ଥଣ୍ଡା କମିବ, ଲାଗି ରହିବ କୁହୁଡ଼ି
ଭୁବନେଶ୍ୱର : ୧୦ ଦିନ ଧରି ଜାଡ଼ରେ ଓଡ଼ିଶା ଥରିବା ପରେ ଏବେ ଟିକିଏ ଆଶ୍ୱସ୍ତି ମିଳିଛି। ଦୁଇ ଦିନ ହେଲା ସାରା ଓଡ଼ିଶାରେ ସର୍ବନିମ୍ନ ତାପମାତ୍ରା ବଢ଼ିଥିବାରୁ ଥଣ୍ଡା କମିଛି। ଏଭଳି ପରିସ୍ଥିତି ୨୧ ତାରିଖ ଯାଏ ଜାରି ରହିବ। ଥଣ୍ଡାରେ ସେମିତି କୌଣସି ପରିବର୍ତନ ହେବନି। ଗୋଟିଏରୁ ଦୁଇ ଡିଗ୍ରି କମ୍ ବେଶି ହୋଇପାରେ। ଫୁଲବାଣୀରେ ତାପମାତ୍ରା ସର୍ବନିମ୍ନ ତାପମାତ୍ରା ପୂର୍ବଭଳି ୧୦ ଡିଗ୍ରି ଭିତରେ ରହିବ। ଦାରିଙ୍ଗବାଡ଼ି ଏବଂ ସୁନ୍ଦରଗଡ଼ରେ ବି ସମାନ ସ୍ଥିତି ରହିବାର ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର।
Sambad is now on WhatsApp
Join and get latest news updates delivered to you via WhatsApp
ପାଣିପାଗ ବିଜ୍ଞାନୀଙ୍କ ପୂର୍ବାନୁମାନ କହୁଛି ଥଣ୍ଡାରୁ ଆଶ୍ୱସ୍ତି ମିଳିବାକୁ ଥିଲେ ମଧ୍ୟ ଘନ କୁହୁଡ଼ି ଆଉ ଦୁଇ ଦିନ ଜାରି ରହିବ। ଅଭ୍ୟନ୍ତରୀଣ ଅପେକ୍ଷା ଉପକୂଳ ଓଡ଼ିଶାରେ ଅଧିକ କୁହୁଡ଼ି ହେବ। କିଛି ସ୍ଥାନରେ ୫୦ରୁ ୧୦୦ ମିଟର ପର୍ଯ୍ୟନ୍ତ ରାସ୍ତା ଦୃଶ୍ୟମାନ ହେବ ନାହିଁ। ଖୋର୍ଧା, ନୟାଗଡ଼, କଟକ, ବାଲେଶ୍ୱର, କେନ୍ଦ୍ରାପଡ଼ା, ଗଞ୍ଜାମ, ପୁରୀ, ଜଗତ୍ସିଂହପୁରରେ ପୂର୍ବାହ୍ନ ୧୦ଟା ପର୍ଯ୍ୟନ୍ତ କୁହୁଡ଼ି ରହିବ। ପଶ୍ଚିମ ଓ ଅଭ୍ୟନ୍ତରୀଣ ଓଡ଼ିଶାରେ ଦୁଇ ଡିଗ୍ରି ପର୍ଯ୍ୟନ୍ତ ଏପାଖ ସେପାଖ ହୋଇପାରେ।
ଗତ ୨୪ ଘଣ୍ଟାରେ ଦୁଇଟି ସହରର ତାପମାତ୍ରା ୧୦ ଡିଗ୍ରି ତଳେ ରହିଥିଲା। ଫୁଲବାଣୀରେ ସର୍ବନିମ୍ନ ତାପମାତ୍ରା ୭.୫ ଡିଗ୍ରି ରେକର୍ଡ କରାଯାଇଛି। ସୁନ୍ଦରଗଡ଼ରେ ୯ ଡିଗ୍ରି ରହିଥିବା ବେଳେ ହୀରାକୁଦରେ ୧୦.୧, କେନ୍ଦୁଝରଗଡ଼ରେ ୧୦.୨, ବଲାଙ୍ଗିରରେ ୧୦.୫, ଅନୁଗୁଳ ଓ ଦାରିଙ୍ଗବାଡ଼ିରେ ୧୧, ସୋନପୁରରେ ୧୧.୬, ସମ୍ବଲପୁରରେ ୧୧.୭, ବାରିପଦା ଓ ଝାରସୁଗୁଡ଼ାରେ ୧୧.୫, ବାଲେଶ୍ୱରରେ ୧୧.୭, ଭବାନୀପାଟଣା ଓ ଢ଼େଙ୍କାନାଳରେ ୧୨, କଟକରେ ୧୨.୫, ଭୁବନେଶ୍ୱରରେ ୧୨.୯ ଡିଗ୍ରିି ରହିଥିଲା। ଆସନ୍ତା ୨୪ ଘଣ୍ଟାରେ ଭୁବନେଶ୍ୱରର ସର୍ବୋଚ୍ଚ ତାପମାତ୍ରା ୨୯ ଓ ସର୍ବନିମ୍ନ ୧୪ ଡିଗ୍ରି ରହିବ ବୋଲି ପୂର୍ବାନୁମାନ କରାଯାଇଛି।