୯୫ର ରାଜ୍: ରୋଗ କେବେ କୁମୁଦିନୀଙ୍କ ପାଖ ମାଡ଼ିନି
ଚକାପାଦ, (ମନୋଜ କୁମାର ଗୌଡ଼): କନ୍ଧମାଳ ଜିଲ୍ଲା ଚକାପାଦ ବ୍ଲକ୍ ଅନ୍ତର୍ଗତ ଶଙ୍କରାଖୋଲ ଗ୍ରାମର କୁମୁଦିନୀ ପାଢ଼ୀ। ବୟସ ୯୫ ବର୍ଷ ଅତିକ୍ରମ ହେଲାଣି। ତଥାପି ଏବେବି ସେ ନିରୋଗ ଓ ସୁସ୍ଥ ଜୀବନ ବିତାଉଛନ୍ତି। ଦୈନନ୍ଦିନ କାମ ଠିକ୍ ଭାବେ କରୁଛନ୍ତି। ଆରାମରେ ଚଲାବୁଲା କରିପାରୁଛନ୍ତି। ବେଳେବେଳେ ବାଡ଼ିର ସାହାରା ଦରକାର ପଡ଼ୁଛି। ସନ୍ତୁଳିତ ଖାଦ୍ୟ ତାଙ୍କର ପସନ୍ଦ। ସେ କେବେବି ବାହାରର ଖାଦ୍ୟ ଖାଇବାକୁ ପସନ୍ଦ କରନ୍ତି ନାହିଁ। ନିୟମିତ ସକାଳେ ସେ ଭାତ ସହ ଘରେ ରନ୍ଧାଖାଦ୍ୟ ଓ ରାତିରେ ରୁଟି ଖାଆନ୍ତି। ଆଜି ପର୍ଯ୍ୟନ୍ତ କୌଣସି ରୋଗ ତାଙ୍କ ପାଖ ମାଡ଼ି ପାରି ନଥିବା ବେଳେ କେବେ କେମିତି ସାମାନ୍ୟ ଜ୍ବର କିମ୍ବା ଥଣ୍ଡା ହେଲେ ଡାକ୍ତରଖାନାକୁ ଯାଇଥାନ୍ତି।
Sambad is now on WhatsApp
Join and get latest news updates delivered to you via WhatsApp
୩୪ ବର୍ଷ ତଳେ ସେ ସ୍ବାମୀଙ୍କୁ ହରାଇଥିଲେ। ତଥାପି ସେ ଭାଙ୍ଗି ନପଡ଼ି ମନୋବଳକୁ ଦୃଢ଼ କରି ନିଜ ପ୍ରଚେଷ୍ଟା ବଳରେ ପରିବାରକୁ ଆଗକୁ ବଢ଼ାଇ ନେଇଥିଲେ। ଏବେ ୪ ପୁଅବୋହୂଙ୍କ ସମେତ ନାତିନାତୁଣୀ ଓ ଅଣନାତିମାନଙ୍କ ସହ କୁମୁଦିନୀ ହସଖୁସିରେ ଜୀବନ ବିତାଉଛନ୍ତି।
ଗଞ୍ଜାମ ଜିଲ୍ଲାରେ ଜନ୍ମିତ କୁମୁଦିନୀ ବିବାହ ପରେ ସ୍ୱାମୀ ବିପ୍ରଚରଣ ପାଢ଼ୀଙ୍କ ସହ ରୋଜଗାର ଆଶାରେ ଶଙ୍କରାଖୋଲକୁ ଚାଲିଆସିଥିଲେ। ଏଠାରେ ତାଙ୍କ ସ୍ବାମୀ ଛୋଟିଆ ବ୍ୟବସାୟ ଆରମ୍ଭ କରିଥିବା ବେଳେ କୁମୁଦିନୀ ତାଙ୍କୁ ସହଯୋଗ କରୁଥିଲେ। ତିନିଝିଅ ଓ ୪ ପୁଅ ଜନ୍ମ ହୋଇଥିଲେ। ତେଲଲୁଣର ଛୋଟିଆ ସଂସାର ଠିକ୍ଠାକ୍ ଭାବେ ଚାଲିଥିଲା। ଦୁଇଝିଅ ଓ ଗୋଟିଏ ପୁଅକୁ ବିବାହ କରାଇଥିଲେ।
ଏତିକିବେଳେ ସ୍ୱାମୀ ହଠାତ୍ ଅସୁସ୍ଥ ହୋଇ ଆର ପାରିକୁ ଚାଲି ଯାଇଥିଲେ। ପରିବାରର ବୋଝ କୁମୁଦିନୀଙ୍କ ଉପରେ ପଡ଼ିଥିଲା। ଛୋଟିଆ ଲୁଗାଦୋକାନ ଓ ଧାନକଳ ମାଧ୍ୟମରେ ସେ ପରିବାର ପ୍ରତିପୋଷଣ କରିବା ସହ ଅନ୍ୟ ତିନିପୁଅ ଓ ଗୋଟିଏ ଝିଅକୁ ବିବାହ କରାଇଥିଲେ। ୭ ପୁଅଝିଅଙ୍କୁ ମଣିଷ କରିବା ସହ ସେମାନଙ୍କୁ ନିଜ ଗୋଡ଼ରେ ଛିଡ଼ା କରାଇବା ପରେ କୁମୁଦିନୀ ଏବେ ସୁସ୍ଥ ଜୀବନ ବିତାଉଛନ୍ତି। ଗ୍ରାମର ସବୁଠୁ ବୟୋଜ୍ୟେଷ୍ଠ ହୋଇଥିବାରୁ ତାଙ୍କ ପ୍ରତି ସମସ୍ତଙ୍କ ଯଥେଷ୍ଟ ସମ୍ମାନ, ସ୍ନେହ ଓ ଶ୍ରଦ୍ଧା ରହିଛି।