ଅମର ପ୍ରସାଦ ଶତପଥୀ

Advertisment

ରାଜନୀତି ଏକ ସମୟରେ ଶ୍ରେଷ୍ଠନୀତି ବୋଲି ବିବେଚନା କରାଯାଉଥିଲା। ସମୟଚକ୍ରରେ ଏହି ପରିଭାଷା ବଦଳି ଯାଇ ଅଧିକାଂଶଙ୍କ ପାଇଁ କ୍ଷମତା, ପ୍ରତିଷ୍ଠା, ଅର୍ଥ ଆଦି ଆହରଣ କରିବା ପାଇଁ କ୍ଷେତ୍ର ପାଲଟି ଯାଇଛି। ଅପର ପକ୍ଷରେ ଏହାର ଭିନ୍ନ ଦିଗ ହେଲା ସେବା, ସମର୍ପଣ, ସାଧୁତା ଓ ନିର୍ଦ୍ଦିଷ୍ଟ ବିଚାରବୋଧକୁ ପାଥେୟ କରି ନିରବଚ୍ଛିନ୍ନ ଭାବେ କାର୍ଯ୍ୟ କରିବା। କ୍ଷମତାର ଅଳିନ୍ଦ ମଧ୍ୟରେ ରାଜନୀତି କରିବା ସହଜ, ସୁଲଭ ଓ ଗତାନୁଗତିକ। ସ୍ରୋତର ପ୍ରତିକୂଳରେ ଯାଇ ସଂଘର୍ଷ, ସମର୍ପଣ ଓ ମୂଲ୍ୟବୋଧଭିତ୍ତିକ ରାଜନୀତି କରିବା ବ୍ୟକ୍ତିଙ୍କ ସଂଖ୍ୟା ସୀମିତ।  କ୍ଷମତା ମିଳୁ ବା ନମିଳୁ ଏକ ନିର୍ଦ୍ଦିଷ୍ଟ ରାଜନୈତିକ ଦଳ ପାଇଁ ନିଜକୁ ଉତ୍ସର୍ଗୀକୃତ କରିବା ବ୍ୟକ୍ତିମାନଙ୍କ ମଧ୍ୟରେ ପୂର୍ବତନ କେନ୍ଦ୍ରମନ୍ତ୍ରୀ ଡା. ଦେବେନ୍ଦ୍ର ପ୍ରଧାନ ଥିଲେ ଅନ୍ୟତମ। ୧୯୭୯ ମସିହାରେ କେନ୍ଦ୍ରରେ ପ୍ରଥମ କରି ମୋରାରଜୀ ଭାଇ ଦେଶାଇଙ୍କ ନେତୃତ୍ବରେ ଗଠିତ ଅଣକଂଗ୍ରେସ ଶାସନର ପତନ ପରେ, ତତ୍‌କାଳୀନ ଜନତା ପାର୍ଟି ବିଭାଜିତ ହେଲା। ଏକ ବିଚିତ୍ର ରାଜନୈତିକ ପରିସ୍ଥିତି ସୃଷ୍ଟି ହେଲା। ଖଣ୍ଡ ବିଖଣ୍ଡିତ ଅଣକଂଗ୍ରେସ ଦଳର ପାଉଁଶ ଗଦାରୁ ଅସ୍ଥି ଓ ଶକ୍ତି ସଂଗ୍ରହ କରି ରାଷ୍ଟ୍ରବାଦ ମନ୍ତ୍ରରେ ଦୀକ୍ଷିତ ନୂତନ ରାଜନୈତିକ ସଂଗଠନ ଭାରତୀୟ ଜନତା ପାର୍ଟି (ବିଜେପି) ଜନ୍ମ ନେଲା। ରାଷ୍ଟ୍ରଭକ୍ତି ରାଜନୈତିକ ସଂସ୍କୃତିରେ ବିଶ୍ୱାସୀ ଜନଗଣ ମଧ୍ୟରେ ଆଶାର ସଞ୍ଚାର ହେଲା । ଜନତାପାର୍ଟିର ଅନ୍ତ୍ୟେଷ୍ଟି ପାଉଁଶରୁ ସୃଷ୍ଟି ହେଲା ବିଜେପିର ଅନ୍ତୁଡ଼ିଶାଳ।

