ଭୁବନେଶ୍ୱର: ରାଜ୍ୟର ପ୍ରଥମ କରୋନା ଆକ୍ରାନ୍ତ ବ୍ୟକ୍ତି ଆଜି ପୂର୍ବାହ୍ନରେ କ୍ୟାପିଟାଲ ହସ୍ପିଟାଲରୁ ସୁସ୍ଥ ହୋଇ ଘରକୁ ଫେରିବା ପରେ ରାଜ୍ୟବାସୀଙ୍କୁ ବାର୍ତ୍ତା ଦେଇଛନ୍ତି । ଇଟାଲୀ ଫେରନ୍ତା ଯୁବକ କହିଛନ୍ତି, ଲୋକେ ତାଲା ବନ୍ଦର ମହତ୍ୱ ବୁଝନ୍ତୁ । କରୋନା ପାଇଁ ଲକଡାଉନ ଜାରି ଥିବା ବେଳେ ସମସ୍ତେ ନିଜ ନିଜ ଘରେ ରୁହନ୍ତୁ । ଏଥି ସହିତ ସମସ୍ତେ ସକରାତ୍ମକ ମନୋଭାବ ରଖନ୍ତୁ ।
Sambad is now on WhatsApp
Join and get latest news updates delivered to you via WhatsApp
ହସ୍ପିଟାଲରୁ ସୁସ୍ଥ ହୋଇ ଘରକୁ ଫେରିଥିବା ଯୁବକ କହିଛନ୍ତି, କରୋନା ସଂକ୍ରମଣ ପରୀକ୍ଷା ପଜିଟିଭ ଆସିବା ପରେ ପ୍ରଥମେ ମୁଁ ଡରି ଯାଇଥିଲି । ହସ୍ପିଟାଲର ଡାକ୍ତରଙ୍କ ସହଯୋଗରେ ସକରାତ୍ମକ ଭାବନା ଆସିଥିଲା । ତେଣୁ ମୋତେ ଭଲ କରିଥିବା ଡାକ୍ତରମାଙ୍କୁ ଧନ୍ୟବାଦ ଜଣାଉଛି । ସେ କହିଛନ୍ତି ରାଜ୍ୟର ମାଗଣା ଚିକିତ୍ସା ବ୍ୟବସ୍ଥା ବହୁତ ଭଲ ।
ସୂଚନାଯୋଗ୍ୟ, ରାଜ୍ୟର ପ୍ରଥମ କରୋନା ଆକ୍ରାନ୍ତଙ୍କ ନମୁନା ଗତ ମାର୍ଚ୍ଚ ୧୫ରେ ପଜିଟିଭ ରିପୋର୍ଟ ଆସିଥିଲା । ତାଙ୍କର ରିପୋର୍ଟ ପଜିଟିଭ ଆସିବା ପରେ ରାଜ୍ୟବାସୀଙ୍କ ମନରେ ଏକ ଭିନ୍ନ ଚିନ୍ତାଧାରା ଆସିଥିଲା । କାରଣ ଲୋକେ ଭାବୁଥିଲେ ସଂପୃକ୍ତ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିବା ଲୋକେ ମଧ୍ୟ କରୋନା ସଂକ୍ରମଣ ହୋଇପାରନ୍ତି । କିନ୍ତୁ ଦୀର୍ଘ ୧୯ ଦିନର ଚିକିତ୍ସା ପରେ ଯୁବକ ଜଣକ ଆଜି ସୁସ୍ଥ ହୋଇ ଘରକୁ ଫେରିଛନ୍ତି ।
ରାଜ୍ୟରେ ଏପର୍ଯ୍ୟନ୍ତ କରୋନା ଭାଇରସ ସଂକ୍ରମିତ ସଂଖ୍ୟା ୯ରେ ପହଞ୍ଚିଛି । ଆଜି କେବଳ ଏଥିରୁ ୪ ଜଣ ଲୋକ କରୋନା ସଂକ୍ରମଣ ଚିହ୍ନଟ ହୋଇଛନ୍ତି । ଏପର୍ଯ୍ୟନ୍ତ ଭୁବନେଶ୍ୱରରୁ ୭ ଜଣ, କଟକରୁ ଜଣେ ଓ ଭଦ୍ରକରୁ ଜଣେ କରୋନା ରୋଗୀ ଚିହ୍ନଟ ହୋଇଛନ୍ତି ।