ଭୁବନେଶ୍ବର : ଯାହା ଅନୁମାନ କରାଯାଉଥିଲା, ତାହା ହିଁ ହେଲା। ନିର୍ଦ୍ଧାରିତ ସମୟର ୨୦ ଦିନ ଆଗରୁ ସରିଗଲା ବିଧାନସଭାର ଶୀତ ଅଧିବେଶନ। କିଛି କାର୍ଯ୍ୟ ନାହିଁ କହି ମାତ୍ର ୫ଟି କାର୍ଯ୍ୟଦିବସରେ ସୀମିତ ରଖାଗଲା ଅଧିବେଶନକୁ। ଆଗୁଆ ଅଧିବେଶନ ସାରିବାକୁ ବିଜେଡି ଓ କଂଗ୍ରେସ ସଭ୍ୟ ସମର୍ଥନ କରିଥିଲା ବେଳେ ବିଜେପି ସଭ୍ୟ ପ୍ରତିବାଦ କରି କକ୍ଷତ୍ୟାଗ କରିଥିଲେ।
Sambad is now on WhatsApp
Join and get latest news updates delivered to you via WhatsApp
ଏଥର ଅତିରିକ୍ତ ବଜେଟ୍ ସେପ୍ଟେମ୍ବରରେ ଗୃହୀତ ହୋଇଥିବାରୁ ଚଳିତ ଅଧିବେଶନ ଯଥେଷ୍ଟ ଆଗରୁ େଶଷ ହେବ ବୋଲି ପୂର୍ବାନୁମାନ କରାଯାଉଥିଲା। ଆଜି ତାହା ହିଁ ହେଲା। ଅପରାହ୍ନରେ ବାଚସ୍ପତି କାର୍ଯ୍ୟ ପରାମର୍ଶଦାତା ବୈଠକ ଡାକିଥିଲେ। ଏକ ଘଣ୍ଟା ଧରି ଆଲୋଚନା ହେଲା। ତାହା ପରେ ଗୃହରେ ଶାସକ ଦଳ ସଭ୍ୟ ମହେଶ ସାହୁ କହିଲେ, ଗୃହରେ ଆଲୋଚନା ପାଇଁ ଆଉ କୌଣସି ଗୁରୁତ୍ବପୂର୍ଣ୍ଣ ବିଷୟ ନାହିଁ। ତେଣୁ ଗୃହ କାର୍ଯ୍ୟକୁ କାଣ୍ଟଛାଣ୍ଟ କରାଯାଉ। ଅଶ୍ବିନୀ ପାତ୍ର କହିଥିଲେ, ଗୃହରେ ସେପରି କିଛି କାର୍ଯ୍ୟ ନ ଥିବାରୁ ଡିସେମ୍ବର ୧୫ ପର୍ଯ୍ୟନ୍ତ ଚାଲୁ ରଖିବାର ଆବଶ୍ୟକତା ନାହିଁ।
ସରକାରୀ ଦଳ ମୁଖ୍ୟ ସେଚତକ ଏ ନେଇ ପ୍ରସ୍ତାବ ଦେବାକୁ ସଂସଦୀୟ ବ୍ୟାପାର ମନ୍ତ୍ରୀ ବିକ୍ରମ କେଶରୀ ଆରୁଖ କହିଥିଲେ। ଏହା ପରେ ମୁଖ୍ୟ ସଚେତକ ଅମର ପ୍ରସାଦ ଶତପଥୀ ଗୃହ କାର୍ଯ୍ୟ ଆଜି ଶେଷ କରିବାକୁ ପ୍ରସ୍ତାବ ଦେଇଥିଲେ। ବିରୋଧୀ ଦଳ ନେତା ନରସିଂହ ମିଶ୍ର କହିଲେ, ଏହି ଅଧିବେଶନରେ କୌଣସି ସରକାରୀ କାର୍ଯ୍ୟ ନାହିଁ। ଯେଉଁ ପାଞ୍ଚ ଦିନ ଚାଲିଛି, ତାହା ସମ୍ପୂର୍ଣ୍ଣ ଭାବେ ବିନିଯୋଗ ହୋଇ ନାହିଁ। ତେବେ କିଛି ଫଳପ୍ରଦ ଆଲୋଚନା ହୋଇଛି। ଏହା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମସ୍ତଙ୍କୁ ଧନ୍ୟବାଦ ଜଣାଇଥିଲେ। ‘ବନ୍ଦେ ଉତ୍କଳ ଜନନୀ’ ଗାନ ପରେ ବାଚସ୍ପତି ପ୍ରଦୀପ ଅମାତ ଅନିର୍ଦ୍ଦିଷ୍ଟ କାଳ ପାଇଁ ଗୃହକୁ ମୁଲତବୀ ରଖିଥିଲେ।
ନଭେମ୍ବର ୧୬ ତାରିଖରୁ ଆରମ୍ଭ ହୋଇଥିବା ଶୀତ ଅଧିବେଶନ ଡିସେମ୍ବର ୧୫ ତାରିଖ ପର୍ଯ୍ୟନ୍ତ ଚାଲିବାକୁ ଥିଲା। ଏଥିରେ ମୋଟ ୨୩ଟି କାର୍ଯ୍ୟଦିବସ ଥିଲା। କିନ୍ତୁ ମାତ୍ର ୫ଟି କାର୍ଯ୍ୟଦିବସ ହେଲା। ଏହି ୫ ଦିନ ମଧ୍ୟରୁ ଗୋଟିଏ ଦିନ ବେସରକାରୀଙ୍କ ସଭ୍ୟଙ୍କ କାର୍ଯ୍ୟଦିବସ ରହିଛି। ୨୧ ତାରିଖ ପ୍ରଫେଟ୍ ମହମ୍ମଦଙ୍କ ଜୟନ୍ତୀ ଓ ୨୩ ତାରିଖ ରାସ ପୂର୍ଣ୍ଣିମା ପାଇଁ ଛୁଟି ରହିଥିଲା। ୨୨ ତାରିଖରେ ସର୍ବସମ୍ମତିକ୍ରମେ ଗୃହ କାର୍ଯ୍ୟ ମୁଲତବୀ ରଖାଯାଇଥିଲା। ଏହି ସମୟ ମଧ୍ୟରେ ୫ଟି ମୁଲତବୀ ପ୍ରସ୍ତାବ ଉପରେ ନୋଟିସ୍ ଆସିଥିଲା ବେଳେ ୨ଟି ଉପରେ ଆଲୋଚନା ହୋଇଥିଲା। ୫ ଦିନ ମଧ୍ୟରୁ ୩ ଦିନ ଆଦୌ ପ୍ରଶ୍ନକାଳ ହୋଇପାରି ନ ଥିଲା। ଗୋଟିଏ ଦିନ ଅଧାରୁ ବନ୍ଦ ହୋଇଯାଇଥିଲା ବେଳେ ଆଜି ପୂରା ସମୟ ପ୍ରଶ୍ନକାଳ ଚାଲିଥିଲା। ଲୋକସଭା ଓ ବିଧାନସଭାରେ ମହିଳାଙ୍କ ପାଇଁ ୩୩ ପ୍ରତିଶତ ସ୍ଥାନ ସଂରକ୍ଷଣ ନେଇ ପାରିତ ହୋଇଥିବା ସଂକଳ୍ପ ଏହି ଅଧିବେଶନର ଏକ ଗୁରୁ୍ତ୍ବପୂର୍ଣ୍ଣ ଅଧ୍ୟାୟ ଥିଲା।