାର୍ଶ୍ୱ ପ୍ରତିକ୍ରିୟାଠାରୁ ବହୁତ ଊର୍ଦ୍ଧ୍ବରେ | ତେଣୁ ଯେଉଁ ଦେଶରେ ସରକାର ଟିକାକୁ ଅନୁମୋଦନ କରିଛନ୍ତି, ସମସ୍ତେ ଟିକା ନେବାକୁ ଆଗେଇଆସନ୍ତୁ | ଟିକାକୁ ନେଇ ଅନେକ ଭ୍ରାନ୍ତ ଧାରଣା ଲୋକଙ୍କ ପାଖରେ ଥିବାବେଳେ ଟିକା ନେବା ଦ୍ୱାରା କୌଣସି ଅସୁବିଧା ହେବ ନାହିଁ ବୋଲି ଏହି ବରିଷ୍ଠ ଡାକ୍ତର କହିଛନ୍ତି |