ଟ୍ରାଫିକ୍ ନିୟନ୍ତ୍ରଣ ବେଳେ ମାଡ଼ିଗଲା ହାଇୱା: ପୁଲିସ ଏସ୍ଆଇଙ୍କ ମୃତ୍ୟୁ
ଭଦ୍ରକ : ଟ୍ରାଫିକ୍ ନିୟନ୍ତ୍ରଣ ସମୟରେ ପୁଲିସ ଏସ୍ଆଇଙ୍କ ଉପରେ ମାଡ଼ିଗଲା ହାଇୱା। ଗୁରୁତର ଅବସ୍ଥାରେ କଟକ ନିଆଯିବା ବେଳେ ବାଟରେ ତାଙ୍କର ପ୍ରାଣବାୟୁ ଉଡ଼ିଯାଇଛି। ମୃତକ ହେଲେ ଭଦ୍ରକ ରିଜର୍ଭ ପୁଲିସର ଏସ୍ଆଇ ସୁଜିତ୍ ପାଣ୍ଡବ (୪୭)। ଘର ଭଦ୍ରକ ଚରମ୍ପାରେ।
Sambad is now on WhatsApp
Join and get latest news updates delivered to you via WhatsApp
ଶୁକ୍ରବାର ଭୋର୍ ପ୍ରାୟ ୪ଟା ସମୟରେ ୧୬ ନମ୍ବର ଜାତୀୟ ରାଜପଥର ନଳାଙ୍ଗ ନିକଟ ଚିଙ୍ଗୁଡ଼ିପୁର ଛକଠାରେ ଟ୍ରାଫିକ୍ ଜାମ୍ ହୋଇଥିବା ଖବର ପାଇ ଭଦ୍ରକ ପୁଲିସର ହାଇୱେ ପାଟ୍ରୋଲିଂ ଟିମ୍ ସେଠାରେ ପହଞ୍ଚିଥିଲେ। ଏହି ଟିମ୍ରେ ଥିଲେ ରିଜର୍ଭ ପୁଲିସର ଏସ୍ଆଇ ସୁଜିତ୍ ପାଣ୍ଡବ। ରାସ୍ତାରେ ଠିଆହୋଇ ଟ୍ରକ୍ଗୁଡ଼ିକୁ ପାସ୍ କରାଉଥିବା ବେଳେ ହଠାତ୍ ଏକ ହାଇୱା ଟ୍ରକ୍ ତାଙ୍କ ଉପରେ ଚଢ଼ିଯାଇଥିଲା। ଘଟଣାସ୍ଥଳରେ ଗୁରୁତର ଭାବେ ଆହତ ହୋଇଥିବା ସୁଜିତଙ୍କୁ ପ୍ରଥମେ ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ଅଣାଯାଇଥିଲା। ସେଠାରେ ସ୍ବାସ୍ଥ୍ୟାବସ୍ଥା ସଂକଟାପନ୍ନ ହେବାରୁ ତାଙ୍କୁ କଟକ ବଡ଼ ଡାକ୍ତରଖାନା ସ୍ଥାନାନ୍ତର କରାଯିବା ସମୟରେ ପାଣିକୋଇଲି ଛକ ନିକଟରେ ତାଙ୍କର ମୃତ୍ୟୁ ଘଟିଥିଲା। ଭଦ୍ରକ ଚରମ୍ପାସ୍ଥିତ ବାସଭବନରେ ମୃତଦେହ ପହଞ୍ଚିବା ପରେ ଜିଲ୍ଲା ପୁଲିସର ବହୁ ବରିଷ୍ଠ ଅଧିକାରୀ ତାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ। ସେନାରୁ ଅବସର ପରେ ସୁଜିତ୍ ଭଦ୍ରକ ରିଜର୍ଭ ପୁଲିସରେ ଏସ୍ଆଇ ଭାବେ ନିଯୁକ୍ତି ପାଇଥିଲେ। ହାଇୱା ଟ୍ରକ୍କୁ ଧାମନଗର ପୁଲିସ ଜବତ କରିଥିବା ବେଳେ ଘଟଣାସ୍ଥଳରୁ ଡ୍ରାଇଭର ଫେରାର ହୋଇଯାଇଛି।