ପୌରସଂସ୍ଥା, ମହାନଗର ନିଗମମାନଙ୍କର ପ୍ରଦର୍ଶନ ସମୀକ୍ଷା
ଭୁବନେଶ୍ବର : ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ବିଭିନ୍ନ ନଗର ନିଗମମାନଙ୍କର କ୍ଲଷ୍ଟରୱାରି ପ୍ରଦର୍ଶନ ସମୀକ୍ଷା ଆରମ୍ଭ କରିଛି। ଛତ୍ରପୁର ଡିଆରଡିଏ କନ୍ଫରେନ୍ସ ହଲ୍ରେ ଆୟୋଜିତ ବୈଠକରେ ୩ଟି ଜିଲ୍ଲା ଗଞ୍ଜାମ, ଗଜପତି ଓ କନ୍ଧମାଳର ୨୩ଟି ମ୍ୟୁନିସିପାଲିଟିର ସମୀକ୍ଷା ହୋଇଛି। ବିଭାଗୀୟ ପ୍ରମୁଖ ଶାସନ ସଚିବ ଜି. ମାଥିଭଥାନନ୍ଙ୍କ ଅଧ୍ୟକ୍ଷତାରେ ଆୟୋଜିତ ଏହି ବୈଠକରେ ବିଭିନ୍ନ ପ୍ରକଳ୍ପ କିଭଳି ଉଚିତ ସମୟରେ ସରିବ, ତାହା ଉପରେ ଗୁରୁତ୍ବାରୋପ କରାଯାଇଛି। ବିଶେଷକରି ସୁଜଳ-ଡ୍ରିଙ୍କ୍ ଫ୍ରମ୍ ଟ୍ୟାପ୍ ମିସନ୍ ତଥା ପାଇପ୍ ଜଳଯୋଗାଣ, ଜାଗା ମିସନ୍, ମୁକ୍ତା, ଆହାର, ସହରୀ ପରିମଳ, ଓ ସ୍ମାର୍ଟ ଏଲ୍ଇଡି ଲାଇଟ୍ ପ୍ରଭୃତି ପ୍ରକଳ୍ପର ସମୀକ୍ଷା କରାଯାଇଥିଲା। ପ୍ରତ୍ୟେକ କ୍ଷେତ୍ରରେ ନାଗରିକମାନଙ୍କ ସହଭାଗିତା ରହିବା ସହ ଜନସେବା ପ୍ରଦାନ କିଭଳି ପ୍ରାଧାନ୍ୟ ଦିଆଯିବ, ତାହା ଉପରେ ଗୁରୁତ୍ବ ଦିଆଯାଇଛି। ଶତପ୍ରତିଶତ ପାନୀୟ ଜଳଯୋଗାଣ କରିବାକୁ ୱାଟ୍କୋ ଓ ଜନସ୍ବାସ୍ଥ୍ୟ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି। କାର୍ଯ୍ୟର ଗୁଣବତ୍ତା ଯାଞ୍ଚ କରିବାକୁ ଜିଲ୍ଲାପାଳଙ୍କୁ କୁହାଯାଇଛି। ଏହି ସବୁ ଯୋଜନା ସହରାଞ୍ଚଳରେ ବେଶ୍ ଆଦୃତ ହୋଇଛି।
Sambad is now on WhatsApp
Join and get latest news updates delivered to you via WhatsApp
ପୌରପ୍ରଶାସନ ନିର୍ଦ୍ଦେଶକ ସଂଗ୍ରାମଜିତ ନାୟକ ଓ ଯୁଗ୍ମ ସଚିବ ତଥା ସୁଡା ନିର୍ଦ୍ଦେଶକ ସାରଦା ପ୍ରସାଦ ପଣ୍ଡା ବିଭିନ୍ନ ଯୋଜନା ଓ ପ୍ରକଳ୍ପର ସମୀକ୍ଷା କରିଥିବା ବେଳେ ଗଞ୍ଜାମ, ଗଜପତି, କନ୍ଧମାଳର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।