ବଗିଚାକୁ ଆମ୍ବ ତୋଳିବାକୁ ଯାଇଥିଲେ ବୃଦ୍ଧ, କଚାଡ଼ି ଦେଲା ଦନ୍ତା

ଯୋରନ୍ଦା: ଢେଙ୍କାନାଳ ଜିଲ୍ଲା ଗଁଦିଆ ଥାନା ଷଡ଼ଙ୍ଗୀ ରେଞ୍ଜ ଯୋରନ୍ଦା ବନପାଳଙ୍କ ଅଧିନ ନେଉଳପୋଇ ଗ୍ରାମରେ ବଗିଚାକୁ ଆମ୍ବ ତୋଳିବାକୁ ଯାଇଥିବା ଜଣେ ବୃଦ୍ଧଙ୍କୁ ଦନ୍ତା କଚାଡ଼ି ଦେଇଛି। ମୃତକ ହେଲେ  ବିରୋଧ ସାମଲ।

ସୂଚନା ଅନୁସାରେ ବିରୋଧ ସାମଲ ଆଜି ସକାଳେ ନେଉଳପୋଇ ଗ୍ରାମ ପଞ୍ଚାୟତ ଅଫିସ୍ ପଛପାର୍ଶ୍ୱରେ ଥିବା ନିଜ ଆମ୍ୱବଗିଚାକୁ ଆମ୍ବ ତୋଳିବାକୁ ଯାଇଥିଲେ। ଏହି ସମୟରେ ଗୋଟିକିଆ ଦନ୍ତାହାତୀ ହାବୁଡ଼ରେ ପଡ଼ିଥିଲେ। ଦନ୍ତାହାତୀ ଅତି ଦୟନୀୟ ଅବସ୍ଥାରେ ତାଙ୍କୁ ଦଳି ଚକଟି ଦେଇଥିଲା। ତାଙ୍କ ଡାହାଣ ହାତଟିକୁ ଶରୀରରୁ ଅଲଗା କରିଦେଇଥିବା ବେଳେ ତାଙ୍କ ଡାହାଣ ଗୋଡ଼କୁ ଦଳି ମକଚି ଦେଇ ଦନ୍ତା ଜଙ୍ଗଲକୁ ପଳାଇଥିଲା। ଫଳରେ ଘଟଣାସ୍ଥଳରେ ବିରୋଧଙ୍କର ମୃତ୍ୟୁ ହୋଇଥିଲା। ସକାଳେ ହାତୀ ତାଙ୍କୁ ମାରିଥିବା ବେଳେ ପ୍ରାୟ ଦିନ ଗୋଟାଏ ବେଳେ ଜାଣିବାକୁ ପାଇଲେ। ଖବର ପାଇ ଯୋରନ୍ଦା ବନପାଳ ପିଙ୍କି ପତି ଘଟଣାସ୍ଥଳରେ ତଦନ୍ତ କରୁଛନ୍ତି। ଘଟଣା ସ୍ଥଳରେ ଗ୍ରାମବାସୀ ରୁଣ୍ଡ ହୋଇଛନ୍ତି।