ଆୟୁଷ୍ମାନ ଯୋଜନାରେ ସାମିଲ ହେବ କି ଓଡ଼ିଶା ? ଜନତାଙ୍କ ସ୍ୱାର୍ଥ ଓ ସ୍ୱାସ୍ଥ୍ୟକୁ ପ୍ରାଧାନ୍ୟ ଦେଉଛୁ ବୋଲି କହିଲେ ବିଜେଡି ନେତା ସଞ୍ଜୟ ଦାସ ବର୍ମା
ଭୁବନେଶ୍ବର: ଆୟୁଷ୍ମାନରେ ଯୋଜନାରେ ସାମିଲ ହେବ କି ଓଡ଼ିଶା ? କାଳିଆ ଓ ପିଏମ କିଷାନ ଯୋଜନାର ମିଶ୍ରଣ ପରେ ଆୟୁଷ୍ମାନ ଯୋଜନା ରାଜ୍ୟରେ ଲାଗୁ ହେବା ନେଇ ଚର୍ଚ୍ଚା ଆରମ୍ଭ ହୋଇଛି । ଆୟୁଷ୍ମାନ୍ ଯୋଜନା ଓ ବିଜୁ ସ୍ୱାସ୍ଥ୍ୟ ଯୋଜନାର ମିଶ୍ରଣ ନେଇ ଗତକାଲି ବିଜେଡ଼ି ସାଂସଦ ଅମର ପଟ୍ଟନାୟକ ସକରାତ୍ମକ ବୟାନ ଦେଇଥିବା ବେଳେ ଆଜି ଏ ପ୍ରସଙ୍ଗରେ ବିଜେଡି ସାଧାରଣ ସମ୍ପାଦକ ସଂଜୟ ଦାସବର୍ମା ପ୍ରତିକ୍ରିୟା ରଖିଛନ୍ତି।
Sambad is now on WhatsApp
Join and get latest news updates delivered to you via WhatsApp
ସଂଜୟ ଦାସ ବର୍ମା କହିଛନ୍ତି, ଜନସାଧାରଣଙ୍କ ସ୍ୱାର୍ଥକୁ ସରକାର ସର୍ବାଧିକ ଗୁରୁତ୍ବ ଦେଉଛନ୍ତି । ଆୟୁଷ୍ମାନ ଯୋଜନା ଓଡ଼ିଶାରେ ଲାଗୁ ହେବ କି ନାହିଁ, ସରକାର ସେ ନିଷ୍ପତ୍ତି ନେବେ । ଜନତାଙ୍କ ପାଇଁ କିଛି କାର୍ଯ୍ୟ ରାଜ୍ୟ ସରକାର ନିର୍ବାହ କରନ୍ତି ଓ ଆଉ କିଛି କାର୍ଯ୍ୟ କେନ୍ଦ୍ର ସରକାର କରନ୍ତି । ଏଥି ସହ ରାଜନୀତିରୁ ଊର୍ଦ୍ଧ୍ୱକୁ ଯାଇ କିଛି କାମ ଉଭୟ କେନ୍ଦ୍ର ଓ ରାଜ୍ୟ ମିଳିିତ ଭାବେ ନିର୍ବାହ କରନ୍ତି । ଜନସାଧାରଣଙ୍କ ସ୍ୱାର୍ଥ ପାଇଁ ରାଜ୍ୟ ସରକାର ହୁଅନ୍ତୁ କିମ୍ବା କେନ୍ଦ୍ର ସରକାର, ସମସ୍ତେ ଅଙ୍ଗୀକାରବଦ୍ଧ । ଜନତାଙ୍କ ସ୍ୱାର୍ଥ ଓ ସ୍ୱାସ୍ଥ୍ୟ ଆମର ପ୍ରାଧାନ୍ୟ ବୋଲି ସେ ଗଣମାଧ୍ୟମକୁ କହିଛନ୍ତି।
ସେପଟେ ଗତକାଲି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ଆୟୁଷ୍ମାନ ଯୋଜନା ଓଡ଼ିଶାରେ ଲାଗୁ ନେଇ ମୁଖ୍ୟମନ୍ତ୍ରୀଙ୍କୁ ଅନୁରୋଧ କରିଥିଲେ । ଏହି ଯୋଜନାରେ ରାଜ୍ୟବାସୀ ଉପକୃତ ହେବେ ବୋଲି କହିଥିଲେ ହର୍ଷବର୍ଦ୍ଧନ । କେବଳ ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ନୁହଁନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ଆୟୁଷ୍ମାନ୍ ଯୋଜନାରେ ଓଡ଼ିଶା ଖୁବ ଶୀଘ୍ର ସାମିଲ ହେଉ ଓ ଓଡ଼ିଶା ବାହାରେ ରହୁଥିବା ଲୋକେ ଉପକୃତ ହୁଅନ୍ତୁ ବୋଲି କହିଥିଲେ ।