ବାଇକ୍ ଧକ୍କାରେ ବାପା ମୃତ, ପୁଅ ସମେତ ୫ ଗୁରୁତର

ପାଟଣାଗଡ଼: ବଲାଙ୍ଗୀର-ପାଟଣାଗଡ଼ ମୁଖ୍ୟ ରାସ୍ତାର ବାନ୍ଧନବାଡି ଛକ ନିକଟରେ ଆଜି ସନ୍ଧ୍ୟାରେ ଏକ ସଡ଼କ ଦୁର୍ଘଟଣା ଘଟିଛି। ଏଥିରେ ଜଣକର ମୃତ୍ୟୁ ଘଟିଥିବା ସହ ଗୁରୁତର ଥିବା ୫ ଜଣକୁ ବଲାଙ୍ଗୀର ଭୀମଭୋଇ ମେଡିକାଲ କଲେଜ ଓ ହସପିଟାଲକୁ ସ୍ଥାନାନ୍ତରିତ କରାଯାଇଥିବା ଜଣାପଡିଛି।

ମିଳିଥିବା ସୂଚନା ଅନୁଯାୟୀ, ବାନ୍ଧନବାଡି ଗ୍ରାମର ପୂର୍ଣ୍ଣ ପୁଟେଲ(୬୫), ପୁଅ ବୁଧୁ ପୁଟେଲ(୪୫)କୁ ମିଶାଇ ୪ ଜଣ ରାସ୍ତା କଡରେ ଚାଲିଚାଲି ଯାଉଥିଲେ। ଏହି ସମୟରେ ଏକ ବାଇକ୍ ଆସି ସେମାନଙ୍କୁ ଧକ୍କା ଦେଇଥିଲା। ଏହା ପରେ ପୁଣି ଏକ ବାଇକ୍ ଧକ୍କାରେ ଆହତ ହୋଇଥିବା ଓ ଧକ୍କା ଦେଇଥିବା ବାଇକ ଆରୋହୀମାନଙ୍କୁ ଧକ୍କା ଦେଇଥିଲା। ଏଥିରେ ସଭିଏଁ ଗୁରୁତର ହୋଇ ପଡିଥିଲେ।ସମସ୍ତଙ୍କୁ ଆମ୍ବୁଲାନ୍ସ ଯୋଗେ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ଓ ହସପିଟାଲକୁ ସ୍ଥାନାନ୍ତରିତ କରା ଯାଉଥିଲା।ରାସ୍ତାରେ ଜଣକର ମୃତ୍ୟୁ ହୋଇଥିବା ସୂଚନା ମିଳିଛି।ମୃତକ ଜଣକ ବାନ୍ଧନବାଡି ଗ୍ରାମର ପୂର୍ଣ୍ଣ ପଟେଲ (୬୫) ବୋଲି ସୂଚନା ମିଳୁଥିବା ବେଳେ ଗୁରୁତର ଥିବା ମୃତକଙ୍କ ପୁଅ ସମେତ ଅନ୍ୟ ୫ ଜଣକୁ ବଲାଙ୍ଗୀରକୁ ନିଆ ଯାଉଥିବା ଜଣାପଡିଛି। ଘଟଣା ସମ୍ପର୍କରେ ସୂଚନା ପାଇ ପାଟଣାଗଡ଼ ପୁଲିସ ପହଞ୍ଚି ତଦନ୍ତ କରୁଥିବା ବେଳେ ଥାନାକୁ ୨ ଜଣକୁ ଆଣି ଅଟକ ରଖି ପଚରା ଉଚୁରା କରୁଥିବା ନେଇ ବିଶ୍ବସ୍ତ ସୂତ୍ରରୁ ଜଣାପଡିଛି।