୨ଟି ଟ୍ରକ୍ ମଧ୍ୟରେ ଧକ୍କା: ହେଲ୍ପରଙ୍କ ମୃତ୍ୟୁ, ଗୁରୁତର ଡ୍ରାଇଭରଙ୍କୁ ଡାକ୍ତରଖାନାରେ ଭର୍ତ୍ତି
ବସ୍ତା୨: ବାଲେଶ୍ବର ଜିଲ୍ଲା ବସ୍ତା ଥାନା ଅଧୀନ ୬୦ନଂ ଜାତୀୟ ରାଜପଥ ବସ୍ତା ବାଇପାସ ନିକଟରେ ବୁଧବାର ଦିନ ମର୍ମନ୍ତୁଦ ସଡ଼କ ଦୁର୍ଘଟଣା ଘଟି ଜଣେ ଟ୍ରକ୍ ହେଲପରଙ୍କ ମୃତ୍ୟୁ ହୋଇଛି। ଏହି ଦୁର୍ଘଟଣାରେ ଅନ୍ୟ ଜଣେ ଗୁରୁତର ହୋଇଥିବା ଦେଖିବାକୁ ମିଳିଛି। ମୃତ ବ୍ୟକ୍ତି ହେଲେ ଚିତ୍ତରଞ୍ଜନ ନାୟକ (୩୪)।
Sambad is now on WhatsApp
Join and get latest news updates delivered to you via WhatsApp
ସୂଚନା ଅନୁସାରେ ଆଜି ସକାଳ ୬ଟାରେ ୬୦ ନମ୍ବର ଜାତୀୟ ରାଜପଥର କୁଣ୍ଡପୁର ଛକ ନିକଟରେ ଛିଡ଼ା ହୋଇଥିବା (ଓଡି୦୧ଜେଡ୍-୦୩୨୭) ଆଜ୍ବେଷ୍ଟସ୍ ବୋଝେଇ ଟ୍ରକ୍କୁ ସମାନ ଦିଗରୁ ଆସୁଥିବା (ଓଡି୦୨ସିସି-୪୮୫୧) ଆଲୁମିନିୟମ ବୋଝେଇ ଟ୍ରକ ଧକ୍କା ଦେଇଥିଲା। ଘଟଣାସ୍ଥଳରେ ଆଲୁମିନିୟମ ବୋଝେଇ ଟ୍ରକ୍ର ହେଲ୍ପର ଗାଡ଼ିରେ ଚାପି ହୋଇଥିଲେ। ଫଳରେ ତାଙ୍କର ମୃତ୍ୟୁ ହୋଇଥିଲା। ସ୍ଥାନୀୟ ଲୋକେ ବହୁଚେଷ୍ଟା କରି ମଧ୍ୟ ଗୁରୁତରଙ୍କୁ ଉଦ୍ଧାର କରିପାରିନଥିଲେ।
ପରେ ଖବର ପାଇ ବସ୍ତା ପୁଲିସ, ଅଗ୍ନିଶମ ବିଭାଗ, ରାଜପଥ କର୍ତ୍ତୃପକ୍ଷ ପହଞ୍ଚି ଆଜବେଷ୍ଟସ ବୋଝେଇ ଟ୍ରକ୍ର ଡ଼୍ରାଇଭରଙ୍କୁ ଗୁରୁତର ଅବସ୍ଥାରେ ଓ ଅନ୍ୟ ଗାଡ଼ିରେ ଚାପି ହୋଇଥିବା ହେଲଫରଙ୍କୁ ଉଦ୍ଧାର କରି ରାଜପଥ ଆମ୍ବୁଲାନ୍ସ ଯୋଗେ ବସ୍ତା ଡ଼ାକ୍ତରଖାନାକୁ ନେଇଥିଲେ। ସେଠାରେ ଆଲୁମିନିୟମ ଟ୍ରକ୍ ହେଲପରଙ୍କୁ ଡାକ୍ତର ମୃତ ଘୋଷଣା କରିଥିଲେ। ମୃତ ଜଣକ ହେଲେ ଖୋର୍ଦ୍ଧା ଜିଲ୍ଲାର ବାଉରୀ ସାହି ଭାଲିଆ ବାଡ଼ି ଅଞ୍ଚଳର ଚିତ୍ତରଞ୍ଜନ ନାୟକ ବୋଲି ଜଣାଯାଇଛି। ବସ୍ତା ପୁଲିସ ଗାଡ଼ି ଦୁଇଟିକୁ ଜବତ କରିବା ସହିତ ମୃତକଙ୍କୁ ପୋଷ୍ଟମର୍ଟମ ପାଇଁ ପଠାଇ ଅଧିକ ତଦନ୍ତ ଜାରୀ ରଖିଛି ।