ଭାରତମାଳା ପରିଯୋଜନାକୁ ବିରୋଧ: ଜମିହରାଙ୍କୁ ଉଚିତ ଦର ନମିଳିଲେ ରକ୍ତପାତ
କୋରାପୁଟ: ଭାରତମାଳା ପରିଯୋଜନା ସାଧାରଣ ଲୋକ ତଥା ଗରିବ ଲୋକଙ୍କ ପାଇଁ ନାହିଁ । ଯଦି ଜମିହରାଙ୍କୁ ଉଚିତ ଦର ମିଳିବନି ତ ରକ୍ତପାତ ହେବ । ଏହିଠାରେ କାମ କରିବାକୁ ଦିଆଯିବ ନି । ଭାରତମାଳା ପରିଯୋଜନା ପାଇଁ ଉପଯୁକ୍ତ କ୍ଷତିପୂରଣ ନ ମିଳିଲେ ସଡକ ପାଇଁ ଜମି ଦିଆଯିବ ନାହିଁ ବୋଲି କହିଛନ୍ତି ଜୟପୁର ବିଧାୟକ ତଥା ଜମିହରା ମଞ୍ଚର ସଭାପତି ତାରାପ୍ରସାଦ ବାହିନିପତି ।
Sambad is now on WhatsApp
Join and get latest news updates delivered to you via WhatsApp
କୋରାପୁଟ ଦେଇ ରାୟପୁରରୁ ବିଶାଖାପାଟଣା କୁ ମାତ୍ର ସାତ ଘଣ୍ଟାରେ ଯାତ୍ରା କରିବା ପାଇଁ ଭାରତମାଳା ସଡକ ଯୋଜନା କରାଯାଇଥିବା ବେଳେ ଉପଯୁକ୍ତ ଥଇଥାନ ଦାବିରେ ଜମିହରା ଓ ଚାଷୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଛି । ସୋମବାର ଡୁମୁରିପୁଟ ଠାରେ ଏହି ଯୋଜନାରେ ଜମିହରାଙ୍କୁ ନେଇ ଏକ ଜିଲ୍ଲାସ୍ତରୀୟ ବୈଠକ ଆୟୋଜିତ ହୋଇଯାଇଛି ।
ଏହି ଯୋଜନାରେ ଜମିହରାଙ୍କୁ ଉପଯୁକ୍ତ ନ୍ୟାୟ ମିଳୁନଥିବା ଅଭିଯୋଗ କରି ଏ ସମ୍ପର୍କରେ ଆଗକୁ ଆନ୍ଦୋଳନ ତୀବ୍ରତର କରାଯିବ ବୋଲି ନିଷ୍ପତ୍ତି ନିଆଯିବା ସହ ଜୟପୁର ବିଧାୟକ ଶ୍ରୀ ବାହିନୀପତିଙ୍କ ଅଧ୍ୟକ୍ଷତାରେ ଏକ କମିଟି ଗଠନ କରାଯାଇଛି ।ଏଥିରେ ଚାରିଟି ବ୍ଲକର ଜମିହରା ଓ ଚାଷୀ ଯୋଗ ଦେଇଥିଲେ। ଉପଯୁକ୍ତ କ୍ଷତିପୂରଣ ନ ମିଳିଲେ ସଡକ ପାଇଁ ଜମି ଦିଆଯିବ ନାହିଁ ଓ ଯୋଜନା କାର୍ଯ୍ୟକାରୀ କରିବା ପାଇଁ ଆସୁଥିବା ଅଧିକାରୀଙ୍କୁ ସମ୍ପୁର୍ଣ୍ଣ ରୂପେ ଅସହଯୋଗ କରାଯିବ ବୋଲି ଜମିହରା ସଂଘର ଆବାହକ ଶରତ ବୁରୁଦା ସୂଚନା ଦେଇଛନ୍ତି ।
ବର୍ତ୍ତମାନ ରାୟପୁର ଓ ବିଶାଖାପାଟଣା ମଧ୍ୟରେ ଦୂରତା ୫୧୪ କିଲୋମିଟର ରହିଥିବା ବେଳେ ନୂତନ ଭାବେ ଏନଏଚଏଆଇ ଦ୍ୱାରା ପ୍ରସ୍ତାବିତ ଭାରତମାଳା ସଡକ ଯୋଜନାରେ ଏହା କମିଯାଇ ୪୬୪ କିଲୋମିଟର ହୋଇଯିବ । ଛଅ ଲେନ ସମ୍ପନ୍ନ ଏହି ରାସ୍ତାରେ ଗାଡ଼ିଗୁଡିକର ହାରାହାରି ସର୍ବନିମ୍ନ ବେଗ ଘଣ୍ଟାକୁ ୭୦ କିଲୋମିଟର ରହିଛି ଯାହାକି ବର୍ତ୍ତମାନର ହାରାହାରି ବେଗ ଠାରୁ ପ୍ରାୟ ଦୁଇଗୁଣ ରହିଛି । ଏହି ସଡକ ଛତିଶଗଡ଼ ରାଜ୍ୟରେ ୧୨୪.୬୬୧ କିଲୋମିଟର ଅତିକ୍ରମ କରି ଓଡ଼ିଶାର ନବରଙ୍ଗପୁର ଜିଲ୍ଲାରେ ପ୍ରବେଶ କରିବ । ନବରଙ୍ଗପୁର ଜିଲ୍ଲାରେ ୧୧୪.୯୮୯ କିଲୋମିଟର ରାସ୍ତା ଅତିକ୍ରମ କରି କୋରାପୁଟ ଜିଲ୍ଲାର ବୋରିଗୁମ୍ମା, ଦଶମନ୍ତପୁର, କୋରାପୁଟ, ସେମିଳିଗୁଡା ଓ ପଟ୍ଟାଙ୍ଗି ତହସିଲ ବାଟ ଦେଇ ଆନ୍ଧ୍ରପ୍ରଦେଶ ମଧ୍ୟକୁ ପ୍ରବେଶ କରିବାର ଯୋଜନା ରହିଛି ।