ଅକ୍ଟୋବର ୧୬ ସୁଦ୍ଧା ବଙ୍ଗୋପସାଗରରେ ଆଉ ଏକ ଲଘୁଚାପ : ସ୍କାଏମେଟ୍
ଭୁବନେଶ୍ୱର : ବଙ୍ଗୋପସାଗରରେ ଲଘୁଚାପ ଯୋଗୁଁ ସେପ୍ଟେମ୍ବର ଶେଷ ସପ୍ତାହ ଓ ଅକ୍ଟୋବର ପ୍ରଥମ ସପ୍ତାହରେ ଓଡ଼ିଶାରେ ପ୍ରବଳ ବର୍ଷା ଜାରି ରହିଛି । କିନ୍ତୁ ଏବେ ବର୍ଷା ଥମି ନଥିବାବେଳେ ବଙ୍ଗୋପସାଗରରେ ଆଉ ଦୁଇଟି ଲଘୁଚାପ ସୃଷ୍ଟି ହେବାର ସମ୍ଭାବନା ଦେଖାଦେଇଛି । ଆସନ୍ତା ୯ ତାରିଖରେ ଏକ ଲଘୁଚାପ ସୃଷ୍ଟି ହେବାକୁ ଥିବାବେଳେ ୧୬ ତାରିଖ ବେଳକୁ ଆଉ ଏକ ଲଘୁଚାପ ହେବାର ସମ୍ଭାବନା ରହିଛି ବୋଲି ଘରୋଇ ପାଣିପାଗ ସଂସ୍ଥା ସ୍କାଏମେଟ୍ କହିଛି । ଏହା ଫଳରେ ଅକ୍ଟୋବର ମାସରେ ଓଡ଼ିଶାରେ ବର୍ଷା ଜାରି ରହିବାର ସମ୍ଭାବନା ରହିଛି ।
Sambad is now on WhatsApp
Join and get latest news updates delivered to you via WhatsApp
ସ୍କାଏମେଟ ପକ୍ଷରୁ ଆହୁରି ମଧ୍ୟ କୁହାଯାଇଛି ଯେ ଅକ୍ଟୋବର ମାସର ପରବର୍ତ୍ତୀ ଦିନଗୁଡ଼ିକରେ ଆଉ କେତେକ ଲଘୁଚାପ ହେବାର ସମ୍ଭାବନାକୁ ଅସ୍ୱୀକାର କରାଯାଇନପାରେ । ତେବେ ଏଥିପାଇଁ ଆମକୁ ଆଉକିଛି ଦିନ ଅପେକ୍ଷା କରିବାକୁ ହେବ । ସ୍କାଏମେଟ୍ ପକ୍ଷରୁ ପ୍ରକାଶିତ ରିପୋର୍ଟରେ କୁହାଯାଇଛି ଯେ ଅକ୍ଟୋବର ମାସରେ ଦକ୍ଷିଣ-ପଶ୍ଚିମ ମୌସୁମୀ ଫେରିବା ଆରମ୍ଭ କରେ । ତଥାପି ସମୁଦ୍ରର ତାପମାତ୍ରା ଅଧିକ ଥାଏ । ଫଳରେ ସମୁଦ୍ରରେ ଲଘୁଚାପ ସୃଷ୍ଟି ହୁଏ । ଏହି କାରଣରୁ ଅକ୍ଟୋବର ମାସରେ ହିଁ ବଙ୍ଗୋପସାଗରରେ ଅଧିକାଂଶ ବାତ୍ୟା ଆସିଥାଏ । ପୂର୍ବରୁ ୧୯୯୯ରେ ମହାବାତ୍ୟା, ୨୦୧୩ରେ ଫାଇଲିନ, ୨୦୧୪ରେ ହୁଡହୁଡ ଓ ୨୦୧୮ରେ ତିତିଲି ବାତ୍ୟା ଏହି ମାସରେ ହିଁ ଆସିଥିଲା ।