ଓଡ଼ିଶାରେ ଏହି ରାଜନୈତିକ ମତବାଦରେ ବିଶ୍ବାସୀ ସଂଗଠନର ମୂଳଦୂଆ ପକାଇବାରେ ଡା. ଦେବେନ୍ଦ୍ର ପ୍ରଧାନଙ୍କ ଭଳି ବ୍ୟକ୍ତିଙ୍କ ତ୍ୟାଗ, ତପସ୍ୟା ଓ ସାଧନାର ଫଳସ୍ବରୂପ ୨୦୨୪ ନିର୍ବାଚନରେ ୨୧ଟି ଲୋକସଭା ଆସନରୁ ୨୦ଜଣ ସଦସ୍ୟ ନିର୍ବାଚିତ ହେଲେ ଓ ଏବେ ରାଜ୍ୟର ପ୍ରଥମ ପୂର୍ଣ୍ଣାଙ୍ଗ ବିଜେପି ସରକାର ଗଠିତ ହୋଇଅଛି। ବିଜେପି ରାଜ୍ୟ ଶାଖାର ସଭାପତି ଓ ରାଷ୍ଟ୍ରୀୟ ଉପସଭାପତି ପଦର ଦାୟିତ୍ବ ସମ୍ପନ୍ନ କରି ସାଙ୍ଗଠନିକ ଦଳର ଶକ୍ତି ବୃଦ୍ଧି କରିବା ଡା. ପ୍ରଧାନଙ୍କ ପାଇଁ ଏକ ଆହ୍ବାନ ଥିଲା। କ୍ରମାଗତ ସଂଘର୍ଷର ପାହାଚ ପରେ ପାହାଚ ଅତିକ୍ରମ କରି ୧୯୯୮ ମସିହାରେ ଦେବଗଡ଼ ଲୋକସଭା ଆସନରୁ ସେ ନିର୍ବାଚିତ ହୋଇ ପରବର୍ତ୍ତୀ ସମୟରେ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ନେତୃତ୍ୱରେ ଗଠିତ ସରକାରରେ ଭୂପୃଷ୍ଠ ପରିବହନ, କୃଷି ଓ ଆନୁଷଙ୍ଗିକ କ୍ଷେତ୍ରର ରାଷ୍ଟ୍ରମନ୍ତ୍ରୀ ଭାବେ ଓଡ଼ିଶାର ରାଜପଥର ସଂଖ୍ୟାବୃଦ୍ଧି, ଉନ୍ନତୀକରଣ ଓ ଏକାଧିକ ନୂତନ ଜାତୀୟ ରାଜପଥକୁ ସାମିଲ କରିବାଠାରୁ ଆରମ୍ଭ କରି ନୂତନ କୃଷି ବିଜ୍ଞାନ କେନ୍ଦ୍ର ପ୍ରତିଷ୍ଠା, ପଶୁପାଳନ ଓ ମତ୍ସ୍ୟଚାଷର ବିକାଶ ପାଇଁ ଭୁବନେଶ୍ବରଠାରେ ଗବେଷଣା କେନ୍ଦ୍ର ଆଣିଦେବାରେ ଡ. ପ୍ରଧାନଙ୍କ ଉଲ୍ଲେଖନୀୟ ଅବଦାନର ସ୍ବାକ୍ଷର ସ୍ପଷ୍ଟ ଓ ଜାଜ୍ଜଲ୍ୟମାନ। ଏହି କ୍ଷେତ୍ରଗୁଡିକର ବିକାଶର ମାନଚିତ୍ର ଆଙ୍କିବା ଓ ଫଳବତୀ କରାଇବାରେ ଡା. ପ୍ରଧାନ ଜଣେ ସଫଳ ଚିତ୍ରକାର।

