ପିପିଲି: ପିପିଲି ଥାନା ପାଣିଦୋଳ ଗାଁର ନିର୍ମାଣ ଶ୍ରମିକ ପ୍ରଦୀପ କୁମାର ସୁବୁଦ୍ଧି(ସିପୁ-୨୭) ଆନ୍ଧ୍ରପ୍ରଦେଶର କୁର୍ଣ୍ଣୁଲ ଟାଉନରେ ଏକ ଆପାର୍ଟମେଂଟ କାମରେ ନିୟୋଜିତ ଥିଲେ । ସେଠାରେ କାର୍ଯ୍ୟରତ ସମୟରେ ଏକ ଦୁର୍ଘଟଣାରେ ତାଙ୍କର ଗତକାଲି ମୃତ୍ୟୁ ହୋଇଥିଲା । ଆନ୍ଧ୍ରରୁ ଏକ ଆମ୍ବୁଲାନ୍ସ ମୃତ ଶରୀର ଆଣି ଆଜି ରାତିରେ ପାଣିଦୋଳ ଗାଁକୁ ଆସିଥିଲା । ତେବେ ସିପୁକୁ ଯୋଜନାବଦ୍ଧଭାବେ ହତ୍ୟା କରାଯାଇଛି ଅଭିଯୋଗ ଆଣି ଉକ୍ତ ଆମ୍ବୁଲାନ୍ସକୁ ଗ୍ରାମବାସୀ ଦୀର୍ଘ ୨ଘଂଟା ଧରି ସେଠାରେ ଅଟକ ରଖିଥିଲେ । ସିପୁର ମୃତ୍ୟୁ ସମ୍ପର୍କିତ କାଗଜପତ୍ର ଦେବାକୁ ଅଡ଼ିବସିଥିଲେ ।
Sambad is now on WhatsApp
Join and get latest news updates delivered to you via WhatsApp
ପାଣିଦୋଳ ଗାଁର ନବକିଶୋର ବାରିକଙ୍କ ସାନପୁଅ ସିପୁ ଦୀର୍ଘ ୮ବର୍ଷ ହେବ ଜଣେ ଓଡ଼ିଆ ଠିକାଦାରଙ୍କ ଅଧିନରେ ଆନ୍ଧ୍ରପ୍ରଦେଶରେ କାର୍ଯ୍ୟ କରୁଥିଲେ । ଗତକାଲି ସେଟ୍ରିଂ ଲୁହା ପ୍ଲେଟରେ ଚାପି ହୋଇ ତାଙ୍କର ମୃତ୍ୟୁ ହୋଇଛି ବୋଲି ପରିବାର ଲୋକଙ୍କୁ ଫୋନ ଯୋଗେ ଖବର ଦିଆଯାଇଥିଲା । ସେଠାରେ ଶବ ବ୍ୟବଚ୍ଛେଦ ପରେ ତାଙ୍କର ଜଣେ ସମ୍ପର୍କୀୟ ଓ ଦୁଇଜଣ ଯୁବକ ଶବ ଧରି ପାଣିଦୋଳ ଆସିଥିଲେ । ଶବ ସହ ମୃତ୍ୟୁ ସମ୍ପର୍କିତ କାଗଜପତ୍ର ଓ ଡିସଚାର୍ଜ ସାର୍ଟିଫିକେଟ ଅଣାଯାଇନଥିବାରୁ ଗ୍ରାମବାସୀ ଓ ପରିବାର ଲୋକଙ୍କ ସନ୍ଦେହ ବଢିଥିଲା ଓ ଉକ୍ତ ଆମ୍ବୁଲାନ୍ସକୁ ଗ୍ରାମବାସୀ ଅଟକ ରଖିଥିଲେ । ଖବର ପାଇବା ପରେ ରାତି ପ୍ରାୟ ସାଢେ ୯ଟାରେ କୁର୍ଣ୍ଣୁଲ ପୁଲିସ ଶବ ବ୍ୟବଚ୍ଛେଦ ସମ୍ପର୍କିତ କାଗଜପତ୍ର ଇମେଲରେ ପରିବାର ଲୋକଙ୍କ ପାଖକୁ ପଠାଇବା ପରେ ଗ୍ରାମବାସୀ ଅଟକ ଆମ୍ବୁଲାନ୍ସ ଓ କର୍ମଚାରୀମାନଙ୍କୁ ଛାଡ଼ିଥିଲେ ।