୬୫ ଲକ୍ଷ ଟ୍ରାଭେଲ୍ ବିଲ୍ ଠକେଇ ମାମଲା : ପାଠକ ବାପ,ପୁଅଙ୍କୁ ହାଇକୋର୍ଟରୁ ଜାମିନ
କଟକ : ଚାର୍ଟର୍ ବିମାନ ବୁକିଂ ବାବଦ ୬୫ ଲକ୍ଷ ୧୬ ହଜାର ଟଙ୍କା ଠକେଇ ନେଇ ଖାରବେଳନଗର ଥାନାରେ ରୁଜୁ ମାମଲାରେ ହାଇକୋର୍ଟ ଆଇଏଫ୍ଏସ୍ ଅଭୟକାନ୍ତ ପାଠକ ଓ ତାଙ୍କ ପୁଅ ଆକାଶ ପାଠକଙ୍କୁ ଜାମିନ ମଞ୍ଜୁର କରିଛନ୍ତି। ୨ ଲକ୍ଷ ଟଙ୍କାର ଦୁଇଜଣ ସ୍ଥାନୀୟ ଜାମିନଦାରଙ୍କ ବଦଳରେ ନିମ୍ନ ଅଦାଲତ ଉଭୟଙ୍କୁ ଜାମିନରେ ଛାଡ଼ିବେ। ଜାମିନରେ ଯିବାପରେ ଆବେଦନକାରୀ ଆବଶ୍ୟକବେଳେ ତଦନ୍ତକାରୀ ଅଧିକାରୀଙ୍କ ନିକଟରେ ହାଜର ହେବେ ଓ ତଦନ୍ତ ପ୍ରକ୍ରିୟାରେ ସହଯୋଗ କରିବେ। ଏଥିସହିତ ତଥ୍ୟ ପ୍ରମାଣକୁ ପ୍ରଭାବିତ କରିବା ଭଳି କୌଣସି କାର୍ଯ୍ୟ କରିବେ ନାହିଁ ବୋଲି ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଜଷ୍ଟିସ ସଙ୍ଗମ କୁମାର ସାହୁଙ୍କୁ ନେଇ ଗଠିତ ଖଣ୍ଡପୀଠ ଅଭୟକାନ୍ତ ଓ ଆକାଶ ପାଠକଙ୍କ ପୃଥକ ଜାମିନ ଆବେଦନର ଏକତ୍ର ଶୁଣାଣି କରି ଏପରି ରାୟ ଦେଇଛନ୍ତି। ଆବେଦନକାରୀଙ୍କ ପକ୍ଷରୁ ମାମଲା ପରିଚାଳନା କରୁଥିବା ବରିଷ୍ଠ ଆଇନଜୀବୀ ପୀତାମ୍ବର ଆଚାର୍ଯ୍ୟଙ୍କୁ ଆଇନଜୀବୀ ସୌମିକ ତ୍ରିପାଠୀ, ଐଶ୍ବର୍ଯ୍ୟା ଦାସ, ଅଭିଷେକ ମହାନ୍ତି ସହାୟତା କରୁଥିଲେ।