ଯୁକ୍ତ୨ ଖାତା ରି-ଚେକିଂ ଆବେଦନ ଆରମ୍ଭ
ଭୁବନେଶ୍ବର : ଯୁକ୍ତ୨ କଳା ଓ ଧନ୍ଦାମୂଳକ ଛାତ୍ରଛାତ୍ରୀଙ୍କ ଉତ୍ତର ଖାତା ରି-ଚେକିଂ ଓ ରି-ଆଡିସନ୍ ପାଇଁ ଆବେଦନ ପ୍ରକ୍ରିୟା ଆରମ୍ଭ ହୋଇଛି। ଛାତ୍ରଛାତ୍ରୀ ୨୫ତାରିଖ ସୁଦ୍ଧା ଏନେଇ ଅନ୍ଲାଇନ୍ରେ ଆବେଦନ କରିପାରିବେ। ଏମ୍ପି(ମାଲ ପ୍ରାକ୍ଟିସ୍) ଓ ପରୀକ୍ଷା ଫଳ ସ୍ଥଗିତ ରହିଥିବା ପରୀକ୍ଷାର୍ଥୀ ଏଥିପାଇଁ ଆବେଦନ କରିପାରିବେ ନାହିଁ ବୋଲି ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପ୍ରକାଶିତ ବିଜ୍ଞପ୍ତିରେ କୁହାଯାଇଛି।
Sambad is now on WhatsApp
Join and get latest news updates delivered to you via WhatsApp
କଳା ବିଭାଗର ଗଣିତ, ଆଇଟି, ଅନ୍ୟାନ୍ୟ ଏମ୍ଆଇଏଲ୍(ଏମ୍ଆଇଏଲ୍(ଓ) ବ୍ୟତୀତ) ଓ ଇଣ୍ଟିଗ୍ରେଟେଡ୍ ଭୋକେସନାଲ ବିଷୟଗୁଡ଼ିକର ଉତ୍ତର ଖାତା ମୂଲ୍ୟାୟନ ଅନ୍ଲାଇନ୍ରେ ହେବ। କଳା ବିଭାଗର ଅନ୍ୟାନ୍ୟ ସମସ୍ତ ବିଷୟ ଓ ଧନ୍ଦାମୂଳକ ବିଭାଗର ସମସ୍ତ ବିଷୟର ଉତ୍ତର ଖାତା ଅଫ୍ ଲାଇନ୍ରେ ଦେଖାହେବ। ତେଣୁ ପରୀକ୍ଷାର୍ଥୀ ଆବେଦନ କରିବା ସମୟରେ ଉପଯୁକ୍ତ ବିଭାଗ ଓ ବିଷୟ ଚୟନ କରିବାକୁ ପରାମର୍ଶ ଦିଆଯାଇଛି। ରି-ଚେକିଂ ଓ ରି-ଆଡିସନ୍ର ଫଳ କଲେଜକୁ ଜଣାଇ ଦିଆଯିବ। ପରୀକ୍ଷା ଫଳ ପ୍ରକାଶ ପାଇବା ପରେ ଯଦି କୌଣସି ପରୀକ୍ଷାର୍ଥୀ ଖାତା ଦେଖିବାକୁ ଚାହିବେ, ତେବେ ସେମାନେ ଫଳ ବାହାରିବାର ୧୫ଦିନ ମଧ୍ୟରେ [email protected] ମାଧ୍ୟମରେ ଆବେଦନ କରିପାରିବେ। ଇ-ମୂଲ୍ୟାୟନ ହୋଇଥିବା ଉତ୍ତରଖାତା ପାଇବାକୁ ଚାହୁଥିବା ଛାତ୍ରଛାତ୍ରୀ ଆବେଦନ କରିବା ପରେ ସେପ୍ଟେମ୍ବର ୧୭ରୁ ଅକ୍ଟୋବର ୩ ମଧ୍ୟରେ ସେମାନଙ୍କୁ ସ୍କାନ୍ କପି ଯୋଗାଇ ଦିଆଯିବ। ପ୍ରତି ଉତ୍ତର ଖାତା ରି-ଚେକିଂ ଓ ରି-ଆଡିସନ୍ ପାଇଁ ୨୦୦ ଟଙ୍କା ଲେଖାଏଁ ଫି’ ଦେବାକୁ ପଡ଼ିବ। ଯେତିକି ଉତ୍ତର ଖାତା ରି-ଚେକିଂ ଓ ରି-ଆଡିସନ୍ ହେବ, ସେହି ଅନୁଯାୟୀ ଅର୍ଥ ପଇଠ କରିବାକୁ ହେବ। ଏଥିସହ କିଭଳି ଓ କେଉଁ ପ୍ରକାରେ ଛାତ୍ରଛାତ୍ରୀ ଆବେଦନ କରିବେ, ସେନେଇ ପରିଷଦ ୱେବ୍ସାଇଟ୍ରେ ଗାଇଡ୍ଲାଇନ୍ ପ୍ରକାଶ ପାଇଛି। ତାହାକୁ ଦେଖିବା ଲାଗି ପରିଷଦର ପରୀକ୍ଷା ନିୟନ୍ତ୍ରକ ବିଜୟ କୁମାର ସାହୁ ପରାମର୍ଶ ଦେଇଛନ୍ତି।