ଭୁବନେଶ୍ବର: ଉତ୍କଳ ବିଶ୍ବବିଦ୍ୟାଳୟ କୁଳପତି ପ୍ରଫେସର ସବିତା ଆଚାର୍ଯ୍ୟଙ୍କ ୬ ମାସିଆ ବର୍ଦ୍ଧିତ କାର୍ଯ୍ୟକାଳ ଆସନ୍ତା ୨୩ ତାରିଖରେ ସରୁଛି। ଏପର୍ଯ୍ୟନ୍ତ ନୂତନ କୁଳପତି ଚୟନ ଦିଗରେ ପଦକ୍ଷେପ ନିଆଯାଇ ନାହିଁ। ବିଜ୍ଞପ୍ତି ପ୍ରକାଶ ପାଇନି କି ଆବେଦନ ପ୍ରକ୍ରିୟା ଆରମ୍ଭ ହୋଇନାହିଁ। ଆବେଦନପତ୍ର ଆହ୍ବାନ ହୋଇ ନଥିବା ବେଳେ ରାଜଭବନ ପକ୍ଷରୁ ଚୟନ କମିଟି ପାଇଁ ୟୁଜିସିକୁ ୧୫ ପ୍ରତିନିଧିଙ୍କ ତାଲିକା ମଗାଯିବାକୁ ନେଇ ଶିକ୍ଷାବିତ୍‌ମାନେ ଆଶ୍ଚର୍ଯ୍ୟ ପ୍ରକଟ କରିଛନ୍ତି। ଏହାରି ଭିତରେ ଉତ୍କଳ ବିଶ୍ବବିଦ୍ୟାଳୟ କୁଳପତି ପ୍ରଫେସର ଆଚାର୍ଯ୍ୟଙ୍କ କାର୍ଯ୍ୟକାଳ ଆଉ ଥରେ ବୃଦ୍ଧି କରିବାକୁ ରାଜଭବନ ପକ୍ଷରୁ ସବୁଜ ସଙ୍କେତ ମିଳିଛି। ଓଡ଼ିଶା ବିଶ୍ବବିଦ୍ୟାଳୟ ସଂଶୋଧନ ଆଇନ-୨୦୨୪ର ସେକ୍ସନ-୬ର ସବ୍‌ସେକ୍ସନ(୬) ଅନୁଯାୟୀ କୁଳପତିଙ୍କ କାର୍ଯ୍ୟକାଳ ଆଉ ବର୍ଷେ କିମ୍ବା ଉତ୍ତରାଧିକାରୀ କାର୍ଯ୍ୟରେ ଯୋଗ ଦେବା ପର୍ଯ୍ୟନ୍ତ ବୃଦ୍ଧି ଦିଗରେ ପଦକ୍ଷେପ ନେବାକୁ ଉଚ୍ଚଶିକ୍ଷା ସଚିବଙ୍କୁ ଅନୁରୋଧ କରାଯାଇଛି।

