ପୁଣି ଜୀବନ ନେଲା ଅନ୍‌ଲାଇନ୍‌ ଗେମ୍‌: ୧୭ ଲକ୍ଷ ହରାଇ ଆତ୍ମହତ୍ୟା

ନିରାକାରପୁର: ଅନ୍‌ଲାଇନ୍‌ ଗେମ୍‌ରେ ଟଙ୍କା ହରାଇ ଅନେକ ଯୁବକ ଯୁବତୀ ଆତ୍ମହତ୍ୟା ଉଦ୍ୟମ କରୁଥିବାବେଳେ ଆଜି ଖୋର୍ଦ୍ଧା ଜିଲ୍ଲା ନିରାକାରପୁର ଅଞ୍ଚଳରେ ମଧ୍ୟ ଏଭଳି ଅଘଟଣ ଚର୍ଚ୍ଚାର ବିଷୟ ହୋଇଛି। ମୋବାଇଲ୍‌ ଗେମ୍‌ରେ ୧୭ ଲକ୍ଷ ଟଙ୍କା ହରାଇ ଜଙ୍କିଆ ଥାନା ଅନ୍ତର୍ଗତ ମଳିପଡ଼ା ମଝିସାହିର ସଞ୍ଜୟ କୁମାର ମହାରଥୀ (୨୭) ଆତ୍ମହତ୍ୟା କରିଛନ୍ତି। ଏ ନେଇ ପୁଲିସ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି। ଖୋର୍ଦ୍ଧା ମୁଖ୍ୟ ଚିକିତ୍ସାଳୟରେ ସଞ୍ଜୟଙ୍କ ଶବ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଥିବା ଥାନା ଅଧିକାରୀ ସୁଶାନ୍ତ କୁମାର ବେହେରା ସୂଚନା ଦେଇଛନ୍ତି। 

ସଞ୍ଜୟ ଅନ୍‌ଲାଇନ୍‌ ଗେମ୍‌ରେ ଗତ କିଛି ଦିନ ମଧ୍ୟରେ ବିପୁଳ ଟଙ୍କା ହରାଇବା ପରେ ଏଭଳି ପଦକ୍ଷେପ ନେଇଥିବା ପୁଲିସ ପ୍ରାଥମିକ ଅନୁସନ୍ଧାନରୁ ଜାଣିବାକୁ ପାଇଛି। ବିଭିନ୍ନ ସୂତ୍ରରୁ ୧୭ ଲକ୍ଷ ଟଙ୍କା ସଂଗ୍ରହ କରି ସେ ଅନ୍‌ଲାଇନ୍ ଜୁଆ ଖେଳରେ ଲଗାଇଥିଲେ। କିନ୍ତୁ ହାରିଯିବା ଫଳରେ ସମସ୍ତ ଟଙ୍କା ବୁଡ଼ିଯାଇଥିଲା। ଏହାକୁ ନେଇ ସଞ୍ଜୟ ଗତ କିଛି ଦିନ ହେଲା ଗଭୀର ମାନସିକ ଚାପରେ ଥିଲେ। ଆଜି ସକାଳୁ ସେ ନିଜ କୋଠରିରେ ଫ୍ୟାନ୍‌ରେ ରଶି ଲଗାଇ ଝୁଲି ପଡ଼ିଥିଲେ ବୋଲି ତାଙ୍କର ଜଣେ ସମ୍ପର୍କୀୟ କହିଛନ୍ତି। ସକାଳୁ ସଞ୍ଜୟଙ୍କୁ ଝୁଲନ୍ତା ଅବସ୍ଥାରେ ଉଦ୍ଧାର କରି ପରିବାର ଲୋକେ ଖୋର୍ଦ୍ଧା ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଖବର ପାଇ ଜଙ୍କିଆ ଥାନା ପୁଲିସ ମୃତଦେହ ଜବତ କରିବା ସହ ମାମଲା ରୁଜୁ କରିଛି। ମୃତ ସଞ୍ଜୟ ବ୍ୟବସାୟ କରୁଥିଲେ। କ୍ରୀଡ଼ା କ୍ଷେତ୍ରରେ ମଧ୍ୟ ତାଙ୍କର ସୁନାମ ଥିଲା।