ଗୋଠଛଡ଼ା ଦନ୍ତାର ଉପଦ୍ରବ

ତେଲକୋଇ: କେନ୍ଦୁଝର ଜିଲ୍ଲା ତେଲକୋଇ ବ୍ଲକ୍‌ର ବିଭିନ୍ନ ଗ୍ରାମରେ ପଶି ଏକ ଗୋଠଛଡ଼ା ଦନ୍ତାହାତୀ ଉତ୍ପାତ କରୁଛି। ଘରଦ୍ବାର ଭାଙ୍ଗିବା ସହିତ ଧାନ, ଚାଉଳ, ପନିପରିବା ଚାଷ ନଷ୍ଟ କରୁଛି। ଶନିବାର ରାତିରେ ଖୁଣ୍ଟାପଡ଼ା ପଞ୍ଚାୟତ ଦୁର୍ଲ୍ଲଭପୁର ଗ୍ରାମରେ ପଶି ଜଟିଆ ବିଶ୍ବାଳ, ତପନ କୁମାର ସାହୁ, ପ୍ରହଲ୍ଲାଦ ପରିଡ଼ା, ପ୍ରସନ୍ନ ପରିଡ଼ାଙ୍କ ଘର ଭାଙ୍ଗି ଧାନଚାଉଳ ଖାଇଛି।

କୋବି ବଗିଚାରେ ପଶି ମାଡ଼ିଦଳି ଫସଲ ନଷ୍ଟ କରିଦେଇଛି। ସଞ୍ଜ ନଇଁବା ମାତ୍ରେ ଦନ୍ତାଟି ଗାଁ ମୁହାଁ ହେଉଛି। ମଣିଷ ଦେଖିଲେ ମାରିବାକୁ ଗୋଡ଼ାଉଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ବନ ବିଭାଗ ଦନ୍ତାହାତୀକୁ ଅନ୍ୟତ୍ର ଘଉଡ଼ାଇବା ସହିତ କ୍ଷତିଗ୍ରସ୍ତ ପରିବାରକୁ ସରକାରୀ ସହାୟତା ଯୋଗାଇଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।