ମୁଖ୍ୟମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥା କରାଗଲା ସୁଦୃଢ଼; ନୂତନ ପଦବି ସୃଷ୍ଟି ସହ ପୁଲିସ କର୍ମଚାରୀ ସଂଖ୍ୟା ୯୧କୁ ବୃଦ୍ଧି

ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସୁରକ୍ଷାକୁ ସୁଦୃଢ଼ କରାଯିବା ସହ ଏକ ସ୍ୱତନ୍ତ୍ର ବିଶୃଙ୍ଖଳା ନିରୋଧୀ ଚେକ୍‌ ଟିମ୍‌ ଗଠନ କରାଯାଇଛି। ସରକାରୀ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଗସ୍ତ ସମୟରେ ଏହି ଉତ୍ସର୍ଗୀକୃତ ଟିମ୍‌କୁ ମୁଖ୍ୟତଃ ମାଲ୍ୟାର୍ପଣ କାର୍ଯ୍ୟକ୍ରମରେ ଯୋଗଦେବାଠାରୁ ଆରମ୍ଭ କରି ସାଧାରଣ ସଭା ପର୍ଯ୍ୟନ୍ତ ବ୍ୟବହାର କରାଯିବ।

ଏହି ନବଗଠିତ ଟିମରେ ୨ଜଣ ଡେପୁଟି କମାଣ୍ଡାଣ୍ଟ ପାହ୍ୟାର ଅଧିକାରୀ, ୨ଜଣ ଆସିଷ୍ଟାଣ୍ଟ କମାଣ୍ଡାଣ୍ଟ, ୪ଜଣ ସଶସ୍ତ୍ର ସବ୍‌ ଇନ୍‌ସପେକ୍ଟରଙ୍କ ସମେତ ଅନ୍ୟ ହାବିଲଦାର ଓ ସିପାହୀ ରହିବେ। ମୁଖ୍ୟମନ୍ତ୍ରୀଙ୍କ ବାସଭବନର ସୁରକ୍ଷା ମଧ୍ୟ ବଢ଼ାଇ ଦିଆଯାଇଛି। ଏବେ ସଶସ୍ତ୍ର ସବ୍‌ ଇନ୍‌ସପେକ୍ଟରଙ୍କ ସମେତ ୯୧ଜଣ କର୍ମଚାରୀ ନିୟୋଜିତ ହେବେ।

ରାଜ୍ୟ ସ୍ୱାସ୍ଥ୍ୟମନ୍ତ୍ରୀ ନବ ଦାସଙ୍କ ହତ୍ୟା ପରେ ପିଏସଓଙ୍କ କାର୍ଯ୍ୟକୁ ନେଇ ଉଦ୍‌ବେଗ ପ୍ରକାଶ ପାଇବା ପରେ ମୁଖ୍ୟମନ୍ତ୍ରୀଙ୍କ ସୁରକ୍ଷା ବଢ଼ାଇବାକୁ ନିଷ୍ପତ୍ତି ନିଆଯାଇଥିବା ସୂତ୍ରରୁ ପ୍ରକାଶ।

ସେହିଭଳି ଏକ ଉତ୍ସର୍ଗୀକୃତ ସୁରକ୍ଷା ପ୍ରଶିକ୍ଷଣ କେନ୍ଦ୍ର ମଧ୍ୟ ପ୍ରତିଷ୍ଠା କରାଯିବ, ଯେଉଁଥିପାଇଁ ନୂତନ ପଦବୀ ମଧ୍ୟ ସୃଷ୍ଟି କରାଯାଇଛି। ମୁଖ୍ୟମନ୍ତ୍ରୀଙ୍କ ବ୍ୟତୀତ ଓଡ଼ିଶା ବିଧାନସଭା ବାଚସ୍ପତି, ଉପବାଚସ୍ପତି ଓ ମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥାରେ ମଧ୍ୟ ସଂଶୋଧନ କରାଯାଇଛି। ପ୍ରାୟ ୭୨ଜଣ ଅତିରିକ୍ତ ପୁଲିସ କର୍ମଚାରୀ ନିୟୋଜିତ ହେବେ। ସମୁଦାୟ ୨୦୩ଟି ନୂଆ ପଦବୀ ସୃଷ୍ଟି କରାଯାଇଛି।

ଗୁଇନ୍ଦା ନିର୍ଦ୍ଦେଶାଳୟ ଅଧୀନରେ ଥିବା ସୁରକ୍ଷା ଶାଖାକୁ ନୂଆ ପଦବୀ ସୃଷ୍ଟି କରି ସୁଦୃଢ଼ କରିବା ପାଇଁ ରାଜ୍ୟପାଳ ଅନୁମୋଦନ ଦେଇଥିବା ସମ୍ପର୍କରେ ଗୃହ ବିଭାଗର ସ୍ୱତନ୍ତ୍ର ସଚିବ ସନ୍ତୋଷ ବାଲା ଆକାଉଣ୍ଟାଣ୍ଟ ଜେନେରାଲଙ୍କୁ ଅବଗତ କରାଇଛନ୍ତି।