Advertisment

ରାଜ୍ୟପାଳଙ୍କ ସଚିବାଳୟର ଉଚ୍ଚଶିକ୍ଷା ଅଫିସ୍‌ ଇନ୍‌ ଚାର୍ଜ ଚିତ୍ତରଞ୍ଜନ ମହାନ୍ତି  ମେ’ ୧୭ରେ ଉଚ୍ଚଶିକ୍ଷା ବିଭାଗ ସଚିବଙ୍କୁ ଲେଖିଥିବା ପତ୍ରରେ ଦର୍ଶାଇଛନ୍ତି ମେ’ ୨୩ରେ ଉତ୍କଳ ବିଶ୍ବବିଦ୍ୟାଳୟ କୁଳପତି ପ୍ରଫେସର ସବିତା‌ ଆଚାର୍ଯ୍ୟଙ୍କ କାର୍ଯ୍ୟକାଳ ଶେଷ ହେଉଛି। ନୂତନ କୁଳପତି ଚୟନ ବିଳମ୍ବିତ ହେବ। ତେଣୁ କାର୍ଯ୍ୟକାଳ ବୃଦ୍ଧି ଦିଗରେ ସରକାର ପଦ‌କ୍ଷେପ ନିଅନ୍ତୁ। ରାଜ୍ୟର ଅନ୍ୟ ସମସ୍ତ ବିଶ୍ବବିଦ୍ୟାଳୟରେ ବରିଷ୍ଠ ପ୍ରଫେସର କିମ୍ବା ନିକଟସ୍ଥ ବିଶ୍ବବିଦ୍ୟାଳୟ କୁଳପତିଙ୍କୁ ଦାୟିତ୍ବ ଦିଆଯାଇଥିବା ବେଳେ ଉତ୍କଳ ବିଶ୍ବବିଦ୍ୟାଳୟ କ୍ଷେତ୍ରରେ ରାଜଭବନର ଏତେ ଅନୁକମ୍ପାକୁ ନେଇ ପ୍ରଶ୍ନ ଉଠିଛି। ଓଡ଼ିଶା ବିଶ୍ବବିଦ୍ୟାଳୟ ସଂଶୋଧନ ଅଧିନିୟମ-୨୦୨୪ର ସେକ୍ସନ୍‌-୬ର ସବ୍‌‌ସେକ୍ସନ-ଡି ଅନୁଯାୟୀ ଜଣେ କୁଳପତି କାର୍ଯ୍ୟରେ ଯୋଗଦେବା ଦିନରୁ ୪ ବର୍ଷ ନ ହେଲେ ୭୦ ବର୍ଷ ବୟସ ଯାଏଁ ଦାୟିତ୍ବରେ ରହିବେ। ଅତି ବେଶୀରେ ଗୋଟିଏ ଟର୍ମ ବୃଦ୍ଧି ହୋଇପାରେ। ଯଦି କୌଣସି କୁଳପତିଙ୍କ କାର୍ଯ୍ୟକାଳ ଶେଷ ହେବା ମଧ୍ୟରେ ନୂତନ ନିଯୁକ୍ତି ନ ହୋଇଛି ତେବେ ରାଜ୍ୟ ସରକାରଙ୍କ ସହ ଆଲୋଚନା କରି କୁଳାଧିପତି ତଥା ରାଜ୍ୟପାଳ ସମ୍ପୃକ୍ତ କୁଳପତିଙ୍କ କାର୍ଯ୍ୟକାଳକୁ ଆଉ ବର୍ଷେ ବୃଦ୍ଧି କରିପାରିବେ। କୁଳପତିଙ୍କ କାର୍ଯ୍ୟାଳୟ ଖାଲିପଡ଼େ କିମ୍ବା ଛୁଟିରେ ଯାଆନ୍ତି ତାହା ହେଲେ ବିଶ୍ବବିଦ୍ୟାଳୟର ବରିଷ୍ଠ ପ୍ରଫେସରଙ୍କୁ ଦାୟିତ୍ବ ଦିଆଯିବ। କୁଳାଧିପତି ଚାହିଁଲେ ରାଜ୍ୟ ସରକାରଙ୍କ ସହ ଆଲୋଚନା କରି ଯେକୌଣସି ନିକଟସ୍ଥ ବିଶ୍ବବିଦ୍ୟାଳୟର କୁଳପତିଙ୍କୁ ଭାରପ୍ରାପ୍ତ ଦାୟିତ୍ବ ଦେଇପାରିବେ।

