ଭୁବନେଶ୍ବର: ଜାତୀୟ ହାର ତୁଳନାରେ ଓଡ଼ିଶା ଲୋକ ଅଧିକ ମଧୁର ମାଛ ଖାଉଛନ୍ତି। ସର୍ବଭାରତୀୟ ସ୍ତରରେ ମୁଣ୍ଡ ପିଛା ୭ କେଜି ମାଛ ଖାଉଥିବା ବେଳେ ଓଡ଼ିଶାରେ ଏହା ୧୮ କେଜି ରହିଛି। ସେଥିପାଇଁ ମଧୁର ଜଳ ମାଛ ପାଇଁ ଓଡ଼ିଶାକୁ ବାହାର ରାଜ୍ୟ ଉପରେ ନିର୍ଭର କରିବାକୁ ପଡ଼ୁଛି ବୋଲି କହିଛନ୍ତି ମତ୍ସ୍ୟ ଓ ପଶୁସଂପଦ ବିକାଶ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ।

Advertisment

ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀଙ୍କ ସମୀକ୍ଷା ବୈଠକ ସ୍ଥାନୀୟ କୃଷି ଭବନ ଅଡିଟୋରିୟମଠାରେ ଅନୁଷ୍ଠିତ ହୋଇଛି। ପରେ ଗଣମାଧ୍ୟମକୁ ସମ୍ବୋଧିତ କରି ଶ୍ରୀ ମଲ୍ଲିକ କହିଲେ, ସାମୁଦ୍ରିକ ମାଛ ରପ୍ତାନିରେ ଓଡ଼ିଶା ଆଗରେ ରହିଛି। ଗତବର୍ଷ ୪ହଜାର କୋଟିର ସାମୁଦ୍ରିକ ମାଛ ରପ୍ତାନି କରାଯାଇଛି। ମଧୁର ମାଛରେ ସ୍ବାବଲମ୍ବୀ ହେବା ପାଇଁ ଅଧିକ ସଂଖ୍ୟାରେ ପୋଖରୀ ଖୋଳିବା ସହ ଆଗୁଆ ଯାଆଁଳ ଉତ୍ପାଦନ କରାଯାଉଛି। ଗତବର୍ଷ ୩୫୦ କୋଟିର ଯାଆଁଳ ଉତ୍ପାଦନ ହୋଇଥିବା ବେଳେ ଏହାକୁ ବଢ଼ାଇବା ପାଇଁ ଉଦ୍ୟମ ଜାରି ରହିଛି। ମାଛକୁ ଶୀଘ୍ର ବଢ଼ାଇବା ଲାଗି ଓଡ଼ିଶାର ଚାଷୀ ହରମୋନ୍‌ ବ୍ୟବହାର କରୁଥିବା ନଜରକୁ ଆସିନାହିଁ। ରାଜ୍ୟରେ ଦୈନିକ ପ୍ରାୟ ୭୨ ଲକ୍ଷ ଲିଟର ଦୁଗ୍ଧ ଉତ୍ପାଦନ ହେଉଛି। ଆସନ୍ତା ୫ ବର୍ଷରେ ମୁଖ୍ୟମନ୍ତ୍ରୀ କାମଧେନୁ ଯୋଜନା ମାଧ୍ୟମରେ ଏହାକୁ ଦୁଇ ଗୁଣ କରିବାକୁ ଲକ୍ଷ୍ୟ ରଖାଯାଇଛି। ମୁଖ୍ୟମନ୍ତ୍ରୀ କାମଧେନୁ ଯୋଜନାରେ ଏପର୍ଯ୍ୟନ୍ତ ୬୪ହଜାରରୁ ଅଧିକ ଆବେଦନ ଗ୍ରହଣ କରାଯାଇଛି। ରାଜ୍ୟର ପ୍ରାଣୀପାଳକଙ୍କ ଆୟ ବୃଦ୍ଧି ପାଇଁ ବିଭାଗ ତରଫରୁ କୁକୁଡ଼ା ପାଳନ, ଗୋ-ପାଳନ ଓ ଦୁଗ୍ଧ ଉତ୍ପାଦନ, ଛେଳି, ଘୁଷୁରୀ ପାଳନ ଓ ଘାସ ଚାଷ ଆଦି କାର୍ଯ୍ୟକ୍ରମ କରାଯାଉଛି।

