ମଦୁଆଙ୍କୁ ଧରିବାକୁ ପୁଲିସ ଆରମ୍ଭ କଲା ଅଭିଯାନ

ଦେବଗଡ଼: ମଦ ପିଇ ଗାଡି ଚଲାଉଥିଲେ ହୋଇଯାଆନ୍ତୁ ସାବଧାନ | କାରଣ ଆରମ୍ଭ ହୋଇଛି ମଦୁଆ ଧରା ଅଭିଯାନ | ଦେବଗଡ଼ ଜିଲ୍ଲା ପୁଲିସ ପକ୍ଷରୁ ଏଭଳି ଏକ ଅଭିଯାନ ଗୁରୁବାରଠାରୁ ଆରମ୍ଭ କରାଯାଇଛି | ଏସପି ରାହୁଲ ଜୈନଙ୍କ ନିର୍ଦ୍ଦେଶ କ୍ରମେ ଏହି ଅଭିଯାନ ଆରମ୍ଭ କରାଯାଇଛି | ଗୁରୁବାର ଚାରିଜଣଙ୍କୁ ମଦ ପିଇ ଗାଡ଼ି ଚଳାଉଥିବାବେଳେ ଗିରଫ କରାଯାଇଥିଲା |

ସେମାନଙ୍କ ଡ୍ରାଇଭିଙ୍ଗ ଲାଇସେନ୍ସ ଜବତ କରାଯିବା ସହ ରଦ୍ଦ କରାଯାଇଛି | ମଦୁଆଧରା ଗାଡି ନାମରେ କିଛି ପୁଲିସ କର୍ମୀ ରାସ୍ତାରେ ଯାଉଥିବା ମଦୁଆଙ୍କୁ ଧରୁଛନ୍ତି | ବେପରୁଆ ଗାଡିଚାଳନା କରି ଦୁର୍ଘଟଣା ଘଟାଉଥିବା ଏହି ଯୁବକଙ୍କୁ ସାବାଡ଼ କରିବାକୁ ଜିଲ୍ଲା ପୁଲିସ ପକ୍ଷରୁ ଏ ଅଭିଯାନ ଆରମ୍ଭ କରାଯାଇଛି |

ଏଠାରେ ସୂଚନା ଥାଉ କି ମଦ ପିଇ ମାତାଲ ଯୁବକ ବେପରୁଆ ଗାଡି ଚାଳନା କରି ଅନେକ ସମୟରେ ଦୁର୍ଘଟଣା ଘଟାଇଥାନ୍ତି | ଏଥିରେ ରାସ୍ତାରେ ଯାଉଥିବା ନିରୀହ ଜନସାଧାରଣ ଆହତ ହୋଇଥାନ୍ତି | ଜିଲ୍ଲା ପୁଲିସର ଏହି ପଦକ୍ଷେପକୁ ସ୍ଥାନୀୟ ବୁଦ୍ଧିଜୀବୀ ଖୁବ ପ୍ରଶଂସା କରିଛନ୍ତି |