ଗ୍ୟାଙ୍ଗଷ୍ଟର ଧଳସାମନ୍ତ ବ୍ରଦର୍ସଙ୍କ ଘରେ ପୁଣି ଚଢାଉ; ଦୁଇ ଭାଇଙ୍କୁ ୩ ଦିନିଆ ରିମାଣ୍ଡରେ ନେଲା ପୁଲିସ୍
ଚୋରା ବନ୍ଧୁକ କାରବାରକୁ ନେଇ ଖୋଳତାଡ଼
ଭୁବନେଶ୍ବର: ୪ ବର୍ଷର ବ୍ୟବଧାନ ପରେ ପୁଣି ଗ୍ୟାଙ୍ଗଷ୍ଟାର ଡି. ବ୍ରଦର୍ସଙ୍କୁ ନେଇ ରାଜ୍ୟରେ ଚର୍ଚ୍ଚା ଜୋର ଧରିଛି । ଏହି ଗ୍ୟାଙ୍ଗଷ୍ଟାର ଭାତୃଦ୍ବୟ ‘ଧଳ ବ୍ରଦର୍ସ’ଙ୍କ ଘରୁ ବିପୁଳ ପରିମାଣର ଗୁଳି ଓ ବନ୍ଧୁକ ମିଳିବା ପରେ ପୁଲିସ ଜୋରଦାର ତଦନ୍ତ ଆରମ୍ଭ କରିଛି । ଗତକାଲି ଉଭୟଙ୍କୁ କୋର୍ଟରେ ହାଜର କରାଯାଇଥିବା ବେଳେ ଗ୍ୟାଙ୍ଗଷ୍ଟର ଡି-ବ୍ରଦର୍ସଙ୍କୁ ତିନି ଦିିନିଆ ରିମାଣ୍ଡରେ ନେଇ ଆଜିଠୁ ଜେରା କରିବ ପୁଲିସ୍ । ସେପଟେ ଧଳସାମନ୍ତଙ୍କ ଭାଇଙ୍କୁ ସେମାନଙ୍କ ଘରକୁ ଆଣି ପୁଲିସ୍ ତଲାସି ଆରମ୍ଭ କରିଛି । ସୂଚନା ଆନୁସାରେ ପ୍ରଥମେ ବଡ଼ ଭାଇ ସୁଶାନ୍ତ ଧଳସାମନ୍ତକୁ ଘରକୁ ଅଣାଯାଇଥିଲା ଓ କେଉଁଠି କିପରି ବନ୍ଧୁକ ଓ ଗୁଳି ଲୁଚାଇ ରଖାଯାଇଥିଲା ତାହା ପଚରା ଯାଇଥିଲା। ସେ ଘରୁ ଯିବା ପରେ ପୁଲିସ ସାନଭାଇ ସୁଶିଲ ଧଳସାମନ୍ତଙ୍କୁ ଘରକୁ ଆଣି ମାରଣାସ୍ତ୍ର ଲୁଚାଇ ରଖିବା ରଖିବା ବାବତରେ ଜେରା କରିଛି।
Sambad is now on WhatsApp
Join and get latest news updates delivered to you via WhatsApp
କିଛି ଦିନ ତଳେ ଡି-ବ୍ରଦର୍ସଙ୍କ ଘରେ ପୁଲିସ୍ ଚଢ଼ାଉ କରିଥିଲା ଓ ତାଙ୍କ ଘରୁ ବହୁ ପରିମାଣର ମାରଣାସ୍ତ୍ର ଜବତ ହୋଇଥିଲା । ୧୦ରୁ ଅଧିକ ବନ୍ଧୁକ ସହ ବହୁ ଗୁଳି ଜବତ କରିଥିଲା ପୁଲିସ୍ । ୧୬ଟି ବନ୍ଧୁକ, ୧୦୯୫ ରାଉଣ୍ଡ ଗୁଳି, ୨୪ ମାଗାଜିନ, ୧୬ଟି ମୋବାଇଲ, ୪ଟି ମୋଟର ସାଇକେଲକୁ ଜବତ କରାଯାଇଥିଲା । ଦୁଇ ଧଳସାମନ୍ତ ବ୍ରଦର୍ସଙ୍କ ଇଙ୍ଗିତରେ ବେଆଇନ ବନ୍ଧୁକ କାରବାର କରୁଥିବା ୮ଜଣଙ୍କୁ ମଧ୍ୟ ଗିରଫ କରାଯାଇଥିଲା । ଏସବୁ ବନ୍ଧୁକ ବିହାରରୁ ଆସୁଥିବାର ଲିଙ୍କ ପୁଲିସ୍ ହାତରେ ଲାଗିଥିଲା । ଏହି ମାମଲାର ଅଧିକ ଖୋଳତାଡ଼ ଜାରି ରହିଛି ।
କଟକ-ଭୁବନେଶ୍ବରରେ ଏହି ଦୁଇ ଭାଇ ଦୀର୍ଘ ଦିନ ହେବ ଦାଦା ବଟି, ରାହାଜାନୀ, ଟେଣ୍ଡର ଫିକ୍ସିଂ ଭଳି ଅପରାଧ କରିଚାଲିଥିଲେ । ଏହା ସହ ସେମାନେ ବିଭିନ୍ନ ସମୟରେ ପ୍ରତିନ୍ଦ୍ବନ୍ଦ୍ବୀଙ୍କୁ ହତ୍ୟା କରିଥିବା ପ୍ରମାଣ ମିଳିଛି । ଏଭଳି ଏକ ଅପରାଧିକ ସାମ୍ରାଜ୍ୟ ଗଢ଼ି କଟକ ସହରବାସୀଙ୍କ ନିଦ ହଜାଇ ଦେଇଥିଲେ ଏହି ଦୁଇ ଭାଇ । ଏ ନେଇ ବାରମ୍ବାର ଥାନାରେ ଅଭିଯୋଗ ହେବା ପରେ ପୁଲିସ ଡି ବ୍ରଦର୍ସଙ୍କ ଆଡ୍ଡା ଉପରେ ଚଢାଉ କରି ସେମାନଙ୍କୁ ଗିରଫ୍ କରିଥିଲା ।