୨୩ରେ ସରୁଛି ୬ ମାସିଆ ବର୍ଦ୍ଧିତ କାର୍ଯ୍ୟକାଳ
ବର୍ଷେ ବଢ଼ାଇବାକୁ ମତାମତ ଲୋଡ଼ିଲା ରାଜଭବନ

ନୂତନ କୁଳପତି ନିଯୁକ୍ତି ହେବା ପର୍ଯ୍ୟନ୍ତ ଅନେକ ବିକଳ୍ପ ବାଟ ରହିଥିଲେ ମଧ୍ୟ ଉତ୍କଳ ବିଶ୍ବବିଦ୍ୟାଳୟ କୁଳପତି ପ୍ରଫେସର ଆଚାର୍ଯ୍ୟଙ୍କ କାର୍ଯ୍ୟକାଳ ପୁଣିଥରେ ବୃଦ୍ଧି ଦିଗରେ କାହିଁକି ପଦକ୍ଷେପ ନିଆଯାଉଛି ସେନେଇ ପୂର୍ବତନ କୁଳପତିମାନେ ପ୍ରଶ୍ନ ଉଠାଇଛନ୍ତି। ୨୦୨୪ ନଭେମ୍ବର ମାସରେ ଉତ୍କଳ ସମେତ ଗଙ୍ଗାଧର ମେହେର ଓ ରମା‌ଦେବୀ ମହିଳା ବିଶ୍ବବିଦ୍ୟାଳୟ କୁଳପତିଙ୍କ କାର୍ଯ୍ୟକାଳ ୬ ମାସ ବୃଦ୍ଧି ହୋଇଥିଲା। ୨୦୨୫ ଏପ୍ରିଲ ୧୪ ପର୍ଯ୍ୟନ୍ତ ୨୦୨୦ ଆଇନ ବଳବତ୍ତର ରହିଥିଲା। ତତ୍‌କାଳୀନ ଆଇନକୁ ଅଣଦେଖା କରି ତିନି ଜଣ କୁଳପତିଙ୍କ କାର୍ଯ୍ୟକାଳ ୬ ମାସ ଲେଖାଏଁ ବୃଦ୍ଧି କରାଗଲା। ରମାଦେବୀ ମହିଳା ବିଶ୍ବବିଦ୍ୟାଳୟ କୁଳପତି ଅତିରିକ୍ତି ଦାୟିତ୍ବ ନ ସମ୍ଭାଳି ପଦବି ଛାଡ଼ିଥିଲେ। ଗଙ୍ଗାଧର ମେହେର ବିଶ୍ବବିଦ୍ୟାଳୟ କୁଳପତି ମଧ୍ୟ ବର୍ଦ୍ଧିତ ସମୟରେ ନ ରହିବାରୁ ବିଶ୍ବବିଦ୍ୟାଳୟର ଜଣେ ବରିଷ୍ଠ ପ୍ରଫେସରଙ୍କୁ ଦାୟିତ୍ବ ଦିଆଯାଇଛି। ମାତ୍ର ଉତ୍କଳ କ୍ଷେତ୍ରରେ ସମ୍ପୂର୍ଣ୍ଣ ଅଲଗା ନିୟମ ହେଉଛି। 

ସୂଚନାଯୋଗ୍ୟ ଯେ ଜଣେ କୁଳପତିଙ୍କ କାର୍ଯ୍ୟକାଳ ସରିଲେ ଯେକୌଣସି ବିଶ୍ବବିଦ୍ୟାଳୟ କୁଳପତିଙ୍କୁ ଦାୟିତ୍ୱ ଦେବାକୁ ସେକ୍ସନ ୧୦(ଜି)ରେ ବ୍ୟବସ୍ଥା କରି ଆଇନର ପରିସରକୁ ବଢ଼ାଯାଇଥିଲା ବେଳେ କୁଳାଧିପତିଙ୍କ ଦପ୍ତର କେବଳ ଗୋଟିଏ ବ୍ୟବସ୍ଥା ଯଥା ସେକ୍ସନ ୬(ଡି) ଅନୁସାରେ କୁଳପତିଙ୍କ ପ୍ରତି ଅନୁକମ୍ପା ପ୍ରଦର୍ଶନ ପୂର୍ବକ ପଦକ୍ଷେପ ପାଇଁ ରାଜ୍ୟ ସରକାରଙ୍କୁ ଅନୁରୋଧ କରିବା ବୁଦ୍ଧିଜୀବୀଙ୍କୁ ଆଶ୍ଚର୍ଯ୍ୟ କରିଛି। ଏଥିସହ କେଉଁ ଅଦୃଶ୍ୟ ଶକ୍ତି ପ୍ରଭାବରେ କୁଳାଧିପତିଙ୍କ ଦପ୍ତର ଏଭଳି ପକ୍ଷପାତିତା ପ୍ରଦର୍ଶନ କରୁଛି ତାହା ସାଧାରଣରେ ଚର୍ଚ୍ଚା ହେଉଛି। ନିୟମାନୁଯାୟୀ ଦୁଇ ଥର ବର୍ଦ୍ଧିତ କାର୍ଯ୍ୟକାଳ ବ୍ୟବସ୍ଥା ନ ଥିଲେ ମଧ୍ୟ ଏଭଳି ପଦକ୍ଷେପ ଚର୍ଚ୍ଚାର ଖୋରାକ ହୋଇଛି।