ଓଡ଼ିଶା ଦେଇ ପଶ୍ଚିମ ଭାରତକୁ ଯିବ ତୀର୍ଥଯାତ୍ରୀ ଟ୍ରେନ୍: ଆଇଆର୍ସିଟିସି ଦ୍ୱାରା ସ୍ୱତନ୍ତ୍ର ପର୍ଯ୍ୟଟନ ପ୍ୟାକେଜ୍
ନଭେମ୍ବର ୨୮ରେ ବିଜୟୱାଡାରୁ ଯାତ୍ରା କରିବ
ଭୁବନେଶ୍ବର: ଭାରତୀୟ ରେଳ କ୍ୟାଟରିଂ ଆଣ୍ଡ ଟୁରିଜିମ୍ କର୍ପୋରେସନ୍ (ଆଇଆରସିଟିସି) ଭୁବନେଶ୍ୱର ଆଞ୍ଚଳିକ କାର୍ଯ୍ୟାଳୟ ପକ୍ଷରୁ ପଶ୍ଚିମ ଭାରତରେ ଥିବା ଗୁରୁତ୍ୱପୂର୍ଣ୍ଣ ତୀର୍ଥ ସ୍ଥାନଗୁଡ଼ିକ ଭ୍ରମଣ ପାଇଁ ସ୍ୱତନ୍ତ୍ର ଟୁର୍ ପ୍ୟାକେଜ୍ ‘ତୀର୍ଥଯାତ୍ରୀ ସ୍ୱତନ୍ତ୍ର ପର୍ଯ୍ୟଟନ ଟ୍ରେନ୍’ ବ୍ୟବସ୍ଥା କରାଯାଇଛି। ବାରଣାସୀ, ଗୟା ଓ ପ୍ରୟାଗରାଜ ଆଡ଼କୁ ପ୍ରଥମ ତୀର୍ଥଯାତ୍ରୀ ସ୍ୱତନ୍ତ୍ର ପର୍ଯ୍ୟଟନ ଟ୍ରେନ୍ର ସଫଳତା ପରେ ଦ୍ୱିତୀୟ ତୀର୍ଥଯାତ୍ରୀ ସ୍ୱତନ୍ତ୍ର ପର୍ଯ୍ୟଟନ ଟ୍ରେନ୍ ନଭେମ୍ବର ଶେଷ ସପ୍ତାହରେ ଦ୍ୱାରକା, ସୋମନାଥ ମନ୍ଦିର, ନାଗେଶ୍ୱର, ଭେଟ୍ ଦ୍ୱାରକା, ଅହମ୍ମଦାବାଦ ଓ ଷ୍ଟାଚ୍ୟୁ ଅଫ୍ ୟୁନିଟିକୁ ଭ୍ରମଣ କରାଇବ। ଏହି ତୀର୍ଥଯାତ୍ରୀ ସ୍ୱତନ୍ତ୍ର ପର୍ଯ୍ୟଟନ ଟ୍ରେନ୍ ବିଜୟୱାଡାରୁ ୧୦ ରାତି ଓ ୧୧ ଦିନ ପାଇଁ ନଭେମ୍ବର ୨୮ରେ ଯାତ୍ରା ପ୍ରାରମ୍ଭ କରିବ। ଡିସେମ୍ବର ୮ରେ ଯାତ୍ରା ଶେଷ କରିବ। ଏହି ଟ୍ରେନ୍ ବ୍ରହ୍ମପୁର, ଖୋର୍ଦ୍ଧାରୋଡ୍, ଭୁବନେଶ୍ୱର, କଟକ, ତାଳଚେର ରୋଡ୍, ଅନୁଗୁଳ, ସମ୍ବଲପୁର ଓ ଝାରସୁଗୁଡ଼ାରେ ବୋର୍ଡିଂ ପଏଣ୍ଟ ଯୋଗାଇବ। ଷ୍ଟାଚ୍ୟୁ ଅଫ୍ ୟୁନିଟି, ଦ୍ୱାରକାଧୀଶ ମନ୍ଦିର, ନାଗେଶ୍ୱର ଜ୍ୟୋତିର୍ଲିଙ୍ଗ, ସୋମନାଥ ଜ୍ୟୋତିର୍ଲିଙ୍ଗ, କୀର୍ତ୍ତି ମନ୍ଦିର, ଅକ୍ଷ୍ୟରଧାମ ମନ୍ଦିର ପରି ପର୍ଯ୍ୟଟନ ତଥା ଧାର୍ମିକ ଗନ୍ତବ୍ୟ ସ୍ଥାନ ଏହି ପ୍ୟାକେଜରେ ସ୍ଥାନ ପାଇଛି।
