ଯାଜପୁରସଦର: କ୍ରୀଡ଼ା ଛାତ୍ରୀଙ୍କୁ ଗଣଦୁଷ୍କର୍ମ ଘଟଣାରେ ପୂର୍ବତନ ପ୍ରଶିକ୍ଷକଙ୍କ ସମେତ ବର୍ତ୍ତମାନର ଦୁଇଜଣ ପ୍ରଶିକ୍ଷକଙ୍କୁ ଯାଜପୁର ଟାଉନ ଥାନା ପୁଲିସ ଗିରଫ କରି କୋର୍ଟଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ସନ୍ଦୀପ ସ୍ବାଇଁ, ସିଦ୍ଧାର୍ଥ ରାଉତ ଓ ସାର୍ଥକ ମହାନ୍ତି। ସନ୍ଦୀପ ଓ ସିଦ୍ଧାର୍ଥ ଯାଜପୁର ହକି ଷ୍ଟାଡିୟମ୍ରେ ପ୍ରଶିକ୍ଷକ ରହିଥିବାବେଳେ କଟକର ସାର୍ଥକ ମହାନ୍ତି ଏହି କେନ୍ଦ୍ରର ପୂର୍ବତନ ପ୍ରଶିକ୍ଷକ ଥିଲେ। ଯାଜପୁରର ଜଣେ ୧୫ ବର୍ଷୀୟା ନାବାଳିକା ଏହି ଷ୍ଟାଡିୟମ୍କୁ ହକି ପ୍ରଶିକ୍ଷଣ ନେବାକୁ ଆସୁଥିବାବେଳେ ଷ୍ଟାଡିୟମ୍ର ପ୍ରଶିକ୍ଷକ ତାଙ୍କ ସହ ଅଧିକ ମିଳାମିଶା କରିଥିଲେ। ଜୁଲାଇ ୩ ତାରିଖରେ ନାବାଳିକା ଜଣକ ପ୍ରଶିକ୍ଷଣ ସାରି ଘରକୁ ଫେରୁଥିବାବେଳେ ସମ୍ପୃକ୍ତ ହକି ପ୍ରଶିକ୍ଷକ ଓ ତାଙ୍କର ୨ ସହଯୋଗୀ ନାବାଳିକାଙ୍କୁ ଏକ ଲଜ୍କୁ ଉଠାଇ ନେଇ ସେଠାରେ ଗଣଦୁଷ୍କର୍ମ କରିଥିଲେ। ଏ ସମ୍ପର୍କରେ ନାବାଳିକାଙ୍କ ମା’ ୧୬ ତାରିଖରେ ହକି ପ୍ରଶିକ୍ଷଣ କେନ୍ଦ୍ରର ଇନ୍ଚାର୍ଜଙ୍କୁ ଅଭିଯୋଗ କରିଥିଲେ। ମାତ୍ର ସମ୍ପୃକ୍ତ ପ୍ରଶିକ୍ଷକଙ୍କ ଉପରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାନଯିବାରୁ ପୀଡ଼ିତା ଓ ତାଙ୍କ ମା’ ୧୮ ତାରିଖରେ ଜିଲ୍ଲା ପ୍ରଶାସନ ତଥା ଜିଲ୍ଲା କ୍ରୀଡ଼ା ଅଧିକାରୀଙ୍କଠାରେ ଅଭିଯୋଗ କରିଥିଲେ। ୨୦ ତାରିଖ ରାତିରେ ପୀଡ଼ିତାଙ୍କୁ ସାଙ୍ଗରେ ନେଇ ତାଙ୍କ ମା’ ଟାଉନ ଥାନାରେ ଏତଲା ଦେଇଥିଲେ। ପୁଲିସ ୩ ଅଭିଯୁକ୍ତଙ୍କ ନାଁରେ ଭାରତୀୟ ନ୍ୟାୟ ସଂହିତାର ୭୦ (୨), ୩୫୧ (୨), ୭୪, ୩ (୫), ନାବାଳିକା ଯୌନଶୋଷଣ ସୁରକ୍ଷା ଆଇନ ଧାରା ୬ରେ ମାମଲା (୩୪୧/୨୫) ରୁଜୁ କରିଥିଲା। ଏହି ମାମଲାରେ ୪ ଜଣଙ୍କୁ ପୁଲିସ ଥାନାକୁ ଆଣି ପଚରାଉଚରା କରିଥିବାବେଳେ ଆଜି ୩ ଜଣ ପ୍ରଶିକ୍ଷକଙ୍କୁ ଗିରଫ କରିଛି।
Advertisment

Sambad is now on WhatsApp
Join and get latest news updates delivered to you via WhatsApp