ମୋର ସୌଭାଗ୍ୟ ଡା. ଦେବେନ୍ଦ୍ର ପ୍ରଧାନ କେନ୍ଦ୍ରରେ କୃଷି ରାଷ୍ଟ୍ରମନ୍ତ୍ରୀ ଥିବା ଅବଧିରେ ମୁଁ ଓଡ଼ିଶାରେ ନବଗଠିତ ବିଜେଡି ଶାସନରେ କୃଷି ବିଭାଗ ଦାୟିତ୍ବରେ ଥାଇ ତାଙ୍କ ମାର୍ଗଦର୍ଶନ ଓ ସହଯୋଗ ଲାଭ କରିବାରେ ସମର୍ଥ ହୋଇଥିଲି। ତାଙ୍କ ପରିବାର ସହ ମୋର ସଂପର୍କ ନିବିଡ଼ତର ହୋଇଥିଲା। ମୋଠାରୁ ବୟସର ବ୍ୟବଧାନ ତାଙ୍କ ସହ ବନ୍ଧୁତା କରିବାରେ ପ୍ରତିବନ୍ଧକ ନ ଥିଲା। ଓଡ଼ିଶାର ଭିତ୍ତିଭୂମି ବିକାଶ କ୍ଷେତ୍ରରେ ଆବଶ୍ୟକୀୟ ସହଯୋଗ କେନ୍ଦ୍ର ସରକାରଙ୍କଠାରୁ ମିଳୁ ନ ଥିବାବେଳେ ଡା. ପ୍ରଧାନଙ୍କ ଦୃଢ଼ ଇଚ୍ଛାଶକ୍ତି ଓ ପ୍ରତିବଦ୍ଧତା ଫଳରେ ରାଜ୍ୟର ସମସ୍ତ ୩୦ଟି ଜିଲ୍ଲାରେ କୃଷି ବିଜ୍ଞାନ କେନ୍ଦ୍ର ପ୍ରତିଷ୍ଠା, ଗବେଷଣା ପାଇଁ ଏକାଧିକ କେନ୍ଦ୍ରୀୟ ଅନୁଷ୍ଠାନକୁ ଭୁବନେଶ୍ବର ଆଣିବା, ଜାତୀୟ ରାଜପଥ ସଂଖ୍ୟାକୁ ୧୬୨୦୦ କି.ମି.କୁ ଦ୍ବିଗୁଣିତ କରିବା ଅବିଶ୍ବସନୀୟକୁ ଫଳବତୀ କରିବାରେ ସେ ସଫଳ ବିନ୍ଧାଣି। ଏଭଳି ପ୍ରକଳ୍ପ ମାନଙ୍କ ତାଲିକା ବେଶ୍ ଲମ୍ବା। 

କୁହାଯାଏ ପିତାମାତାଙ୍କ ସୁକୃତିରୁ ସନ୍ତାନସନ୍ତତିମାନେ ବେଶ୍ ଆଗକୁ ଯାଇଥାନ୍ତି। ଏହି ଆପ୍ତବାକ୍ୟ ପ୍ରମାଣିତ ହୋଇଅଛି ଡା. ପ୍ରଧାନଙ୍କ ପରିବାର କ୍ଷେତ୍ରରେ। ତାଙ୍କ ସୁପୁତ୍ର ଧର୍ମେନ୍ଦ୍ର ପ୍ରଧାନ ଆଜି କେନ୍ଦ୍ର ସରକାରଙ୍କ ମନ୍ତ୍ରିମଣ୍ଡଳରେ ସ୍ଥାନ ପାଇ ଦୀର୍ଘ କାଳ ଧରି ଦେଶ ବିକାଶରେ ନୂତନ ଦିଗନ୍ତ ସୃଷ୍ଟି କରିବାରେ କାର୍ଯ୍ୟରତ ଅଛନ୍ତି। ବିଶେଷ କରି କେନ୍ଦ୍ର ସରକାରଙ୍କ ପେଟ୍ରୋଲିୟମ ମନ୍ତ୍ରୀ ଭାବରେ ଉଜ୍ଜ୍ବଳା ଯୋଜନା କାର୍ଯ୍ୟକାରୀ କରି ରୋଷେଇଶାଳର ମା’ମାନଙ୍କୁ ଯନ୍ତ୍ରଣା ମୁକ୍ତ କରିବାରେ ସକ୍ଷମ ହୋଇଛନ୍ତି। କେନ୍ଦ୍ର ଶିକ୍ଷାମନ୍ତ୍ରୀ ଭାବରେ ନୂତନ ଶିକ୍ଷାନୀତି ପ୍ରଣୟନ କରି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଆତ୍ମନିର୍ଭର