ଗଛକୁ ଧକ୍କା ଦେଲା ପିକଅପ୍: ଡ୍ରାଇଭରର ମୃତ୍ୟୁ

ମାଥିଲି: ମାଲକାନଗିରି ଜୟପୁର ୩୨୬ ନମ୍ବର ଜାତୀୟ ରାଜପଥର ପାଙ୍ଗାମ ନିକଟରେ ଏକ ଗଛକୁ ଚାଉଳ ବୋଝେଇ ପିକଅପ୍ ଧକ୍କା ଦେଇଛି। ଏହି ଦୁର୍ଘଟଣାରେ ପିକଅପ୍ ଡ୍ରାଇଭରର ମୃତ୍ୟୁ ହୋଇଛି। ମୃତକ ଜଣକ ହେଲେ କାଲିମେଳା ଥାନା ଅନ୍ତର୍ଗତ ଏମଭି ୫୬ ଗ୍ରାମର ଅସିତ କୁମାର ଗୋଲଦାର (୨୪)। ସୂଚନା ଅନୁଯାୟୀ, ଆଜି ସକାଳୁ ଅସିତ୍ ପିକଅପ୍ ଗାଡିରେ(ଓଡି୦୭ଏସ୍ ୩୩୫୮) ପିଡିଏସ୍ ଚାଉଳ ନେଇ ଜୟପୁର ଆଡକୁ ଯାଉଥିଲେ। ସକାଳ ସାଢ଼େ ୮ଟା ବେଳେ ଜାତୀୟ ରାଜପଥର ପାଙ୍ଗାମ ନିକଟରେ ଗୋଟିଏ ଗଛକୁ ପିକଅପ୍ ଧକ୍କା ଦେଇଥିଲା।

ଖବର ପାଇ ଘଟଣାସ୍ଥଳରେ ମାଥିଲି ପୁଲିସ ଓ ଅଗ୍ନିଶମ ବାହିନୀ ପହଞ୍ଚିଥିଲେ। ଅଗ୍ନିଶମ ବାହିନୀ ଡ୍ରାଇଭର ଅସିତକୁ ଗାଡିରୁ ଉଦ୍ଧାର କରିଥିଲେ। ଅସିତକୁ ମାଥିଲି ଉପଖଣ୍ଡ ଚିକିତ୍ସାଳୟକୁ ନିଆଯାଇଥିବା ବ‌େଳେ ଡାକ୍ତର ସେଠାରେ ମୃତ ଘୋଷଣା କରିଥିଲେ। ଏନେଇ ଅସିତର ସମ୍ପର୍କୀୟ ମାଥିଲି ଥାନାରେ ଅଭିଯୋଗ ଦେଇଥିବା ବେଳେ ଏନେଇ ପୁଲିସ ମାମଲା ରୁଜୁ କରି ଗାଡିକୁ ଜବତ କରିଛି। ମାଥିଲି ଉପଖଣ୍ଡ ଚିକିତ୍ସାଳୟରେ ଶବ ବ୍ୟବଚ୍ଛେଦ କରାଯାଇଥିବା ଏସଆଇ ମନୋରଞ୍ଜନ ସାହୁ କହିଛନ୍ତି।