ଗାନ୍ଧୀଜୀଙ୍କ ତିରୋଧନ ଦିବସରେ ବ୍ରହ୍ମପୁରରେ କଂଗ୍ରେସର ଶକ୍ତି ପ୍ରଦର୍ଶନ: ମୋ’ସରକାର, ୫-ଟିକୁ ଚେଲ୍ଲାକୁମାରଙ୍କ ସମାଲୋଚନା

୧୯୨୧ ମାର୍ଚ୍ଚ ୨୯ରେ ପ୍ରଥମ ଓଡ଼ିଶା ଗସ୍ତରେ ମହାତ୍ମା ଗାନ୍ଧୀ ବ୍ରହ୍ମପୁର ଆସି ବାରାକ୍‌ ପଡ଼ିଆ(ବ୍ରହ୍ମପୁର ଷ୍ଟାଡ଼ିୟମ) ଠାରେ ସାଧାରଣ ସଭାରେ ଉଦ୍‌ବୋଧନ ଦେଇଥିଲେ। ଏହି ଗସ୍ତର ଶହେ ବର୍ଷ ପୂର୍ତ୍ତି ଅବସରରେ ପିସିସିର ନିଷ୍ପତ୍ତି କ୍ରମେ ବ୍ରହ୍ମପୁର ଖଲ୍ଲିକୋଟ କଲେଜ ପଡ଼ିଆରେ ଦଳ ପକ୍ଷରୁ ଆଜି ଗାନ୍ଧୀଜୀଙ୍କ ତିରୋଧାନ ଦିବସ ପାଳନ କରାଯାଇଛି। ଗୋପାଳପୁରରୁ ବିଶାଳ ଶୋଭାଯାତ୍ରା ବାହାରି ସଭାସ୍ଥଳରେ ପହଞ୍ଚିଥିଲା। ରାଲି ଆସୁଥିବା ବେଳେ ପୁଲିସ ଅଟକାଇବାରୁ କିଛି ସମୟ ଲାଗି କଂଗ୍ରେସ କର୍ମୀ ଓ ପୁଲିସ ମଧ୍ୟରେ ଯୁକ୍ତିତର୍କ ହୋଇଥିଲା। ଜିଲ୍ଲା କଂଗ୍ରେସ ସଭାପତି ରମେଶ ଚନ୍ଦ୍ର ଜେନାଙ୍କ ସଭାପତିତ୍ବରେ ବାଙ୍କିର ପୂର୍ବତନ ବିଧାୟକ ଦେବାଶିଷ ପଟ୍ଟନାୟକଙ୍କ ସଂଯୋଜନାରେ ଆୟୋଜିତ ସମାବେଶରେ ଜଣେ ପରେ ଜଣେ କଂଗ୍ରେସ ନେତା କେନ୍ଦ୍ର ଓ ରାଜ୍ୟ ସରକାରଙ୍କ ଉପରେ ବର୍ଷିଥିଲେ। ପିସିସି ସଭାପତି ଶ୍ରୀ ପଟ୍ଟନାୟକ କହିଥିଲେ, ବର୍ତ୍ତମାନ ରାଜନୀତି ବ୍ୟବସାୟୀକରଣ ହୋଇଯାଇଛି। ନୈତିକ ମୂଲ୍ୟବୋଧ, ସେବା ମନୋବୃତ୍ତି ନାହିଁ। ମହାତ୍ମା ଗାନ୍ଧୀଙ୍କ ମୂଳଲକ୍ଷ୍ୟ ପଥଭ୍ରଷ୍ଟ ହୋଇଗଲାଣି। ମାଆ ଭଉଣୀମାନେ ରାତି ୧୨ଟାରେ ଏକାକୀ ବୁଲିପାରିଲେ ଭାରତ ପ୍ରକୃତ ସାଧୀନତା ପାଇଛି ବୋଲି ଅନୁଭବ ହେବ ବୋଲି ଗାନ୍ଧିଜୀ କହିଥିଲେ।