ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ନାମଲେଖା: ଫେବ୍ରୁଆରି ୭ ଯାଏଁ ଅନଲାଇନ୍‌ ଆବେଦନ 

ଭୁବନେଶ୍ବର/କୋରାପୁଟ: ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟରେ ନ୍ୟାସନାଲ ଟେଷ୍ଟିଂ ଏଜେନ୍ସି (ଏନଟିଏ) ଦ୍ୱାରା ସିୟୁଇଟି (ପିଜି) ୨୦୨୪ ମାଧ୍ୟମରେ ପ୍ରଦାନ କରାଯାଉଥିବା ବିଭିନ୍ନ ସ୍ନାତକୋତ୍ତର ପାଠ୍ୟକ୍ରମରେ ନାମଲେଖା ପାଇଁ ଅନଲାଇନ୍ ଆବେଦନ ଫର୍ମ ଦାଖଲର ଶେଷ ତାରିଖ ଆସନ୍ତା ୭ ତାରିଖ ଯାଏଁ ବୃଦ୍ଧି କରାଯାଇଛି। ଆଶାୟୀ ପ୍ରାର୍ଥୀ ଏବଂ ଅନ୍ୟ ଅଂଶୀଦାରଙ୍କ ଠାରୁ ମିଳିଥିବା ଅନୁରୋଧକୁ ଦୃଷ୍ଟିରେ ରଖି ନ୍ୟାସନାଲ ଟେଷ୍ଟିଂ ଏଜେନ୍ସି (ଏନଟିଏ) ନିକଟରେ ଜାରି ବିଜ୍ଞପ୍ତିରେ ଅନଲାଇନ ଆବେଦନ ଫର୍ମ ଦାଖଲ କରିବାର ଶେଷ ତାରିଖକୁ ୦୭ ଫେବୃଆରୀ ୨୦୨୪ ବୃଦ୍ଧି କରିଛି।

ଅନଲାଇନ୍ ଆବେଦନ ଫର୍ମ ଦାଖଲ: ୨୬ ଡିସେମ୍ବର ୨୦୨୩ରୁ ୦୭ ଫେବ୍ରୁଆରି ୨୦୨୪ (ରାତି ୧୧:୫୦ ପର୍ଯ୍ୟନ୍ତ)
ଫି' ଦାଖଲର ଚୂଡ଼ାନ୍ତ କାରବାର: ୨୬ ଡିସେମ୍ବର ୨୦୨୩ରୁ ୦୮ ଫେବ୍ରୁଆରି ୨୦୨୪ (ରାତି ୧୧:୫୦ ପର୍ଯ୍ୟନ୍ତ)
କମ୍ପ୍ୟୁଟର ଭିତ୍ତିକ ପରୀକ୍ଷା (ସିବିଟି) ମୋଡ୍: ୧୧ ମାର୍ଚ୍ଚ ୨୦୨୪ରୁ ୨୮ ମାର୍ଚ୍ଚ ୨୦୨୪ ପର୍ଯ୍ୟନ୍ତ

ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ସମେତ କେନ୍ଦ୍ରୀୟ ଓ ଅନ୍ୟ ଅଂଶଗ୍ରହଣକାରୀ ବିଶ୍ୱବିଦ୍ୟାଳୟ/ଅନୁଷ୍ଠାନ /ସଂଗଠନ/ସ୍ବୟଂଶାସିତ ମହାବିଦ୍ୟାଳୟଗୁଡ଼ିକରେ ସ୍ନାତକୋତ୍ତର ପାଠ୍ୟକ୍ରମରେ ନାମଲେଖା ପାଇଁ ସାଧାରଣ ବିଶ୍ବବିଦ୍ୟାଳୟ ପ୍ରବେଶିକା ପରୀକ୍ଷା (କମନ ଇଉନିଭର୍ସିଟି ଏନଟ୍ରାନ୍ସ ଟେଷ୍ଟ - ସିୟୁଇଟି) ଆୟୋଜନ କରିବାକୁ ଶିକ୍ଷା ମନ୍ତ୍ରଣାଳୟ ଓ ୟୁଜିସି ପକ୍ଷରୁ ଜାତୀୟ ପରୀକ୍ଷା ଏଜେନ୍ସିକୁ (ନ୍ୟାସନାଲ ଟେସ୍ଟିଂ ଏଜେଂସି- ଏନଟିଏ) ଦାୟୀତ୍ଵ ଦିଆ ଯାଇଛି। ସିୟୁଇଟି (ପିଜି)-୨୦୨୪ ଦେଶର କେନ୍ଦ୍ରୀୟ ବିଶ୍ୱବିଦ୍ୟାଳୟ (ସିୟୁ) କିମ୍ବା ଅନ୍ୟ ଅଂଶଗ୍ରହଣକାରୀ ସଂସ୍ଥା (ରାଜ୍ୟ ବିଶ୍ୱବିଦ୍ୟାଳୟ, ଡିମ୍ଡ ଏବଂ ବେସରକାରୀ ବିଶ୍ୱବିଦ୍ୟାଳୟ ସମେତ) ରେ ପିଜି ପ୍ରୋଗ୍ରାମରେ ନାମ ଲେଖାଇବାକୁ ଚାହୁଁଥିବା ଛାତ୍ରଛାତ୍ରୀମାନଙ୍କୁ ସିଙ୍ଗଲ ୱିଣ୍ଡୋ ସୁଯୋଗ ପ୍ରଦାନ କରିବ । ତେଣୁ ଶେଷ ତାରିଖ ପୂର୍ବରୁ https://pgcuet.samarth.ac.in ୱେବସାଇଟ୍ ଜରିଆରେ ଅନଲାଇନ୍ ଆବେଦନ ଦାଖଲ କରିବାକୁ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ପରୀକ୍ଷା ନିୟନ୍ତ୍ରକ ଡ. ରାକେଶ ଲେଙ୍କା ଅନୁରୋଧ କରିଛନ୍ତି।

