କରୋନା ପାଇଁ ଆଗୁଆ ମିଳିବ ତିନି ମାସର ପିଡିଏସ୍ ସାମଗ୍ରୀ
ଅତ୍ୟାବଶ୍ୟକ ସାମଗ୍ରୀ ମହଜୁଦ୍ ଅଛି, ଏକାଥରେ ଚାରି ମାସର ଭତ୍ତା
ଭୁବନେଶ୍ବର : କରୋନା ପାଇଁ ତିନି ମାସର ପିଡିଏସ୍ ସାମଗ୍ରୀ ଆଗୁଆ ଦିଆଯିବ। ଏପ୍ରିଲ୍, ମେ’ ଓ ଜୁନ୍ ମାସର ଚାଉଳ, ଗହମ ଓ କିରାସିନି ଏପ୍ରିଲ୍ ପହିଲାରୁ ମେ’ ୧୫ ତାରିଖ ଭିତରେ ମିଳିବ। ଜାତୀୟ ଖାଦ୍ୟ ସୁରକ୍ଷା ଆଇନ୍ରେ ତାଲିକାଭୁକ୍ତ ୩.୨୬ କୋଟି ହିତାଧିକାରୀ ଓ ରାଜ୍ୟ ଖାଦ୍ୟ ସୁରକ୍ଷା ଯୋଜନାରେ ତାଲିକାଭୁକ୍ତ ୪.୫ ଲକ୍ଷ ହିତାଧିକାରୀ ଏଥିରେ ଉପକୃତ ହେବେ।
Sambad is now on WhatsApp
Join and get latest news updates delivered to you via WhatsApp
କରୋନାର ସତର୍କତାମୂଳକ ପଦକ୍ଷେପ ଭାବେ ସୁଲଭ ମୂଲ୍ୟ ଦୋକାନଗୁଡ଼ିକରେ ଗହଳି ନ ଜମାଇ ହିତାଧିକାରୀମାନେ ଯେପରି ରାସନ୍ ସାମଗ୍ରୀ ଉଠାଇ ପାରିବେ, ସେଥି ପାଇଁ ୪୫ ଦିନର ସମୟ ଦିଅାଯାଇଛି। ଏହି ବଣ୍ଟନ ପ୍ରକ୍ରିୟାକୁ ସୁରୁଖୁରୁରେ ପରିଚାଳନା କରିବା ପାଇଁ ଆବଶ୍ୟକ ପଦକ୍ଷେପ ନେବାକୁ ଜିଲ୍ଲାପାଳମାନଙ୍କୁ କୁହାଯାଇଛି। କରୋନା ମୁକାବିଲାକୁ ଦୃଷ୍ଟିରେ ରଖି ସାଧାରଣ ବଣ୍ଟନ ବ୍ୟବସ୍ଥାରେ ଇ-ପସ୍ ମେସିନ୍ ଜରିଆରେ ରାସନ୍ ସାମଗ୍ରୀ ବଣ୍ଟନ ସମୟରେ ହିତାଧିକାରୀଙ୍କ ଟିପ ଚିହ୍ନ ଅଥବା ଚକ୍ଷୁ ଡୋଳା ତନଖିର ଆବଶ୍ୟକତାକୁ ବାଦ୍ ଦେବାକୁ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ପକ୍ଷରୁ କୁହାଯାଇଛି।
ଅପର ପକ୍ଷରେ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ କହିଛନ୍ତି ଯେ ରାଜ୍ୟରେ ଅତ୍ୟାବଶ୍ୟକ ସାମଗ୍ରୀ ଯଥେଷ୍ଟ ପରିମାଣର ମହଜୁଦ୍ ରହିଛି। କରୋନା ଯୋଗୁ କୌଣସି ସାମଗ୍ରୀର ଅଭାବ ପଡ଼ିବ ନାହିଁ। ଖାଦ୍ୟ ଯୋଗାଣ ବିଭାଗ ଏ ନେଇ ସଚେତନ ଅଛି ଓ ଅନ୍ୟ ବିଭାଗ ସହ ସମନ୍ବୟ ରଖି କାର୍ଯ୍ୟ କରୁଛି। ଏଣୁ ଲୋକେ ଆତଙ୍କିତ ହୋଇ ଅଯଥା କିଣାକିଣି କରି ଖର୍ଚ୍ଚାନ୍ତ ହୁଅନ୍ତୁ ନାହିଁ। ଏହା ସହ କଳାବଜାରୀ ରୋକିବା ପାଇଁ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।
ଏକାଥରେ ଚାରି ମାସର ଭତ୍ତା
ଭୁବନେଶ୍ବର : ସାମାଜିକ ସୁରକ୍ଷା ଯୋଜନାରେ ହିତାଧିକାରୀଙ୍କୁ ଏକା ସଙ୍ଗେ ୪ ମାସର ଭତ୍ତା ମିଳିବ। କରୋନା ମୁକାବିଲା ପାଇଁ ସରକାର ଏପରି ନିଷ୍ପତ୍ତି ନେଇଛନ୍ତି। ଏପ୍ରିଲ୍ରୁ ଜୁଲାଇ ମାସ ପର୍ଯ୍ୟନ୍ତ ୪ ମାସର ଭତ୍ତା ଅଗ୍ରୀମ ଆକାରରେ ଏକାଥରେ ଦିଆଯିବ। ଏ ସମ୍ପର୍କରେ ସୂଚନା ଦେଇ ରାଜ୍ୟ ସାମାଜିକ କଲ୍ୟାଣ ଓ ଭିନ୍ନକ୍ଷମ ସଶକ୍ତୀକରଣ ବିଭାଗ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା କହିଛନ୍ତି ଯେ କରୋନା ଭାଇରସ୍ ଯୋଗୁ ଏବେ ବିଭିନ୍ନ ପ୍ରକାରର ପ୍ରତିଷେଧକମୂଳକ ନିଆଯାଉଛି। ଲୋକମାନେ ଯେଭଳି ଏକତ୍ରିତ ନ ହେବେ ତାହା ଉପରେ ସରକାର ଗୁରୁତ୍ୱ ଦେଉଛନ୍ତି। ତେଣୁ ଏହାକୁ ଦୃଷ୍ଟିରେ ରଖି ବାର୍ଦ୍ଧକ୍ୟ ଭତ୍ତା, ବିଧବା ଭତ୍ତା ଓ ଭିନ୍ନକ୍ଷମ ଭତ୍ତା ଆଦିକୁ ଏକସଙ୍ଗେ ୪ ମାସର ବଣ୍ଟନ ନିମନ୍ତେ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ସେହି ଅନୁଯାୟୀ ବିଭାଗ ପକ୍ଷରୁ ପଦକ୍ଷେପ ନିଆଯାଉଛି। ସୂଚନାଯୋଗ୍ୟ ଯେ ବର୍ତ୍ତମାନ ମଧୁ ବାବୁ ପେନ୍ସନ୍ ଯୋଜନାରେ ପାଖାପାଖି ୨୮ ଲକ୍ଷ ହିତାଧିକାରୀ ଓ ଜାତୀୟ ସାମାଜିକ ସହାୟତା କାର୍ଯ୍ୟକ୍ରମ ଅଧୀନରେ ୨୦ ଲକ୍ଷ ହିତାଧିକାରୀ ମାସିକ ଭତ୍ତା କିମ୍ବା ପେନ୍ସନ୍ ପାଉଛନ୍ତି।