ବରଗଡ଼/ପାଇକମାଳ/ପଦ୍ମପୁର: ପଦ୍ମପୁର ଉପନିର୍ବାଚନ ପାଇଁ ରବିବାର ପ୍ରଚାରକୁ ଆସିଥିବା କେନ୍ଦ୍ର ରେଳମନ୍ତ୍ରୀ ଅଶ୍ବିନୀ ବୈଷ୍ଣବ ଏବଂ କୃଷିମନ୍ତ୍ରୀ ନରେନ୍ଦ୍ର ସିଂ ତୋମାର ରାଜ୍ୟ ସରକାରଙ୍କ ଉପରେ ବର୍ଷିଛନ୍ତି। କେନ୍ଦ୍ରମନ୍ତ୍ରୀ ଶ୍ରୀ ବୈଷ୍ଣବ ସିଧା ବରଗଡ଼-ନୂଆପଡ଼ା ରେଳ ଲାଇନ୍ (ଭାୟା ପଦ୍ମପୁର, ପାଇକମାଳ) ପ୍ରସଂଗ ଉଠାଇ ଏହା ଉପରେ ମନ୍ତ୍ରୀ ଟୁକୁନି ସାହୁ ଏବଂ ପୂର୍ବତନ ସାଂସଦ ପ୍ରସନ୍ନ ଆଚାର୍ଯ୍ୟ ଦେଇଥିବା ଟିପ୍ପଣୀ ବିଭ୍ରାନ୍ତିକର ବୋଲି କହିଥିଲେ। ମନ୍ତ୍ରୀ କହିଲେ, ରାଜ୍ୟ ସରକାର ଆଜି ଜମି ଦେଲେ କାଲିଠୁ ରେଳ ଲାଇନ୍ କାମ ଆରମ୍ଭ ହେବ। କିନ୍ତୁ ବିଜେଡି ସରକାର ଜମି ଦେବା ବଦଳରେ କେନ୍ଦ୍ର ମୁଣ୍ଡରେ ଦୋଷ ଲଦିବାକୁ ଚେଷ୍ଟା କରୁଛି। ମୋଦୀ ସରକାର ଏବେ ଓଡ଼ିଶାକୁ ରେଳ ବଜେଟ୍ରେ ୧୦ ହଜାର କୋଟି ଟଙ୍କା ଦେଇଛି, ଯାହାକି ଐତିହାସିକ। ପ୍ରସ୍ତାବିତ ବରଗଡ଼-ନୂଆପଡ଼ା ରେଳ ଲାଇନ୍ ନେଇ ମୋଦୀ ସରକାର ଓ ରେଳ ମନ୍ତ୍ରଣାଳୟର ସଂପୂର୍ଣ୍ଣ ସହମତି ରହିଥିଲା। ସେହି ହିସାବରେ ପଦକ୍ଷେପ ବି ନିଆ ଯାଇଛି। କେବଳ ଜମି ମିଳିଲେ କାମ ଆରମ୍ଭ ହେବ ବୋଲି ମନ୍ତ୍ରୀ ଶ୍ରୀ ବୈଷ୍ଣବ କହିଥିଲେ। ଯଦି ରାଜ୍ୟ ସରକାର ସହଯୋଗ କରିବେ ତେବେ ଓଡ଼ିଶାର ବିକାଶ ପାଇଁ କିଛି ସମସ୍ୟା ନାହିଁ। ଏଠାକାର ବିକାଶ କେବଳ ଡବଲ୍ ଇଞ୍ଜିନ୍ ହେଲେ ତ୍ବରାନ୍ବିତ ହେବ ବୋଲି ସେ ମତ ଦେଇଥିଲେ।
Sambad is now on WhatsApp
Join and get latest news updates delivered to you via WhatsApp
କେନ୍ଦ୍ର କୃଷି ମନ୍ତ୍ରୀ ଶ୍ରୀ ତୋମାର ପ୍ରଧାନମନ୍ତ୍ରୀ ଫସଲ ବୀମା ପ୍ରସଂଗ ଉଠାଇ ସିଧାସଳଖ ରାଜ୍ୟ ସରକାରଙ୍କୁ ଟାର୍ଗେଟ୍ କରିଥିଲେ। ଏହି ଯୋଜନାରେ କେନ୍ଦ୍ର ସରକାର ନିଜ ସମସ୍ତ ଭାଗର ସମସ୍ତ ଦେୟ ଠିକଣା ସମୟରେ ଜମା କରି ସାରିଛନ୍ତି। କିନ୍ତୁ ଓଡ଼ିଶା ସରକାର ଘରୋଇ କମ୍ପାନିକୁ ପୂରାଇ ମାମଲାକୁ ବିଳମ୍ବିତ କରିଛନ୍ତି। ୫ ବର୍ଷ ମଧ୍ୟରେ ସାରା ଦେଶରେ ୧ ଲକ୍ଷ ୨୪ ହଜାର କୋଟି ବୀମା କ୍ଷତିପୂରଣ ପ୍ରଦାନ କରା ଯାଇଥିବାବେଳେ ପଦ୍ମପୁର ଚାଷୀ ଏହା ପାଇବାରେ ବିଳମ୍ବ ପାଇଁ କେବଳ ରାଜ୍ୟ ସରକାର ହିଁ ଦାୟୀ ବୋଲି କହିଥିଲେ। ବୀମା କମ୍ପାନି ଉପରେ ରାଜ୍ୟର ଅହେତୁକ ଅନୁକମ୍ପା କାରଣରୁ ଚାଷୀ ହଇରାଣ ହେଉଥିବା ସେ କହିଥିଲେ। ଅନ୍ୟ ପକ୍ଷରେ ବିଧାୟକ ପ୍ରାର୍ଥୀ ପ୍ରଦୀପ ପୁରୋହିତଙ୍କ ପାଇଁ ଭୋଟ୍ ଭିକ୍ଷା କରି ସେ ତାଙ୍କୁ ନିଜ ମାଟି ପାଇଁ ସଦା ତତ୍ପର ଜଣେ ଲଢ଼ୁଆ ନେତାର ଆଖ୍ୟା ଦେଇଥିଲେ।
ପାଇକମାଳ ହାଇସ୍କୁଲ ପଡ଼ିଆ ଓ ପଦ୍ମପୁରଠାରେ ଅନୁଷ୍ଠିତ ନିର୍ବାଚନୀ ସଭାରେ ବିଜେପି ଓଡ଼ିଶା ପ୍ରଭାରୀ ଜି ପୁରନ୍ଦରେଶ୍ବରୀ, ରାଜ୍ୟ ବିଜେପି ସଭାପତି ସମୀର ମହାନ୍ତି, ବିରୋଧୀ ଦଳ ନେତା ଜୟନାରାୟଣ ମିଶ୍ର, ବାଲେଶ୍ବର ସାଂସଦ ପ୍ରତାପ ଷଡ଼ଙ୍ଗୀ, ବରଗଡ଼ ସାଂସଦ ସୁରେଶ ପୂଜାରୀ, କଳାହାଣ୍ତି ସାଂସଦ ବସନ୍ତ ପଣ୍ତା, ବଲାଙ୍ଗୀର ସାଂସଦ ସଂଗୀତା ସିଂହଦେଓ, ପୂର୍ବତନମନ୍ତ୍ରୀ କେଭି ସିଂହଦେଓ, ସୁନ୍ଦରଗଡ଼ ବିଧାୟିକା କୁସୁମ ଟେଟେ, ରେଂଗାଲି ବିଧାୟକ ନାଉରୀ ନାୟକ, ବ୍ରହ୍ମଗିରି ବିଧାୟକ ଲଳିତେନ୍ଦୁ ବିଦ୍ୟାଧର ମହାପାତ୍ର, ବୀରମିତ୍ରପୁର ବିଧାୟକ ଶଙ୍କର ଓରାମ, ସରେଇପାଲି ବିଧାୟକ ଚୁନ୍ନିଲାଲ ସାହୁ, ପୂର୍ବତନ ବିଧାୟକ ରୂପକୁମାରୀ ସାହୁ, ବିଜେପି ମୁଖପାତ୍ର ଲେଖାଶ୍ରୀ ସାମନ୍ତରାୟ, ପୃଥ୍ବୀରାଜ ହରିଚନ୍ଦନ, ବିଜେପି ଜିଲ୍ଲା ସଭାପତି ଅଶ୍ବିନୀ ଷଡ଼ଂଗୀ, ଜିଲ୍ଲା ପରିଷଦ ସଭ୍ୟ ସୁରେନ୍ଦ୍ର ସିଂହବରିହା, ପୂର୍ବତନ ଜିଲ୍ଲା ପରିଷଦ ଅଧ୍ୟକ୍ଷା ମୁକ୍ତା ସାହୁ, ସରୋଜ ସାମଲ ଉପସ୍ଥିତ ଥିଲେ। ଏହି ଅବସରରେ ପୂର୍ବତନ ମନ୍ତ୍ରୀ ସ୍ବର୍ଗତ ମୁରାରୀ ମିଶ୍ରଙ୍କ ଝିଅ ରାଜଲକ୍ଷ୍ମୀ ମିଶ୍ର ବିଜେପିରେ ସାମିଲ ହୋଇଥିଲେ।
୨ ମନ୍ତ୍ରୀଙ୍କୁ ପ୍ରସନ୍ନଙ୍କ ପାଲଟା ଜବାବ
ରେଳ ପାଇଁ କେବେ ଜମି ମାଗିଥିଲେ ପ୍ରମାଣ ଦିଅନ୍ତୁ-ବୀମା ରାଶି କଣ ସରକାର ଦିଅନ୍ତି?