ଚଳିତ ଶିକ୍ଷାବର୍ଷରେ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟ ୧୩ଟି ପିଜି ପାଠ୍ୟକ୍ରମ (୨ ବର୍ଷ) ପ୍ରଦାନ କରୁଛି। ଏମାନଙ୍କ ମଧ୍ୟରେ ଓଡ଼ିଆରେ ଏମଏ, ଇଂରାଜୀରେ ଏମଏ, ହିନ୍ଦୀରେ ଏମଏ, ସଂସ୍କୃତରେ ଏମଏ, ନୃବିଜ୍ଞାନରେ ଏମ୍‌ଏସି, ସମାଜବିଜ୍ଞାନରେ ଏମଏ, ଅର୍ଥନୀତିରେ ଏମଏ, ସାମ୍ବାଦିକତା ଓ ଗଣଯୋଗାଯୋଗରେ ଏମଏ, ମାଷ୍ଟର ଅଫ ବିଜନେସ ଆଡମିନିଷ୍ଟ୍ରେସନ (ଏମବିଏ), ଲଜିଷ୍ଟିକ୍ସ ଓ ଯୋଗାଣ ଶୃଙ୍ଖଳା ପରିଚାଳନାରେ ସ୍ନାତକୋତ୍ତର, ପରିସଂଖ୍ୟାନରେ ଏମ୍‌ଏସ୍‌ସି ଏବଂ କମ୍ପ୍ୟୁଟର ବିଜ୍ଞାନରେ ଏମ୍‌ଏସ୍‌ସି ଏବଂ ବ୍ୟାଚେଲର ଅଫ୍ ଏଜୁକେସନ (ବିଏଡ୍)। ଜୈବ ବିବିଧତା ଏବଂ ପ୍ରାକୃତିକ ସମ୍ପଦର ସଂରକ୍ଷଣ ରେ ଏମ୍‌ଏସ୍‌ସି କୁ ଜୀବନ ବିଜ୍ଞାନରେ ପରିଣତ କରାଯିବାର ଯୋଜନା ଅଛି । ଯୋଗ୍ୟତା ମାନଦଣ୍ଡର ବିବରଣୀ ଓଡ଼ିଶା କେନ୍ଦ୍ରୀୟ ବିଶ୍ୱବିଦ୍ୟାଳୟର ୱେବସାଇଟ www.cuo.ac.in ଏବଂ ଏନଟିଏ ୱେବସାଇଟ https://pgcuet.samarth.ac.in ରେ ଉପଲବ୍ଧ ।

କୌଣସି ପ୍ରଶ୍ନ କିମ୍ବା/ ସ୍ପଷ୍ଟୀକରଣ ପାଇଁ, ପ୍ରାର୍ଥୀମାନେ ଏନଟିଏ ହେଲ୍ପ ଡେସ୍କକୁ ୦୧୧୪୦୭୫୯୦୦୦ କିମ୍ବା ସିୟୁଓ ହେଲ୍ପ ଡେସ୍କ ସିୟୁଇଟି ପିଜି ୨୦୨୪ରେ ଫୋନ୍‌ କରିପାରିବେ କିମ୍ବା [email protected] ଏନଟିଏକୁ ଲେଖିପାରିବେ । ପରୀକ୍ଷା ସମ୍ପର୍କିତ ସଦ୍ୟତମ ଅପଡେଟ୍ ପାଇଁ ପରୀକ୍ଷାର୍ଥୀମାନେ ନିୟମିତ ଭାବେ ଏନଟିଏ ୱେବସାଇଟ୍ www.nta.ac.in ଯିବାକୁ ପରାମର୍ଶ ଦିଆଯାଇଛି ବୋଲି ଓଡ଼ିଶା କେନ୍ଦ୍ରୀୟ ବିଶ୍ଵବିଦ୍ୟାଳୟର ଜନସମ୍ପର୍କ ଅଧିକାରୀ ଡ. ଫଗୁନାଥ ଭୋଇ ସୂଚନା ଦେଇଛନ୍ତି।