ପାତ୍ରପୁଟରେ ନିର୍ମାଣ ହେବ ୨ ବ୍ରିଜ୍ ଓ କ‌ଲଭର୍ଟ: ମାସକ ତଳେ ହୋଇଥିଲା ଚୁକ୍ତି, ଏବେ ଡିଜାଇନ୍‌କୁ ଅପେକ୍ଷା

ଜୟପୁର: ଜୟପୁର-ମାଲାକାନଗିରି ବିଜୟୱାଡା ରାଂଚି କରିଡ଼ର ଜାତୀୟ ରାଜପଥ ୩୨୬ରେ ଜୟପୁର ବ୍ଲକର ପାତ୍ରପୁଟରେ ୧୮.୭୧କୋଟି ଟଙ୍କାରେ ନିର୍ମାଣ ହେବ ନୂଆ ବ୍ରିଜ୍। ନୂଆ ବ୍ରିଜ ନିର୍ମାଣର ସର୍ଭେ ସରିଯାଇଥିବା ବେଳେ ବୋରୱେଲ ମଧ୍ୟ କରାଯାଇଛି। ବ୍ରିଜ୍ ପାର୍ଶ୍ବରେ ୨ଟି ବଡ଼ ବ୍ରିଜ୍ ଓ ଗୋଟିଏ ଛୋଟ କଲଭର୍ଟ ସହ ରାସ୍ତା ନିର୍ମାଣ ପାଇଁ ଠିକା ସଂସ୍ଥା ସହ ଗତ ମାସରେ ଚୁକ୍ତିନାମା ସରିଛି। ସର୍ଭେ ସହ ନଳକୂଅ ଖୋଳା କାମ ବି ସରିଲାଣି। ଠିକାସଂସ୍ଥା ପକ୍ଷରୁ ଏଠାରେ କେଉଁ ଆକାରର ବ୍ରିଜ୍ ନିର୍ମାଣ କରିବ ସେ ନେଇ ଡିଜାଇନ୍ ପ୍ରସ୍ତୁତ କରି ରାଜ୍ୟସ୍ତରରେ ଜାତୀୟ ରାଜପଥ ପ୍ରାଧିକରଣ ନିକଟରେ ଦାଖଲ କରିବ। ଏହା ପରେ ଅନୁମୋଦନ ହେବା ପରେ କାମ ଆରମ୍ଭ ହେବ ବୋଲି କହିଛନ୍ତି ନିର୍ବାହୀ ଯନ୍ତ୍ରୀ। ଡିଜାଇନ୍ ଆସିଲେ ତୁରନ୍ତ ନିର୍ମାଣ କାମ ଏହି ବର୍ଷ ଆରମ୍ଭ ହେବ ବୋଲି କହିଛନ୍ତି ଏନଏଚ ନିର୍ବାହୀ ଯନ୍ତ୍ରୀ ।

ସୂଚନା ଯୋଗ୍ୟ,  ଦିନକୁ ଦିନ ଶହ ଶହ ଭାରୀଯାନ ଏହି ରାସ୍ତାରେ ଯିବା ଆସିବା କରୁଛି। କୋଲାବ ନଦୀ ଉପରେ ବ୍ରିଟିଶ ଅମଳର ଲୁହା ବ୍ରିଜ୍ , ଗୋଟିଏ ପାର୍ଶ୍ବରେ ପାହାଡ଼ ଏବଂ ଏଠାକାର ସବୁଜ ସୁନ୍ଦର ତଥା ଶାନ୍ତ ପରିବେଶ ଅବିଭକ୍ତ କୋରାପୁଟ ଜିଲ୍ଲାବାସୀଙ୍କୁ ଟାଣି ଆଣିଥାଏ। ବର୍ଷ ତମାମ ଏହି ସ୍ଥାନରେ ଲୋକେ ପିକନିକ୍ ମନାନ୍ତି।  ସେଭଳି ଏହାକୁ ବି ନ ଭାଙ୍ଗି ସେଭଳି ମନୁମେଣ୍ଟ ବା ପର୍ଯ୍ୟଟନ ସ୍ଥଳୀ ଭାବେ ପୂର୍ବଭଳି ରଖିବା ଏବଂ ନୂଆ ବ୍ରିଜ୍ ଆରମ୍ଭ କରିବାକୁ ବହୁ ବୁଦ୍ଧିଜୀବୀ ରାଜନୈତିକ ନେତୃବୃନ୍ଦ ବି ଦାବି କରିଥିଲେ ।

ଏନଏଚ ପକ୍ଷରୁ ମଧ୍ୟ ଏହି ପୁରୁଣା ବ୍ରିଜକୁ ନ ଭାଙ୍ଗି ନୂଆ ବ୍ରିଜ୍ ନିର୍ମାଣ ପାଇଁ ସଂପୁର୍ଣ୍ଣ ପ୍ରକଳ୍ପ ରିପୋର୍ଟ(ଡିପିଆର) ପ୍ରସ୍ତୁତ କରି କେନ୍ଦ୍ର ସରକାରଙ୍କ ସଡକ ପରିବହନ ଓ ଜାତୀୟରାଜପଥ ମନ୍ତ୍ରଳାୟରେ ଦାଖଲ  କରାଯାଇଥିଲା। କେନ୍ଦ୍ର ସରକାର  ନୂଆ ବ୍ରିଜ୍ ନିର୍ମାଣ ଓ ପୁରୁଣା ବ୍ରିଜର ସଂପୁର୍ଣ୍ଣ ରୁପେ ସାଜସଜ୍ଜା କରି ସୁରକ୍ଷିତ କରିବା ପାଇଁ ୨୧.୨୭ କୋଟି ଟଙ୍କାର  ପ୍ରକଳ୍ପ କରିବା ପାଇଁ ଅନୁମୋଦନ ଦେଇଥିଲେ। ଠିକାସଂସ୍ଥା ୧୮.୭୧କୋଟିରେ ଏହି କାମ ନେଇଛନ୍ତି। ମୁଖ୍ୟ ବ୍ରିଜ୍ ୧୪୦ମିଟର ଲମ୍ବର କରାଯିବ।   ଆଉ ଗୋଟିଏ ନାଳ ଉପରେ ସାନି ବ୍ରିଜ୍ ୩୫ମିଟର ଓ ଛୋଟିଆ  କଲଭର୍ଟ ନିର୍ମାଣ କରାଯିବାର ଯୋଜନା  କରାଯାଇଛି। ଏଥିପାଇଁ ସଂପ୍ରତି ଠିକା ନେଇଥିବା ସଂସ୍ଥା ଗଭୀର ନଳକୁପ ଖୋଳି  ବ୍ରିଜ୍ ଗୁଡିକ ନିର୍ମାଣ କରିବା ଅଂଚଳରେ କଠିନ ପଥର (ହାର୍ଡ ରକ୍ ) ରହିଛି ନାଁ ନାହିଁ, ମୃତ୍ତିକାର ଦମ୍ କେତେ ପରିମାଣର ରହିଛି ତାହା ଯାଂଚ କରିଛନ୍ତି।  ଡିଜାଇନ ଆସିବା ମାତ୍ରକେ ଏହି ବର୍ଷ କାମ ଆରମ୍ଭ ହେବ ବୋଲି କହିଛନ୍ତି ଏନଏଚ ନିର୍ବାହୀ ଯନ୍ତ୍ରୀ ।