ଭୁବନେଶ୍ବର: ସ୍ଥାନ ବିଧାନସୌଧର ପୋର୍ଟିକୋ। ଓହ୍ଲାଇଲେ ବିରୋଧୀ ଦଳ ନେତା ନବୀନ ପଟ୍ଟନାୟକ। ପାଛୋଟି ନେବାକୁ ଅପେକ୍ଷା କରିଥିଲେ ଦଳୀୟ ବିଧାୟକମାନେ। ଗାଡ଼ିରୁ ଓହ୍ଲାଇ ଫାଟକ ନିକଟକୁ ଦୁଇ ପାଦ ବଢ଼ାଇଲା ବେଳେ ନଜରରେ ପଡ଼ିଗଲେ ଚମ୍ପୁଆ ବିଧାୟକ ସନାତନ ମହାକୁଡ଼। ନବୀନ ସିଧା ପଚାରିଲେ, ‘କାଲି ବିଧାୟକ ଦଳ ବୈଠକକୁ କାହିଁକି ଆସିଲନି?’ ସନାଙ୍କ ଉତ୍ତର ଥିଲା, ‘ସାର୍ ଦେହ ଖରାପ ଥିଲା।’ ନବୀନ ଠିକ୍ ଭାବେ ଶୁଣି ନପାରି ଆଉ ଥରେ ସମାନ ପ୍ରଶ୍ନ ପଚାରିଲେ। ନିକଟରେ ଥିବା ବିଧାୟକ ଶାରଦା ଜେନା କହିଲେ, ‘ସାର୍ ତାଙ୍କ ଦେହ ଖରାପ ଥିଲା।’ ନବୀନ ଆଉ ପାଦେ ଆଗକୁ ଗଲା ବେଳେ ପୁଣି ତାଗିଦ୍ କଲା ପରି ପଚାରିଲେ, ‘ବିଜେପି ଆଡ଼କୁ ଯାଉଛନ୍ତି କି?’ ସନା କିଛି ଉତ୍ତର ଦେଇ ନଥିଲେ। ଏହା ପରେ ନବୀନ ଭିତରକୁ ପଶିଗଲେ। 

Advertisment

ସନାଙ୍କ ଉଦ୍ଦେଶ୍ୟରେ ନବୀନଙ୍କର ଏହି ଦୁଇଟି ପ୍ରଶ୍ନ ବିଜେଡି ରାଜନୀତିରେ ହଟଚମଟ ସୃଷ୍ଟି କରିଛି। କିଛି ଦିନ ହେଲା ବରିଷ୍ଠ ଓ ଯୁବ ନେତାମାନଙ୍କୁ ଫୋନ୍ କରି ମେଳି ନକରିବାକୁ ନବୀନ ତାଗିଦ୍ କରୁଛନ୍ତି। ଏହାକୁ ନେଇ ଦଳର ଆଭ୍ୟନ୍ତରୀଣ ରାଜନୀତି ସରଗରମ ହୋଇଥିଲା ବେଳେ ଏବେ ନବୀନଙ୍କ ଆଉ ଏକ ଅବତାର ଆଜି ଦେଖିବାକୁ ମିଳିଛି। ସର୍ବସାଧାରଣରେ ନବୀନ ଏମିତି ଢଙ୍ଗରେ କୌଣସି ନେତାଙ୍କୁ ପ୍ରଶ୍ନ କରିବାର କେବେ ଦେଖାଯାଇ ନାହିଁ। ଏପରିକି ବିଧାୟକମାନଙ୍କୁ ଆଡ଼ ଆଖିରେ ନ ଚାହିଁ ସେ ସିଧା ଚାଲିଯାଆନ୍ତି। କିନ୍ତୁ ଆଜି ଗଣମାଧ୍ୟମ ପ୍ରତିନିଧି ସେଠାରେ କ୍ୟାମେରା ପକାଇଥିଲେ ବି ନବୀନ ଅଟକିଯାଇ ସନାଙ୍କୁ ପ୍ରଶ୍ନ କରିବା ସମସ୍ତଙ୍କୁ ତାଜୁବ୍ କରିଥିଲା।  ଏପରି ଆଭିମୁଖ୍ୟ ଦେଖାଇ କି ବାର୍ତ୍ତା ଦେବାକୁ ଚାହୁଛନ୍ତି ବୋଲି ଦଳୀୟ ମହଲରେ ତର୍ଜମା ଚାଲିଛି। ଗୋଟିଏ ଗୋଷ୍ଠୀର ମତ ଯେ ନବୀନ ନିଜକୁ ସକ୍ରିୟ କରିବା ସହ ସବୁ ଘଟଣା ଉପରେ ନଜର ରଖୁଛନ୍ତି।

