ଭୁବନେଶ୍ୱର: ଚିଲିକା ଓ ପୁରୀ ଜଗନ୍ନାଥ ମନ୍ଦିର ଉପରେ ହେଲିକାପ୍ଟର ଉଡାଣ ସଂପର୍କରେ ନିଜର ମତ ରଖିଛନ୍ତି ପୂର୍ବତନ ସାଂସଦ ବୈଜୟନ୍ତ ପଣ୍ଡା । କେବଳ ତାଙ୍କୁ ହଇରାଣ କରିବା ପାଇଁ ସରକାର ଏପରି କାର୍ଯ୍ୟ କରୁଛନ୍ତି ବୋଲି ସେ ଅଭିଯୋଗ କରିଛନ୍ତି । .ସେ କହିଛନ୍ତି, ଏପରି ପ୍ରତିଶୋଧମୂଳକ କାର୍ଯ୍ୟ ଆଗରୁ ଜରୁରୀ ପରିସ୍ଥିତି ସଂପର୍କରେ ହେଉଥିଲା । କିନ୍ତୁ ଗଣତନ୍ତ୍ରରେ ଏପରି କାର୍ଯ୍ୟର ସ୍ଥାନ ନାହିଁ । ଏପରି କରି ସରକାର ଯଦି ଭାବୁଥିବେ ଯେ ତାଙ୍କର ଚଳପ୍ରଚଳକୁ ବନ୍ଦ କରିଦେବେ, ତେବେ ତାହା ତାଙ୍କର ଭୁଲ ଧାରଣା । ସେ ରାଜ୍ୟର ଲୋକମାନଙ୍କ ସହ ମିଶିଆସିଛନ୍ତି ଓ ଆଗକୁ ମଧ୍ୟ ଲୋକମାନଙ୍କ ପାଖକୁ ଯିବେ । ଏପରି କରିବାରେ ତାଙ୍କୁ କେହି ଅଟକେଇପାରିବେ ନାହିଁ ।
Sambad is now on WhatsApp
Join and get latest news updates delivered to you via WhatsApp
ଏକ ଫେସବୁକ ଭିଡିଓ ମାଧ୍ୟମରେ ଏକ ସ୍ପଷ୍ଟୀକରଣ ରଖି ସେ କହିଛନ୍ତି ଯେ ପ୍ରଥମେ ଗଣମାଧ୍ୟମରେ ବାହାରିଲା ଯେ ଚିଲିକା ଉପରେ ସିପ୍ଲେନ ଉଡୁଛି ବୋଲି । କିନ୍ତୁ ସିଡିଏ ପକ୍ଷରୁ ଦିଆଯାଇଥିବା ଏଫଆଇଆରରେ ତାହା ଏକ ଚପର ବା ହେଲିକାପ୍ଟର ବୋଲି କୁହାଗଲା । ପୁଣି ଏହି ଚପର ଦିନ ସାଢେ ଗୋଟାଏରେ ଚିଲିକାର ଉଡାଣ ନିଷିଦ୍ଧାଞ୍ଚଳରେ କମ ଉଚ୍ଚତାରେ ଉଡୁଥିଲା ବୋଲି କୁହାଯାଇଥିଲା । କିନ୍ତୁ ଚିଲିକା ଏକ ନୋ ଫ୍ଲାଇ ଜୋନ ନୁହେଁ । କିନ୍ତୁ ସେ ଶନିବାର ସକାଳେ ଚିଲିକା ଉପରେ ଉଡି ସାରିବା ପରେ ଦିନ ୧ଟା ୨୬ ରେ ଭୁବନେଶ୍ୱର ଏୟାରପୋର୍ଟରେ ଲାଣ୍ଡ୍ କରିସାରିଥିଲେ, ଯାହାକି ଏୟାରପୋର୍ଟ ରେକର୍ଡରେ ମଧ୍ୟ ଅଛି । ଏଣୁ ଏହା ସମ୍ଭବ ନୁହେଁ ଯେ ଶନିବାର ଦ୍ୱିପହରରେ ସେମାନେ ଚିଲିକା ଆକାଶରେ ଉଡୁଥିଲେ । ଏହି ତଥ୍ୟ ଏୟାର ଟ୍ରାଫିକ କଣ୍ଟ୍ରୋଲରଠାରୁ ମିଳିବା ପରେ ପୁଲିସ ନିଜ ସମନରେ ଏହି ସମୟକୁ ସକାଳ ୯ଟା ୩୦କୁ ବଦଳାଇଦେଇଥିଲା । ସେହିପରି ପୁରୀ ଆକାଶରେ ଉଡିବା ବେଳେ ସେମାନେ ମନ୍ଦିରଠାରୁ ଆବଶ୍ୟକ ଆଇନଅନୁମୋଦିତ ସର୍ବନିମ୍ନ ଦୂରତାରେ ହିଁ ଉଡୁଥିଲେ । ଏହା ସେପରି କିଛି ବେଆଇନ କାମ ନୁହେଁ । ଏହା ପରେ ଆଉ ଏକ ଅଭିଯୋଗ ଆସିଛି ଯେ ତାଙ୍କ ସହିତ ଆସିଥିବା ଜାତୀୟ ସ୍ତରର ଦୁଇଜଣ ସାମ୍ବାଦିକ ପୁରୀ ଓ କୋଣାର୍କ ଉପରେ କିଛି ଅଶାଳୀନ ମନ୍ତବ୍ୟ ଦେଇଛନ୍ତି । କିନ୍ତୁ ସେମାନେ କୋଣାର୍କ ବୁଲିବାବେଳେ ସେ ତାଙ୍କ ସାଙ୍ଗରେ ନଥିଲେ । ସଂପୃକ୍ତ ସାମ୍ବାଦିକ ମଧ୍ୟ ମଜାରେ ଏପରି ମନ୍ତବ୍ୟ ଦେଇଥିବା ଲାଗୁଛି । କିନ୍ତୁ ଆମ ସଂସ୍କୃତି ଓ ପରମ୍ପରାକୁ ନେଇ ସମସ୍ତେ ସଂବେଦନଶୀଳ ହେବା ଆବଶ୍ୟକ ଓ ଏପରି ମନ୍ତବ୍ୟକୁ ସେ ସମର୍ଥନ କରୁନାହାନ୍ତି ବରଂ ନିନ୍ଦା କରୁଛନ୍ତି ବୋଲି ବୈଜୟନ୍ତ କହିଛନ୍ତି ।