ବୈଭବଶାଳୀ ଭାରତ ଗଠନର ପରିକଳ୍ପନାକୁ କାର୍ଯ୍ୟାନ୍ବିତ କରୁଅଛନ୍ତି। ଓଡ଼ିଶାରୁ ସର୍ବାଧିକ ସମୟ କେନ୍ଦ୍ର କ୍ୟାବିନେଟରେ ପ୍ରତିନିଧିତ୍ବ କରି ସେ ରେକର୍ଡ ସୃଷ୍ଟି କରିଅଛନ୍ତି। ଓଡ଼ିଶା ସମେତ ଦେଶବାସୀଙ୍କ ଭବିଷ୍ୟ ଦୃଷ୍ଟି ଧର୍ମେନ୍ଦ୍ର ପ୍ରଧାନଙ୍କ ଉପରେ ରହିଅଛି । ଡା. ଦେବେନ୍ଦ୍ର ପ୍ରଧାନ ସମସ୍ତ କ୍ଷମତା, ପ୍ରତିଷ୍ଠା ଲାଭ କଲାପରେ ଗର୍ବ ଅହଂକାର ତାଙ୍କ କାୟାକୁ ସ୍ପର୍ଶ କରିପାରି ନ ଥିଲା। ସରଳ, ନିରଳସ, ନିଷ୍କପଟ, ନିରଅହଂକାର ବ୍ୟକ୍ତି ଭାବରେ ସମାଜର ସବୁ ବର୍ଗର ବ୍ୟକ୍ତିଙ୍କ ଶ୍ରଦ୍ଧା ଓ ସମ୍ମାନ ଲାଭ କରିବାରେ ସେ ସମର୍ଥ ହୋଇଛନ୍ତି। ଭାରତମାତାର ଜଣେ ସମର୍ପିତ ସେବକ ଭାବରେ ଅନ୍ୟମାନଙ୍କ ପାଇଁ ଦୃଷ୍ଟାନ୍ତ ହୋଇ ରହିଛନ୍ତି। ତାଙ୍କ ମୃତ୍ୟୁରେ ଦେଶର ରାଷ୍ଟ୍ରପତି, ପ୍ରଧାନମନ୍ତ୍ରୀ, ଲୋକସଭା ବାଚସ୍ପତି, ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ସମେତ ବହୁ ବିଶିଷ୍ଟ ବ୍ୟକ୍ତି ଶୋକ ଓ ସମବେଦନା ପ୍ରକାଶ କରିବା, ରାଷ୍ଟ୍ରଭକ୍ତି ମନ୍ତ୍ରରେ ଦୀକ୍ଷିତ ଜଣେ ସଫଳ ସେବକଙ୍କ ପ୍ରତି ଯଥାର୍ଥ ସମ୍ମାନ।

ଦଳମତ, ରାଜନୈତିକ ବିଚାର ଊର୍ଦ୍ଧ୍ବରେ ରହି ତାଙ୍କ ସୁପୁତ୍ର ଧର୍ମେନ୍ଦ୍ର ପ୍ରଧାନଙ୍କ ଚନ୍ଦ୍ରଶେଖରପୁରସ୍ଥିତ ବାସଭବନଠାରୁ ଆରମ୍ଭ କରିଛି ପୁରୀ ସ୍ବର୍ଗଦ୍ବାରରେ ପାର୍ଥିବ ଶରୀରର ଶେଷ ଦର୍ଶନ ପାଇଁ ବ୍ୟାକୁଳତା ପ୍ରକାଶ କରିବା ପ୍ରମାଣିତ କରିଛି କୌଣସି ସାଧନା ବ୍ୟର୍ଥ ହୁଏ ନାହିଁ, ଏହା ବିଧି ନିର୍ଦ୍ଦେଶିତ। ସ୍ବର୍ଗତ ଆତ୍ମା ପ୍ରତି ମୋର ଶ୍ରଦ୍ଧା ଓ ସମ୍ମାନ।
ପୂର୍ବତନ ମନ୍ତ୍ରୀ, ଓଡ଼ିଶା ସରକାର