କଳାହାଣ୍ଡିରେ ବନାବାଡିର ପୁନରୁଦ୍ଧାର ପାଇଁ ଉଦ୍ୟମ : ଓଡିଶା ସଙ୍ଗୀତ ନାଟକ ଏକାଡେମୀ ପକ୍ଷରୁ ଦୀକ୍ଷାନ୍ତ କାର୍ଯ୍ୟକ୍ରମର ଶୁଭାରମ୍ଭ
ଭବାନୀପାଟଣା : କଳାହାଣ୍ଡି ଜିଲ୍ଲାରୁ ଲୁପ୍ତ ପାଉଥିବା ଲୋକନୃତ୍ୟ ବନାବଡିର ପୁନରୁଦ୍ଧାର ପାଇଁ ରାଜ୍ୟ ସଙ୍ଗୀତ ନାଟକ ଏକାଡେମୀ ପକ୍ଷରୁ କଳାହାଣ୍ଡି ଜିଲ୍ଲାରେ ଦୀକ୍ଷାନ୍ତ କାର୍ଯ୍ୟକ୍ରମ ଆଜି ଶୁଭାରମ୍ଭ ହୋଇଛି । ଏହା ଦ୍ୱାରା ବନାବାଡି ଗୁରୁମାନଙ୍କ ପାଇଁ ୬ ମାସ ପାଇଁ ମାସିକ ୫ ହଜାର ଟଙ୍କା ଓ ୧୦ ଜଣ ଶିଷ୍ୟଙ୍କୁ ୬ ମାସ ପାଇଁ ମାସିକ ୧୫୦୦ ଟଙ୍କା ଭତ୍ତା ପ୍ରଦାନ କରାଯିବ । ଏହା ଦ୍ୱାରା କୋଭିଡ ସମୟରେ କଳା ଓ କଳାକାରଙ୍କ ସୃଜନିଶୀଳକୁ ପ୍ରୋତ୍ସାହନ କରାଯିବ ବୋଲି ଓଡିଶା ସଙ୍ଗୀତ ନାଟକ ଏକାଡେମୀର ସଚିବ ପ୍ରବୋଧ ରଥ ପ୍ରକାଶ କରିଛନ୍ତି । ଗୋଳାମୁଣ୍ଡା ବ୍ଲକର ସାନଚେର ଗାଁ ଠାରେ ଦୀକ୍ଷାନ୍ତ କାର୍ଯ୍ୟକ୍ରମର ଶୁଭାରମ୍ଭ ହୋଇଥିଲା । ଏଥିରେ ରାଜ୍ୟ ସଙ୍ଗୀତ ନାଟକ ଏକାଡେମୀର ସଚିବ ପ୍ରବୋଧ ରଥ, ଜିଲ୍ଲା ସଂସ୍କୃତି ପରିଷଦର ସଦସ୍ୟ ଡ଼ଃ ଅଜୟ ମିଶ୍ର, ଭବାନୀ ଶଙ୍କର ନିଆଲ, ଧ୍ୟାନାନନ୍ଦ ପଣ୍ଡା, ମନ୍ତ୍ରୀଙ୍କ ପ୍ରତିନିଧି ଭବାରେ ଦିନେଶ ବଗର୍ତି ଓ ସୁରେଶ ବଛା ଯୋଗଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
ସେହିଭଳି ରାଜ୍ୟ ସଙ୍ଗୀତ ନାଟକ ଏକାଡେମୀ ପକ୍ଷରୁ କଳାହାଣ୍ଡି ଜିଲ୍ଲାର ଜୁନାଗଡ଼ ସହରସ୍ଥିତ କଳା ବିକାଶ କେନ୍ଦ୍ରକୁ ବାର୍ଷିକ ୧ ଲକ୍ଷ ଟଙ୍କା ଆର୍ଥିକ ସହାୟତା ପ୍ରଦାନ କରାଯିବ ବୋଲି ଏକାଡେମୀ ପକ୍ଷରୁ ଘୋଷଣା କରାଯାଇଛି । ଏହା ଦ୍ୱାରା ଗୁରୁ ଓ କଳାକାର ମାନଙ୍କୁ ସହାୟକ ହେବ ବୋଲି ସଚିବ ପ୍ରବୋଧ ରଥ ପ୍ରକାଶ କରିଛନ୍ତି । ଆଜି ଏହି କାର୍ଯ୍ୟକ୍ରମର ଶୁଭାରମ୍ଭ କରାଯାଇଥିଲା । ଏଥିରେ ସଙ୍ଗୀତ ନାଟକ ଏକାଡେମୀ ସଚିବ ପ୍ରବୋଧ ରଥ, ସଂସ୍କୃତି ପରିଷଦର ସଦସ୍ୟ ଅଜୟ ମିଶ୍ର, ଭବାନୀ ଶଙ୍କର ନିଆଲ, ଧ୍ୟାନାନନ୍ଦ ପଣ୍ଡା, ଦିନେଶ ବଗର୍ତି, ପିଆଇ କଲେଜ ଅଧ୍ୟକ୍ଷ ବିଭୁତ ଭୂଷଣ ମେହେର, ସମୀର ସାହୁ, ଅଶୋକ ପଟ୍ଟନାୟକ ଓ କଳା ବିକାଶ କେନ୍ଦ୍ର ପରିଚାଳକ ମାନସ ରଞ୍ଜନ ସେଠି ଉପସ୍ଥିତ ଥିଲେ । ଓଡିଶା ସରକାରଙ୍କ ସଙ୍ଗୀତ ନାଟକ ଏକାଡେମୀ ଦ୍ୱାରା ଉଭୟ ଦୀକ୍ଷାନ୍ତ ଓ ଓଡିଶୀ ପ୍ରଶିକ୍ଷଣ କେନ୍ଦ୍ର ଆରମ୍ଭ ହୋଇଛି । କଳାହାଣ୍ଡି ଜିଲ୍ଲାରେ ବହୁ ଲୋକ ନୃତ୍ୟ ଓ ଲୋକ କଳା ଲୋପ ପାଉଥିବା ବେଳେ ଏହାର ସୁରକ୍ଷା ପାଇଁ ଏକାଡେମୀ ପକ୍ଷରୁ ପଦକ୍ଷେପ ନେବାକୁ ସାଧାରଣରେ ଦାବୀ ହୋଇଛି ।