ବ୍ରହ୍ମପୁର: ପୁଣି ଜଣେ ଜନପ୍ରତିନିଧି କରୋନା ଆକ୍ରାନ୍ତ ହୋଇଛନ୍ତି । ଗଞ୍ଜାମ ଜିଲ୍ଲା ପୋଲସରାର ବିଧାୟକ କରୋନା ପଜିଟିଭ ବୋଲି ସେ ନିଜେ ‘ସମ୍ବାଦ’କୁ ସୂଚନା ଦେଇଛନ୍ତି । ବିଧାୟକଙ୍କ ପତ୍ନୀ ମଧ୍ୟ କରୋନା ଆକ୍ରାନ୍ତ ବୋଲି ଜଣାପଡ଼ିଛି।
Sambad is now on WhatsApp
Join and get latest news updates delivered to you via WhatsApp
ଆମ ଗଞ୍ଜାମ ଜିଲ୍ଲା ପ୍ରତିନିଧି ପ୍ରଦୀପ କିଶୋର ସାହୁଙ୍କୁ ପୋଲସରା ବିଧାୟକ କହିଛନ୍ତି, ‘ମଝିରେ ମଝିରେ ମତେ ଜ୍ୱର ହେଉଥିଲା। ଏହାପରେ ମୁଁ ଭୁବନେଶ୍ୱରର ସମ୍ ହସ୍ପିଟାଲ୍ରେ ଗତ ମଙ୍ଗଳବାର ସ୍ୱାବ ପରୀକ୍ଷା ଲାଗି ଦେଇଥିଲି। ଗତ ବୁଧବାର ମୋର ପଜିଟିଭ୍ ବାହାରିଥିବା ହସ୍ପିଟାଲ କର୍ତ୍ତୃପକ୍ଷ ଜଣାଇଥିଲେ। ବର୍ତ୍ତମାନ ମୁଁ ସୁସ୍ଥ ଅଛି। ତେବେ ଗଞ୍ଜାମରେ ଥିବା ବେଳେ ମୋର ଜ୍ୱର ଆରମ୍ଭ ହୋଇଥିଲା। ଜ୍ୱର ହେବା ପରେ ମୁଁ ଭୁବନେଶ୍ୱର ଚାଲି ଆସିଥିଲି। ତା’ପରେ ସ୍ୱାବ ପରୀକ୍ଷା ଲାଗି ଦେଇଥିଲି। ବର୍ତ୍ତମାନ ମୁଁ ଘରୋଇ ସଙ୍ଗରୋଧରେ ଅଛି ଓ ମୋର ଚିକିତ୍ସା ଚାଲିଛି।’ ଏଥିସହ ସେ ତାଙ୍କ ପତ୍ନୀ କରୋନା ପଜିଟିଭ ଚିହ୍ନଟ ହୋଇଥିବା ମଧ୍ୟ ସ୍ପଷ୍ଟ କରିଛନ୍ତି।
ଏହାପୂର୍ବରୁ ବାଲେଶ୍ୱର ଜିଲ୍ଲାର ନୀଳଗିରି ଓ ରେମୁଣାର ବିଧାୟକ କରୋନା ଆକ୍ରାନ୍ତ ହୋଇଥିବା ବେଳେ କଟକ ଜିଲ୍ଲା ସାଲେପୁର ବିଧାୟକ ମଧ୍ୟ କରୋନା ପଜିଟିଭ ଚିହ୍ନଟ ହୋଇଥିଲେ। ତେବେ ଏହି ୩ଜଣ ଜନପ୍ରତିନିଧି ଇତିମଧ୍ୟରେ ଚିକିତ୍ସା ଲାଭ କରି ସୁସ୍ଥ ହୋଇ ସାରିଥିବା ସୂଚନା ରହିଛି।
ଉଲ୍ଲେଖଯୋଗ୍ୟ, ଗତ ୩ ତାରିଖରେ ରେମୁଣା ବିଧାୟକ ବାଲେଶ୍ବର ସଦରର ଦିବଂଗତ ବିଧାୟକ ମଦନ ମୋହନ ଦତ୍ତଙ୍କ ସ୍ମୃତିସଭାରେ ଯୋଗ ଦେବା ଅବସରରେ ନୀଳଗିରି ବିଧାୟକଙ୍କ ସଂସ୍ପର୍ଶରେ ଆସିଥିଲେ। ଗତ ୬ ତାରିଖରେ ନୀଳଗିରି ବିଧାୟକ କରୋନା ଆକ୍ରାନ୍ତ ଚିହ୍ନଟ ହେବା ପରେ ରେମୁଣା ବିଧାୟକ ଗୃହ ସଙ୍ଗରୋଧରେ ଥିଲେ। ଏହାପରେ ୧୪ ତାରିଖରେ ତାଙ୍କର ନମୁନା ପଜିଟିଭ୍ ବାହାରିଥିଲା। ପ୍ରଥମେ ନୀଳଗିରି ବିଧାୟକ, ତା‘ପରେ ସାଲେପୁର ବିଧାୟକ, ତୃତୀୟରେ ରେମୁଣା ବିଧାୟକ ଓ ଶେଷରେ ପୋଲସରା ବିଧାୟକ ସଂକ୍ରମଣର ଶିକାର ହୋଇଥିବା ସାମ୍ନାକୁ ଆସିଛି। ତେବେ ସାଲେପୁର ବିଧାୟକ ସଂକ୍ରମିତ ହେବାର ମାତ୍ର ଦୁଇ ଦିନ ପରେ କରୋନା ନେଗେଟିଭ୍ ବୋଲି ସ୍ବାବ ପରୀକ୍ଷାରୁ ଜଣାପଡ଼ିଥିଲା।