ବରଗଡ଼/ପଦ୍ମପୁର: ଫସଲ ବୀମା ଓ ବରଗଡ଼-ନୂଆପଡ଼ା ରେଳପଥ ଉପରେ ଦୁଇ କେନ୍ଦ୍ରମନ୍ତ୍ରୀଙ୍କ ବକ୍ତବ୍ୟ ପରେ ପାଲଟା ଜବାବ ଦେଇଛି ବିଜେଡି। ଉଭୟ ପ୍ରସଂଗରେ ଦଳର ପକ୍ଷ ରଖି ପୂର୍ବତନ ସାଂସଦ ପ୍ରସନ୍ନ ଆଚାର୍ଯ୍ୟ କହିଛନ୍ତି, କେନ୍ଦ୍ରମନ୍ତ୍ରୀ ଅଶ୍ବିନୀ ବୈଷ୍ଣବ ଏବଂ ନରେନ୍ଦ୍ର ସିଂ ତୋମାର ସତ୍ୟର ପରିହାସ କରିଛନ୍ତି ଯାହା ସଂଘୀୟ ବ୍ୟବସ୍ଥାରେ ଗ୍ରହଣୀୟ ନୁହେଁ। ମନ୍ତ୍ରୀମାନଙ୍କ ଗସ୍ତ ପରେପରେ ଏକ ସାମ୍ବାଦିକ ସମ୍ମିଳନୀରେ ଶ୍ରୀ ଆଚାର୍ଯ୍ୟ କହିଲେ, ୨୦୧୯ରେ ରେଳ ମନ୍ତ୍ରଣାଳୟ ସର୍ଭେ ପରେ ଏହି ଲାଇନ ଲାଭଦାୟକ ନୁହେଁ ଏବଂ ଏହି ପ୍ରକଳ୍ପକୁ ସଂରକ୍ଷିତ କରାଗଲା ବୋଲି କହିଥିଲା।
କିନ୍ତୁ ଏବେ ମନ୍ତ୍ରୀ କହୁଛନ୍ତି ଯେ ଓଡ଼ିଶା ସରକାର ଆଜି ଜମି ଦେଲେ କେନ୍ଦ୍ର କାଲି ରେଳ ଲାଇନ୍ କରିବ। ରାଜ୍ୟ ସରକାରକୁ ଜମି ମଗାଯିବା ନେଇ କେନ୍ଦ୍ର ସରକାର କେଉଁ ଚିଠି ଦେଇଛନ୍ତି ତାହା ଉପସ୍ଥାପନ କରନ୍ତୁ ବୋଲି ଶ୍ରୀ ଆଚାର୍ଯ୍ୟ ଆହ୍ବାନ ଦେଇଥିଲେ। ଯଦି ରାଜ୍ୟ ଜମି ଦେବ କେଉଁଠି ଦେବ, କେତେ ଦେବ ଏହାର ସର୍ଭେ କରି ଚିହ୍ନଟ କରାଯାଇଛି କି ବୋଲି ସେ ପ୍ରଶ୍ନ କରିଥିଲେ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ରେଳ ପ୍ରକଳ୍ପ ପାଇଁ ମାଗଣା ଜମି ସହ ସ୍ବେଚ୍ଛାକୃତ ଭାବେ ଅତିରିକ୍ତ ୩୦୦ କୋଟି ଟଙ୍କା ଦେବାକୁ ଘୋଷଣା କରିଛନ୍ତି। ଏହା ସତ୍ତ୍ବେ କେନ୍ଦ୍ର ଏହି ପ୍ରକଳ୍ପ ଆରମ୍ଭ କରିବାକୁ ଆଗ୍ରହ ଦେଖାଇ ନାହିଁ ବୋଲି ସେ ଅଭିଯୋଗ କରିଥିଲେ। ସେହିପରି, ଫସଲ ବୀମା ମାମଲାରେ ମଧ୍ୟ କେନ୍ଦ୍ରମନ୍ତ୍ରୀ ଭ୍ରମିତ କରୁଛନ୍ତି ବୋଲି ଶ୍ରୀ ଆଚାର୍ଯ୍ୟ କହିଥିଲେ। ଫସଲ ବୀମା ଯୋଜନା ଏବଂ ସର୍ବନିମ୍ନ ସହାୟକ ମୂଲ୍ୟ ନିର୍ଦ୍ଧାରଣ ହେଉଛି କେନ୍ଦ୍ର ସରକାରଙ୍କ ଦାୟିତ୍ବ। କେନ୍ଦ୍ର ବୀମା ବାବଦ ଅର୍ଥ ରାଜ୍ୟକୁ ଦେଇ ସାରିଛି ବୋଲି ମନ୍ତ୍ରୀ କହିବା ଆଶ୍ଚର୍ଯ୍ୟଜନକ। କାରଣ ବୀମା କ୍ଷତିପୂରଣ କୌଣସି ସରକାର ଦିଅନ୍ତି ନାହିଁ, ବୀମା କମ୍ପାନି ଦିଏ ବୋଲି ଶ୍ରୀ ଆଚାର୍ଯ୍ୟ ଯୁକ୍ତି ରଖିଥିଲେ।