ମରୁଡ଼ି ପରେ ଧୋଇଗଲା ଚାଷଜମି, ଜଳସେଚନ ନାହିଁ କି ଜଳ ନିଷ୍କାସନ
ଯାଜପୁର/ଦଶରଥପୁର : ଅନିୟମିତ ବର୍ଷା ଯୋଗୁଁ ମରୁଡ଼ି ପରିସ୍ଥିତି ସୃଷ୍ଟି ହୋଇଥିଲା। ଏବେ ପ୍ରବଳ ବର୍ଷା ପରେ ବନ୍ୟା ହୋଇ ଚାଷଜମି ପାଣିରେ ବୁଡ଼ିଛି। ଯାହା କିଛି ଫସଲ ଆଶା କରାଯାଉଥିଲା ସେତକ ମଧ୍ୟ ଧୋଇଗଲା। ଏଥିସହ ଜିଲ୍ଲାର ଜଳସେଚନ ଏବଂ ଜଳ ନିଷ୍କାସନର ବିଫଳ ବ୍ୟବସ୍ଥା ପୁଣିଥିରେ ପଦାରେ ପଡ଼ିଗଲା। ଜଳସେଚନ ଓ ଜଳ ନିଷ୍କାସନ ପାଇଁ ପ୍ରତିବର୍ଷ ଶହ ଶହ କୋଟି ଟଙ୍କା ଅନୁଦାନ ବ୍ୟୟ ହେଉଥିଲେ ମଧ୍ୟ ଚାଷୀଙ୍କୁ ଫାଇଦା ମିଳୁନି। ଯାଜପୁର ଭଳି କୃଷି ସମୃଦ୍ଧ ଜିଲ୍ଲାରେ କୃଷିନୀତି ଏକ ପ୍ରକାର ଦିଗହରା ହୋଇଯାଇଛି।
Sambad is now on WhatsApp
Join and get latest news updates delivered to you via WhatsApp
ଯାଜପୁର ଜିଲ୍ଲାକୁ ବୈତରଣୀ, ବ୍ରାହ୍ମଣୀ ଓ ମହାନଦୀର ଶାଖା ନଦୀଗୁଡ଼ିକ ଜାଲ ପରି ଘେରି ରହିଥିବା ସତ୍ତ୍ବେ ସମସ୍ତ ଜମିକୁ ଜଳସେଚନ ବ୍ୟବସ୍ଥା ହୋଇପାରିଲା ନାହିଁ। ଏପରିକି ଇଂରେଜ ଅମଳରୁ କେନାଲରେ ଯେତିକି ଜଳସେଚନ ବ୍ୟବସ୍ଥା ହୋଇଥିଲା ତାହାଠାରୁ ଇଞ୍ଚେ ଅଧିକ ଜମିକୁ ଜଳସେଚନ ହୋଇପାରି ନାହିଁ ବୋଲି ଜଣେ ନିର୍ବାହୀ ଯନ୍ତ୍ରୀ ଖୋଲାଖୋଲି ଭାବେ ସ୍ବୀକାର କରିଛନ୍ତି। ଜିଲ୍ଲାର ମୋଟ ୧ଲକ୍ଷ ୪୫ହଜାର ୪୫୦ହେକ୍ଟର ଚାଷ ଜମି ମଧ୍ୟରୁ ୬୮ହଜାର ୭୪୮ହେକ୍ଟର ଜଳସେଚିତ ବୋଲି କାଗଜପତ୍ରରେ ଦର୍ଶାଉଥିବା ବେଳେ ୬୦ଭାଗ ମରୁଡ଼ି କବଳିତ ହୋଇଥିବାର ବେସରକାରୀ ଭାବେ କୁହାଯାଉଥିଲା। ମାତ୍ର ଚଳିତ ମାସ ଲଘୁଚାପ ଜନିତ ଲଗାଣ ବର୍ଷା ପରେ ବୈତରଣୀ ଓ ବ୍ରାହ୍ମଣୀ ନଦୀରେ ବନ୍ୟା ଆସି ଜିଲ୍ଲାର ୩୮ହଜାର ୯୧୫ହେକ୍ଟର ଚାଷ ଜମିକୁ ବୁଡାଇ ଦେଇଛି ବୋଲି ଜିଲ୍ଲା ପ୍ରଶାସନ ସରକାରଙ୍କୁ ଜଣାଇଛନ୍ତି। ବର୍ଷା ଅଭାବରୁ ମରୁଡି ଓ ବର୍ଷା ପରେ ଧୋଇ ଘଟଣା ଲକ୍ଷାଧିକ ଚାଷୀଙ୍କ ଜୀବିକାକୁ ପ୍ରଭାବିତ କରିଛି।
ଯାଜପୁର ଜିଲ୍ଲାରେ ଜଳ ନିଷ୍କାସନ ପାଇଁ ଡ୍ରେନେଜ ଡିଭିଜନ୍, ଜଳସେଚନ ପାଇଁ ଯାଜପୁର ଓ ଜାରକା ଡିଭିଜନ ସହିତ କେନ୍ଦ୍ରାପଡ଼ା ଡିଭିଜନ(ଆଶିଂକ) କାମ କରୁଛି। ଏହି ଡିଭିଜନ୍ରେ ରାସ୍ତାଘାଟ, ବନ୍ଧବାଡ଼ ଓ ପୋଲ ନିର୍ମାଣ କରି ଠିକାଦାରଙ୍କ ସ୍ବାର୍ଥ ପାଇଁ କୋଟିକୋଟି ଟଙ୍କା ବ୍ୟୟ ହୋଇ ଚାଲିଛି। ଅଥଚ ଦଶରଥପୁର ବ୍ଲକର ୧୩ଟି ପଞ୍ଚାୟତର ପ୍ରାୟ ୫ହଜାର ହେକ୍ଟର ଚାଷ ଜମିକୁ ନିୟମିତ ନଦୀ ମୁହଁରେ ଛାଡ଼ି ଦିଆଯାଉଛି। ଜିଲ୍ଲାରେ ଜଳସେଚନ ବ୍ୟବସ୍ଥା ବିଫଳ ଭଳି ଜଳ ନିଷ୍କାସନ ପାଇଁ କାମ କରୁଥିବା ଯାଜପୁର ଡ୍ରେନେଜ ଡିଭିଜନ୍ ମଧ୍ୟ ଫେଲ୍ ମାରିଛି। ହଜାର ହେକ୍ଟର ଚାଷ ଜମିରୁ ଏ ଯାଏଁ ପାଣି ନିଷ୍କାସନ ହୋଇପାରୁ ନାହିଁ। ଦଶରଥପୁର ବ୍ଲକ୍ ଭଳି ସମଗ୍ର ଜିଲ୍ଲାରେ ଏଭଳି ଅବସ୍ଥା ଲାଗି ରହିଛି।