ଫୁଲବାଣୀ: ବଣଭୋଜି କରିବାକୁ ଯାଇ ସାଲୁଙ୍କୀ ନଦୀରେ ଜଣେ ଯୁବକଙ୍କ ମୃତ୍ୟୁ ଘଟିଛି। ମୃତ ଯୁବକ ଜଣକ ହେଲେ ଫୁଲବାଣୀ ଗଣେଶ ବଜାରର ବ୍ୟବସାୟୀ ରାମା ରାଓ ପାତ୍ରଙ୍କ ପୁତ୍ର ଜଗଦୀଶ ପାତ୍ର (୨୬)। ଜଗଦୀଶ ନିଜ ସାଙ୍ଗ ଅଜିତ ପାତ୍ର, ରବୀନ୍ଦ୍ର ନାୟକ, ରାଜ ସାହୁ ଓ ସରୋଜ କୁମାର ସାହୁଙ୍କ ସହିତ ମିଶି ତୁଡ଼ିପାଜୁ ପଞ୍ଚାୟତର ବୁଢ଼ାଦାନି ଗାଁ ନିକଟ ସାଲୁଙ୍କୀ ନଦୀକୂଳରେ ବଣଭୋଜି କରିବାକୁ ଯାଇଥିଲେ। ନଦୀରେ ଗାଧୋଇବା ସମୟରେ ଜଗଦୀଶ ଓ ଅଜିତଙ୍କର ଗୋଡ଼ ଖସି ଯାଇଥିଲା। ଉଭୟ ପାଣି ଭିତରେ ବୁଡ଼ି ଯାଇଥିଲେ। ଅଜିତ୍‌ ପାଣି ଭିତରୁ ପହଁରି ପହଁରି ବାହାରକୁ ଚାଲି ଆସିଥିଲେ। ମାତ୍ର ଜଗଦୀଶ ନିଖୋଜ ହୋଇଯାଇଥିଲେ। ଫୁଲବାଣୀ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚି ବହୁ ସମୟ ପାଣିରେ ଖୋଜାଖୋଜି କରିବା ପରେ ପାଣି ମଧ୍ୟରୁ ଜଗଦୀଶର ମୃତ ଦେହକୁ ଉଦ୍ଧାର କରିଥିଲେ। ସଦର ଥାନା ପୁଲିସ ଘଟଣା ସ୍ଥଳରେ ପହଞ୍ଚି ଶବ ଜବତ କରିବା ସହିତ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।