Sambad is now on WhatsApp
Join and get latest news updates delivered to you via WhatsApp
ପ୍ରତ୍ୟେକ ବ୍ୟକ୍ତିଙ୍କ ପାଇଁ ପ୍ୟାକେଜ୍ ମୂଲ୍ୟ ଷ୍ଟାଣ୍ଡାର୍ଡ ପ୍ୟାକେଜ୍(ସ୍ଲିପର୍ କ୍ଲାସ୍)ରେ ୧୦ ହଜାର ୪୦୦ ଟଙ୍କା ଓ ଆରାମଦାୟକ ପ୍ୟାକେଜ୍ରେ ୧୭ ହଜାର ୩୩୦ ଟଙ୍କା ହେବ। ଏହି ପ୍ୟାକେଜ୍ରେ ରାତ୍ରି ରହଣି(ସ୍ଲିପର ଶ୍ରେଣୀ ପାଇଁ ଛାତ୍ରାବାସ ଓ ଏସି-୩ ସ୍ତର ପାଇଁ ୩ ତାରକା ହୋଟେଲ), ଦର୍ଶନୀୟ ସ୍ଥାନ, ଜଳଖିଆ ଓ ଶାକାହାରୀ ରାତ୍ରିଭୋଜନ/ମଧ୍ୟାହ୍ନ ଭୋଜନ, ଟୁର୍ ଏସକର୍ଟ ଓ ସୁରକ୍ଷା ବ୍ୟବସ୍ଥା, ଭ୍ରମଣ ବୀମା ଓ ପାର୍କିଂ, ଟୋଲ୍ ଚାର୍ଜ ଇତ୍ୟାଦି ଅନ୍ତର୍ଭୁକ୍ତ ରହିଛି। ଏହି ଅଞ୍ଚଳର ଯାତ୍ରୀମାନେ ଗୁଜୁରାଟର ଧାର୍ମିକ ଓ ପର୍ଯ୍ୟଟନ ସ୍ଥାନକୁ ଓଡ଼ିଶାର ବିଭିନ୍ନ ବୋର୍ଡିଙ୍ଗ ଷ୍ଟେସନଗୁଡ଼ିକରୁ ଉପରୋକ୍ତ ପର୍ଯ୍ୟଟକ ପ୍ୟାକେଜ୍ ଦ୍ୱାରା ପରିଦର୍ଶନ କରିବାର ଲାଭ ପାଇପାରିବେ। ଏହାବ୍ୟତୀତ ଭୁବନେଶ୍ୱରରେ ଥିବା ଆଇଆରସିଟିସି ଆଞ୍ଚଳିକ କାର୍ଯ୍ୟାଳୟ ମଧ୍ୟ କାଶ୍ମୀର, ଆସାମ, ମେଘାଳୟ, ରାଜସ୍ଥାନ, ମଧ୍ୟପ୍ରଦେଶ, ହିମାଚଳ ପ୍ରଦେଶ ଓ ଦକ୍ଷିଣ ଭାରତର ରାମେଶ୍ୱରମ୍, ମଦୁରାଇ, କନ୍ୟାକୁମାରୀ ଓ ତ୍ରିଭେନ୍ଦ୍ରମ ଆଦି ସ୍ଥାନଗୁଡ଼ିକ ସବୁଠାରୁ ଶସ୍ତା ଘରୋଇ ଏୟାର ପ୍ୟାକେଜ୍ ମଧ୍ୟ ପ୍ରଦାନ କରୁଛି। ଯାତ୍ରୀମାନଙ୍କ ଚାହିଦାର ଆବଶ୍ୟକତା ଅନୁଯାୟୀ ଏହି ପ୍ୟାକେଜ୍ ଉପଲବ୍ଧ ହେବ।