ଗଠନ ହେଲା ଓଡ଼ିଶା ପ୍ରଦେଶ କଂଗ୍ରେସ କମିଟି

ଭୁବନେଶ୍ବର : ଓଡ଼ିଶା ପ୍ରଦେଶ କଂଗ୍ରେସ କମିଟି ଗଠନ କରାଯାଇଛି। ଆଜି ସଂଧ୍ୟାରେ ପ୍ରଦେଶ କଂଗ୍ରେସର ନୂଆ ପଦାଧିକାରୀଙ୍କ ନାଁ ଘୋଷଣା ହୋଇଛି। ଏଥିରେ ଏକ୍‌ଜିକ୍ୟୁଟିଭ୍ କମିଟି, ଅଫିସ କର୍ମକର୍ତା ଓ ଗଣମାଧ୍ୟମ ସେଲ୍‌କୁ ମିଶାଇ ଏକ ଜୁମ୍ବୋ ଟିମ୍ ଗଠନ କରାଯାଇଛି। ଓଡ଼ିଶା ପ୍ରଦେଶ କଂ‌ଗ୍ରେସ କମିଟିର ପଦାଧିକାରୀ ତାଲିକାକୁ ଏଆଇସିସି ମଞ୍ଜୁର କରିଛି।

ଘୋଷଣା ତାଲିକାରେ ବରିଷ୍ଠ ୫ଜଣ ବରିଷ୍ଠ ଉପ-ସଭାପତି ରହିଛନ୍ତି। ଏଥିରେ ଗଣେଶ୍ବର ବେହେରା, ତାରାପ୍ରସାଦ ବାହିନୀପତି, ଦେବାଶିଷ ପଟ୍ଟନାୟକ, ଶିବାନନ୍ଦ ରାୟ ଓ ସରସ୍ବତୀ ହେମ୍ବ୍ରମ୍ ସ୍ଥାନ ପାଇଛନ୍ତି। ସେହିପରି ୧୨ଜଣ ଉପ-ସଭାପତି ତାଲିକାରେ ରହିଛନ୍ତି ମମତା ମାଢ଼ୀ, ଅଧିରାଜ ମୋହନ ପାଣିଗ୍ରାହୀ, ରାଜେନ୍ଦ୍ର ଛତ୍ରିଆ, ବିଭୁତି ମିଶ୍ର, ସି.ଏସ୍ ରାଜନ ଏକ୍କା, ଜାନକୀ ବଲ୍ଲଭ ପଟ୍ଟନାୟକ, କିଶୋର ଜେନା, ପ୍ରତିମା ମଲ୍ଲିକ, ଶୁଭେନ୍ଦୁ ମହାନ୍ତି, ବିଶ୍ବଭୂଷଣ ଦାସ, ରଜତ ଚୌଧୁରୀ ଓ ନକୁଳ ନାଏକ ଅଛନ୍ତି। ବିଧାୟକ ସନ୍ତୋଷ ସିଂ ସାଲୁଜାଙ୍କୁ କୋଷାଧ୍ୟକ୍ଷ ଭାବେ ଘୋଷଣା କରାଯାଇଛି। ସେହିପରି ୩୯ଜଣ ସାଧାରଣ ସଂପାଦକ, ୬୧ଜଣ ସଂପାଦକଙ୍କ ନାଁ ଘୋଷଣା ହୋଇଛି।

ଅପରପକ୍ଷରେ ଏକ୍‌ଜିକ୍ୟୁଟିଭ୍ କମିଟିରେ ସମୁଦାୟ ୬୭ଜଣ ସ୍ଥାନ ପାଇଛି। ପିସିସି ସଭାପତିଙ୍କ ସମେତ, ପୂର୍ବତନ ପିସିସି ସଭାପତି, ସଂଖ୍ୟାଲଘୁ, ମହିଳା, ଯୁବ ଓ ଛାତ୍ର ସଭାପତିଙ୍କୁ ସ୍ଥାନ ଦିଆଯାଇଛି। ପ୍ରଦେଶ କଂଗ୍ରେସ ମିଡିଆ ସେଲ୍‌ର ଅଧ୍ୟକ୍ଷଭାବେ ନିଜ ପଦବି ବଜାୟ ରଖିଛନ୍ତି ଗଣେଶ୍ବର ‌ବେହେରା। ଦୀପକ ମହାପାତ୍ର ସଂଯୋଜକ ଥିବା ବେଳେ ଏହି ତାଲିକାରେ ସମୁଦାୟ ୨୭ଜଣ ରହିଛନ୍ତି।