ରାଇରଙ୍ଗପୁର/ଝରାଡିହି: ମୟୂରଭଞ୍ଜ ଜିଲ୍ଲା ତିରିଂ ଥାନା ତଥା ଝରାଡିହି ଫାଣ୍ଡି ଅର୍ନ୍ତଗତ ବଡକେଡମ ଗ୍ରାମରେ ଜଣେ ବୃଦ୍ଧଙ୍କୁ କାଠଫାଳିଆରେ ମାଡ ମାରି ହତ୍ୟା କରାଯାଇଥିବା ଅଭିଯୋଗ ହୋଇଛି । ସୂଚନା ଅନୁଯାୟୀ ପୂର୍ବ ଶତ୍ରୁତାକୁ କେନ୍ଦ୍ର କରି ବଡକେଡମ ଗ୍ରାମର ସାନଦାନ୍ଦୁ ମୁର୍ମୁଙ୍କ ପୁଅ ଶାଂଖାଇ ମୁର୍ମୁ (୩୫)ସେହି ଗ୍ରାମର ଜାନୁ ମୁର୍ମୁ(୫୩)ଙ୍କୁ ଆଜି ସନ୍ଧ୍ୟା ସମୟରେ ଏକ କାଠ ଫାଳିଆ ସାହାଯ୍ୟରେ ମୁଣ୍ଡରେ ମାରିଥିଲେ। ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି ଝରାଡିହି ଗୋଷ୍ଠୀ ସ୍ୱାସ୍ଥକେନ୍ଦ୍ରରେ ଭର୍ତ୍ତି କରାଯାଇଥିଲା । ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ତିରିଂ ଥାନା, ବହଳଦା ଥାନା ଓ ଝରାଡିହି ଫାଣ୍ଡି ପୁଲିସ ଖବର ପାଇ ଛାନଭିନ୍ କରୁଛନ୍ତି । ଏନେଇ ତିରିଂ ଥାନାରେ କେସ୍ ନଂ ୨୯/୨୩ ରେ ଏକ ହତ୍ୟା ମାମଲା ରୁଜୁ ହୋଇଛି । ସୂଚନା ଅନୁଯାୟୀ ଜାନୁ ମୁର୍ମୁ ଗ୍ରାମର ଡାକୁଆ ଭାବେ କାର୍ଯ୍ୟ କରନ୍ତି । ତେବେ ଆଗାମୀ ସାଲାଇ ପୂଜାର ପ୍ରସ୍ତୁତି ବୈଠକ ପାଇଁ ଶାଂଖାଇ ଘରକୁ ଯାଇଥିବା ସମୟରେ କାଠ ପାଳିଆରେ ଆଘାତ କରିଥିଲା । ତେବେ ଅଭିଯୁକ୍ତ ଶାଂଖାଇକୁ ପୋଲିସ ଅଟକ ରଖି ଅଧିକ ପଚରା ଉଚୁରା ଜାରି ରଖିଛି ।