୨୦୨୪-୨୫ ଆର୍ଥିକ ବର୍ଷରେ ୧.୫ କୋଟି ପ୍ରାଣୀଙ୍କ ଚିକିତ୍ସା ଓ ୫ କୋଟିରୁ ଅଧିକ ଟିକାକରଣ କରାଯାଇଛି। ପ୍ରାଣୀ ସ୍ୱାସ୍ଥ୍ୟ ଓ ରୋଗ ନିୟନ୍ତ୍ରଣ ସମ୍ବନ୍ଧୀୟ ସେବା ଯୋଗାଇବା ପାଇଁ ରାଜ୍ୟରେ ୫୪୧ ପ୍ରାଣୀ ଚିକିତ୍ସାଳୟ, ୩୧୪ ଭ୍ରାମ୍ୟମାଣ ପ୍ରାଣୀ ଚିକିତ୍ସା ୟୁନିଟ, ୩୨୩୯ ପ୍ରାଣୀ ସମ୍ପଦ ସହାୟତା କେନ୍ଦ୍ର କାର୍ଯ୍ୟ କରୁଛି। ବୁଲା ଓ ଅସହାୟ ପ୍ରାଣୀଙ୍କୁ ଜରୁରିକାଳୀନ ଚିକିତ୍ସା ସେବା ଯୋଗାଇବା ପାଇଁ ୧୪ଟି ପ୍ରାଣୀ ଆମ୍ବୁଲାନ୍‌ସ କାର୍ଯ୍ୟ କରୁଛି। ଏ ଦିଗରେ ୨୪ ଘଣ୍ଟିଆ ଆନିମଲ ହେଲ୍‌ପ ଲାଇନ କାର୍ଯ୍ୟ କରୁଛି। ମୁଖ୍ୟମନ୍ତ୍ରୀଙ୍କ ବିକଶିତ ଓଡ଼ିଶା ୨୦୩୬ ସ୍ୱପ୍ନକୁ ସାକାର କରିବା ପାଇଁ ମାଛ, ମାଂସ, କ୍ଷୀର, ଅଣ୍ଡା‌ରେ ଆତ୍ମନିର୍ଭରଶୀଳ ସହ ବିଦେଶକୁ ରପ୍ତାନୀ କରି ଆର୍ଥିକ ଭାବେ ସଶକ୍ତ ହେବା ପାଇଁ ମନ୍ତ୍ରୀ ଶ୍ରୀ ମଲ୍ଲିକ ଆହ୍ବାନ କରିଛନ୍ତି। ଏହି ସମୀକ୍ଷା ବୈଠକରେ ବିଭାଗର ପ୍ରମୁଖ ଶାସନ ସଚିବ ସୁରେଶ କୁମାର ବଶିଷ୍ଠ, ପ୍ରାଣୀ ପାଳନ ଓ ପ୍ରାଣୀ ଚିକିତ୍ସା ନିର୍ଦ୍ଦେଶକ ରୀନା ମହାପାତ୍ର, ଏପିକଲ୍‌ର ପରିଚାଳନା ନିର୍ଦ୍ଦେଶକ ଶୁଭ୍ରାଂଶୁ ମିଶ୍ର, ସିୱାର ନିର୍ଦ୍ଦେଶକ ମୃଦୁଳା ଦେବୀ, ସମସ୍ତ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସା ଅଧିକାରୀ ଓ ବିଭାଗୀୟ ବରିଷ୍ଠ ଅଧିକାରୀ ଉପସ୍ଥିତ ଥିଲେ।