ଦଳୀୟ ମହଲରେ ହଟଚମଟ

ଦଳ ତାଙ୍କ ନେତୃତ୍ବରେ ପୁଣି ଭଲ ପ୍ରଦର୍ଶନ କରିବ। କିନ୍ତୁ ଅନ୍ୟ ଗୋଷ୍ଠୀ କହିବା କଥା ଏହା ଦ୍ବାରା ବାହାରକୁ ନକରାତ୍ମକ ବାର୍ତ୍ତା ଯାଉଛି। ନବୀନ ନିଜ ଛାଇକୁ ଡରିବା ଆରମ୍ଭ କଲେଣି; ଆଜି ଖୋଲାଖୋଲି ଭାବେ ସ୍ପଷ୍ଟ ହୋଇଗଲା। ପୁଣି ଗଣମାଧ୍ୟମ କ୍ୟାମେରା ସାମ୍ନାରେ ନବୀନ ଏମିତି ପ୍ରଶ୍ନ କରି ନିଜେ ହିଁ ଆଲୋଚନାର ଖୋରାକ ଯୋଗାଇ ଦେଲେ। ତେବେ ଆଉ ଏକ ରୋଚକ ବିଷୟ ହେଲା, ନବୀନ ଏକଥା ପଚାରିବାର କିଛି ସମୟ ମଧ୍ୟରେ ସନାତନ ମୁଖ୍ୟମନ୍ତ୍ରୀଙ୍କୁ ଭେଟିବା ପାଇଁ ତାଙ୍କ ଚାମ୍ବରକୁ ଯାଇଥିଲେ। ତେବେ ମୁଖ୍ୟମନ୍ତ୍ରୀ ଭିତରେ କାର୍ଯ୍ୟବ୍ୟସ୍ତ ଥିବାରୁ ସେ କିଛି ସମୟ ପରେ ଆସିବି କହି ଫେରିଯାଇଥିଲେ। କିନ୍ତୁ ସନାତନ ଗଣମାଧ୍ୟମକୁ କହିଛନ୍ତି ଯେ ମୁଁ ବିଜେଡି ସହିତ ଅଛି ଓ ରହିବି। ମୁଁ ଦଳ ଠାରୁ ଦୂରେଇ ଯାଇନି। ଜିଲ୍ଲାର ବିକାଶ ପାଇଁ ମୁଖ୍ୟମନ୍ତ୍ରୀଙ୍କ ପାଖକୁ ଯାଉଛୁ ଓ ଆଲୋଚନା କରୁଛୁ। ସେ ପୂରା ରାଜ୍ୟର ମୁଖ୍ୟମନ୍ତ୍ରୀ। ସେ କେବଳ ବିଜେପିର ମୁଖ୍ୟମନ୍ତ୍ରୀ ନୁହନ୍ତି। ଦଳୀୟ ବୈଠକକୁ କାହିଁକି ଯାଇ ନଥିଲି ବୋଲି ନବୀନ ପଟ୍ଟନାୟକ ପଚାରିଥିଲେ। ସେ ଦଳର ମୁରବି। ପଚାରିବାର ଅଧିକାର ତାଙ୍କର ଅଛି। ଅସୁସ୍ଥତା ହେତୁ ଯୋଗ ଦେଇପାରିଲିନି ବୋଲି କହିଥିଲି। ବିଜେପିକୁ ଯାଉଛନ୍ତି କି ବୋଲି ସେ ପଚାରି ନାହାନ୍ତି।   

ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ କହିଛନ୍ତି, ଦଳର ମୁରବି ଜଣେ ବିଧାୟକଙ୍କୁ ପଚାରିବାରେ ଅସୁବିଧା କ’ଣ? ଏହାକୁ ଗଣମାଧ୍ୟମ ରାଜନୈତିକ ରଙ୍ଗ ଦେଉଛି। ସେ ବିଜେପି ଯିବା କଥା ପଚାରି ନାହାନ୍ତି। ବିଜେପି ସହ କେହି ବିଧାୟକ ଯୋଗାଯୋଗରେ ନାହାନ୍ତି। ଆଜିର ଘଟଣାକୁ ନେଇ ବିଜେପିର ବରିଷ୍ଠ ବିଧାୟକ ଜୟନାରାୟଣ ମିଶ୍ର ପୁଣି ବିଜେଡିକୁ ତାଚ୍ଛଲ୍ୟ କରିଛନ୍ତି। ସେ କହିଛନ୍ତି, କାଳେ ସବୁ ବିଜେପିକୁ ପଳାଇବେ ସେହି କଥା ଭାବି ନବୀନ ଭୟଭୀତ ହୋଇଗଲେଣି। ଯେଉଁଦିନ ବିଜେପିର କେନ୍ଦ୍ରୀୟ ନେତୃତ୍ୱ ଚାହିଁବେ, ସେହିଦିନ ବିଜେଡି ଖଣ୍ଡ ଖଣ୍ଡ ହୋଇଯିବ। ମୁଁ ଆଗରୁ ବି କହିଥିଲି, ହୁଇସିଲ୍ ଫୁଙ୍କିଲେ ବିଜେଡି ଭାଙ୍ଗିଯିବ। ଏତେ ବର୍ଷ ଧରି ନବୀନ ବାବୁ କିଛି ବୁଝୁ ନଥିଲେ। କିନ୍ତୁ ରାଜୁତି କରୁଥିଲେ। ଏହା ତା’ର ଫଳ।