ଖୁବ୍ ଆନନ୍ଦରେ ବିରାଟ ବାହିନୀ ଜଳଖିଆରେ ଖାଇଲେ ଚକୁଳି ଓ ମଣ୍ଡା ପିଠା
ଭୁବନେଶ୍ୱର: ରବିବାର ଖେଳାଯିବାକୁ ଥିବା ବହୁ ପ୍ରତୀକ୍ଷିତ ବାରବାଟୀ ଦିନିକିଆ ଲାଗି ଉଭୟ ଭାରତ ଏବଂ ୱେଷ୍ଟଇଣ୍ଡିଜ୍ କ୍ରିକେଟ୍ ଦଳର ଖେଳାଳିମାନେ ଗତ ଗୁରୁବାର ଭୁବନେଶ୍ୱରର ମେ’ ଫେୟାର ହୋଟେଲରେ ପହଞ୍ଚିଥିଲେ। ଏଠାରେ ଦୁଇ ଦେଶର ଖେଳାଳିଙ୍କ ରହିବା ଓ ଖାଇବା ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଛି। ଆଜି ଜଳଖିଆରେ ଖେଳାଳିଙ୍କୁ ଓଡ଼ିଆ ଖାଦ୍ୟ ଚକୁଳି ଓ ମଣ୍ଡା ପିଠା ପରଶା ଯାଇଥିଲା। ଏହାକୁ ସେମାନେ ଖୁବ ଆନନ୍ଦରେ ଖାଇଥିଲେ। ଏପରିକି ଖାଇବା ଟେବୁଲରୁ ସବୁ ଖାଇବା ଶେଷ ହୋଇଯାଇଥିବା ହୋଟେଲ କର୍ତ୍ତୃପକ୍ଷ କହିଛନ୍ତି।
Sambad is now on WhatsApp
Join and get latest news updates delivered to you via WhatsApp
ଏଥିସହ ଓଡ଼ିଶାର ପାରମ୍ପରିକ କଂସା ଓ ପିତ୍ତଳର ଥାଳି, ଗ୍ଲାସ ସାଙ୍ଗକୁ ଚାମଚରେ ଖେଳାଳିଙ୍କୁ ଖାଦ୍ୟ ପରଶା ଯାଉଛି। ବିଶେଷ କରି ଟିମ୍ ଇଣ୍ଡିଆ ଅଧିନାୟକ ବିରାଟ କୋହଲି ସମ୍ପୂର୍ଣ୍ଣ ନିରାମିଷାଶୀ । ତେଣୁ କୋହଲିଙ୍କ ପାଇଁ ଖାଣ୍ଟି ଓଡ଼ିଆ ନିରାମିଷ ଖାଦ୍ୟ ତିଆରି ହେଉଛି।
ହୋଟେଲ୍ ସେଫଙ୍କ ଅନୁସାରେ ଅନ୍ୟାନ୍ୟ ଖାଦ୍ୟ ସହ ଖେଳାଳିଙ୍କ ମେନୁରେ ରହିଛି ମଟନ କଷା, ମଟନ ହାଣ୍ଡି, ଦେଶୀ କୁକୁଡା ମାଂସ ଝୋଳ, ଚିଙ୍ଗୁଡି ଓ ପାମ୍ପ୍ଲେଟ୍ ମାଛ ଭଳି ଆମିଷ ଖାଦ୍ୟ। ଆଉ ନିରାମିଷରେ କାନିକା ଭାତ, ଡାଲମା, ବଡ଼ିଚୁରା, ଖଟା, ଖିରି, ଜହ୍ନି ପୋସ୍ତ, ଛତୁ ବେସର ଓ ଶାଗ ଭଳି ସୁଆଦିଆ ଓଡ଼ିଆ ବ୍ୟଞ୍ଜନ। ଏହାଛଡା ସିରିଜ ବିଜୟୀ ଟିମ୍ ପାଇଁ କେକ୍ ଅର୍ଡର ଦିଆଯାଇଥିବା କହିଛନ୍ତି ମେ ଫେୟାର ହୋଟେଲ କର୍ତ୍ତୃପକ୍ଷ । ସିରିଜ ବିଜୟ ପରେ ସେଲିବ୍ରେସନ ପାଇଁ ସମସ୍ତ ବ୍ୟବସ୍ଥା କରାଯାଇଛି ।