୭୫ ବର୍ଷୀୟା ମା’ଙ୍କୁ ନେଇ ତୀର୍ଥଯାତ୍ରା

ଭୁବନେଶ୍ବର: ୭୫ ବର୍ଷୀୟା ମା’ଙ୍କୁ ସ୍କୁଟର୍‌ରେ ବସାଇ ତୀର୍ଥ ଯାତ୍ରାରେ ବାହାରିଛନ୍ତି ପୁଅ। ମା’ ଚୂଡ଼ା ରତ୍ନମାଙ୍କୁ ସାଥୀରେ ଧରିଛନ୍ତି କର୍ଣ୍ଣାଟକ ମୈସୁରର ୪୫ ବର୍ଷୀୟ ଡି. କ୍ରୀଷ୍ଣକୁମାର। ୨୦୧୮ରୁ ଏହି ଯାତ୍ରା ଆରମ୍ଭ ହୋଇଛି। ଭାରତର ସମସ୍ତ ରାଜ୍ୟର ତୀର୍ଥ ସ୍ଥଳର ଦର୍ଶନ ସାରିବା ପରେ ନେପାଳ, ଭୁଟାନ ଓ ମ୍ୟାମାର ତୀର୍ଥସ୍ଥଳ ବି ମା’ଙ୍କୁ ଦର୍ଶନ କରାଇବେ କ୍ରୀଷ୍ଣକୁମାର । 

କ୍ରୀଷ୍ଣକୁମାର କର୍ପୋରେଟ୍‌ କ୍ଷେତ୍ରରେ ବଡ ପଦବିରେ କାର୍ଯ୍ୟରତ ଥିଲେ। ଭଲ ଦରମା ବି ଥିଲା। ସବୁକିଛି ଭଲ ଚାଲିଥିଲା। ବାପାଙ୍କ ଦେହାନ୍ତ ପରେ ମା’ ଓ ପୁଅ ଏକାଠି ବିତାଉଥିଲେ ସମୟ। ଦିନେ କ୍ରୀଷ୍ଣକୁମାର ମା’ଙ୍କୁ ପଚାରିଥିଲେ , ମା’ କେବେ ତିରୁପତି ଯାଇଛୁ। ଏମିତି ଅନେକ ମନ୍ଦିର କଥା ପଚାରିଲେ। ମା’ଙ୍କ ଠାରୁ ଯାହା ଉତ୍ତର ପାଇଲେ ତାହା ଶୁଣି ଆଶ୍ଚର୍ଯ୍ୟ ହୋଇପଡ଼ିଥିଲେ। ପରିବାରର ଜଞ୍ଜାଳରେ ଚୂଡ଼ା ରତ୍ନମ୍ମା ଏତେ ବ୍ୟସ୍ତ ରହିଯାଇଥିଲେ ଯେ କଳା ଚୁଟି କେତେବେଳେ ଧଳା ହୋଇଯିବା ସହ ବୟସ ଗଡ଼ିଯାଇଥିଲା। ଘରଠାରୁ ମାତ୍ର ଦୁଇ ଘଣ୍ଟା ଦୂରତାରେ ଥିବା ବେଲୁର ମନ୍ଦିର ଯିବା ପାଇଁ ବି ସୁଯୋଗ ମିଳିନଥିଲା। ଏହି କଥା ହୃଦୟଙ୍ଗମ କରିବା ପରେ ଚାକିରି ଛାଡ଼ି ସଞ୍ଚୟ ଟଙ୍କାକୁ ମା’ଙ୍କ ଆକାଉଣ୍ଟ୍‌ରେ ଜମା କରିଦେଇ ସେ ବାହାରି ପଡ଼ିଥିଲେ ତୀର୍ଥ ଯାତ୍ରାରେ। ତୀର୍ଥ ସ୍ଥାନ ଭ୍ରମଣ କରିବାର ସ୍ୱପ୍ନକୁ ନିଜ ଭିତରେ ଚାପି ରଖିଥିଲେ ଚୂଡ଼ା ରତ୍ନମ୍ମା। ଏବେ ଦୀର୍ଘ ଦିନର ସ୍ୱପ୍ନକୁ ବାସ୍ତବ ରୂପ ନେଉଥିବା କହିଛନ୍ତି ଚୁଡ଼ା ରତ୍ନମ୍ମା। ଆଜିର ଦିନରେ ଯେଉଁଠି ବୟସ୍କ ବାପା-ମା’ଙ୍କୁ ଅନେକ ଅଲୋଡ଼ା କରିଦେଉଛନ୍ତି, ସେଇଠି ୭୫ ବର୍ଷୀୟା ମା’ଙ୍କୁ ତୀର୍ଥ ଯାତ୍ରା କରାଉଛନ୍ତି ପୁଅ।

ବାପା-ମା’ ବୁଢ଼ା ହୋଇଗଲେ ବୃଦ୍ଧାଶ୍ରମ ନୁହେଁ, ପୁଅଝିଅଙ୍କ ସ୍ନେହ ଦରକାର ବୋଲି ସେ କହିଛନ୍ତି। କ୍ରୀଷ୍ଣକୁମାର ନିଜ ବାପାଙ୍କୁ ହରାଇ ଦେଇଛନ୍ତି ସତ, କିନ୍ତୁ ବାପା ଦେଇଥିବା ସ୍କୁଟର୍‌କୁ ସାଥୀରେ ଧରି ଭ୍ରମଣ କରୁଛନ୍ତି। ଏହି ତୀର୍ଥ ଯାତ୍ରାରେ ତାଙ୍କ ସହ ବାପାଙ୍କ ଉପସ୍ଥିତି ବି ଅନୁଭବ କରୁଥିବା ସେ କହିଛନ୍ତି। ଓଡ଼ିଶାରେ ଭ୍ରମଣ କରୁଥିବା ସମୟରେ ପୁରୀ ଜଗନ୍ନାଥ ମନ୍ଦିର ଓ ପ୍ରଭୁ ଲିଙ୍ଗରାଜଙ୍କ ମନ୍ଦିର ସମେତ ଅନେକ ମନ୍ଦିର ଦର୍ଶନ କରିଛନ୍ତି। ୯୪ହଜାର କିଲୋମିଟରରୁ ଅଧିକ ଯାତ୍ରା ସେ କରିସାରିଲେଣି। ଦିନରେ ଯାତ୍ରା ଆଉ ରାତିରେ କେତେବେଳେ ମଠ ତ ପୁଣି କେତେବେଳେ ଆଶ୍ରମରେ ବିତାଉଛନ୍ତି ରାତି। ତୀର୍ଥ ଯାତ୍ରା ଏବେବି ଜାରି ରହିଛି। କ୍ରୀଷ୍ଣ କୁମାରଙ୍କୁ ଯିଏ ଦେଖୁଛି ସିଏ କହୁଛି, କ୍ରୀଷ୍ଣକୁମାର ହେଉଛନ୍ତି ଏଯୁଗର ଶ୍ରବଣ କୁମାର।