ଓଡ଼ିଆ ଝିଅ ଜିଣିଲେ ମିସେସ୍ ବ୍ୟୁଟିଫୁଲ୍ ସ୍ମାଇଲ ଟାଇଟଲ

ଯାଜପୁର : ଓଡ଼ିଆ ଝିଅ ପ୍ରଜ୍ଞା ପାରମିତା ସିଂହ ଦିଲ୍ଲୀରେ ଆୟୋଜିତ ମିସେସ୍ କୁଇନ ଅଫ୍ ଇଣ୍ଡିଆ ପ୍ରତିଯୋଗିିତାରେ ଭାଗନେଇ ‌ମିସେସ ବ୍ୟୁଟିଫୁଲ୍ ସ୍ମାଇଲ ଟାଇଟଲ ହାସଲ କରିପାରିଛନ୍ତି।

ପ୍ରଜ୍ଞାଙ୍କ ଘର କେନ୍ଦ୍ରାପଡ଼ା ଜିଲ୍ଲା ଡେରାବିଶିରେ ହୋଇଥିବାବେଳେ ସଂପ୍ରତି ସେ ଦିଲ୍ଲୀରେ ତାଙ୍କ ସ୍ବାମୀ ଓ ଦୁଇ ପୁଅଙ୍କ ସହିତ ରହୁଛନ୍ତି। ଫେବ୍ରୁଆରି ୪ ତାରିଖରୁ ୭ ତାରିଖ ପର୍ଯ୍ୟନ୍ତ ଦିଲ୍ଲୀର ହୋଟେଲ ସୂରିୟାରେ ଗ୍ଲୋବାଲ ପ୍ୟାଜେଣ୍ଟ ପକ୍ଷରୁ ଆୟୋଜିତ ଏହି ପ୍ରତିଯୋଗିତାରେ ଭାଗ ନେଇ ସେ ଭାରତବର୍ଷର ବିଭିନ୍ନ ରାଜ୍ୟରୁ ଆସିଥିବା ପ୍ରତିଯୋଗୀମାନଙ୍କୁ ପଛରେ ପକାଇବାକୁ ସକ୍ଷମ ହୋଇଥିଲେ।

ପ୍ରତିଯୋଗିତାର ବିଭିନ୍ନ ରାଉଣ୍ଡ ଯଥା-କଷ୍ଟ୍ୟୁମ୍ ରାଉଣ୍ଡ, ଟ୍ୟାଲେଣ୍ଟ ରାଉଣ୍ଡ, ଶାଢ଼ି ରାଉଣ୍ଡ ଆଦି ଅନୁଷ୍ଠିତ ହୋଇଥିଲା। ଏହି ପ୍ରତିଯୋଗିତାରେ ପ୍ରଜ୍ଞା ଓଡ଼ିଶାର କଳା, ସଂସ୍କୃତି, ପରମ୍ପରା ଓ ହସ୍ତତନ୍ତ ସଂପର୍କରେ ବିଶଦ ଭାବରେ ଉପସ୍ଥାପିତ କରି ଜୁରିମାନଙ୍କ ମନ ଜିଣିବାରେ ସକ୍ଷମ ହୋଇଥିଲେ।

ପ୍ରଜ୍ଞା ଜଣେ ସୁଗୃହିଣୀ ହୋଇଥିବା ବେଳେ ତାଙ୍କ ସ୍ବାମୀ ଜଣେ ଆର୍ମି ଅଫିସର। ‘ସମ୍ବାଦ’ର ବରିଷ୍ଠ ଜିଲ୍ଲା ପ୍ରତିନିଧି ସଂଗ୍ରାମ ସିଂହଙ୍କର ସେ ଭାଣିଜୀ।