ପୁଣି ପ୍ରବାସୀ ଓଡ଼ିଆ ବସ୍‌ ଦୁର୍ଘଟଣା : ଡ୍ରାଇଭର ମୃତ, ୨ ଆହତ

ଖୋର୍ଦ୍ଧା : ପୁଣି ପ୍ରବାସୀ ଓଡ଼ିଆ ବସ୍‌ ଦୁର୍ଘଟଣା। ଦୁର୍ଘଟଣାରେ ବସ୍‌ର ଡ୍ରାଇଭର ମୃତ୍ୟୁବରଣ କରିଥିବା ବେଳେ ୨ ଜଣ ଆହତ ହୋଇଥିବା ଜଣାପଡିଛି। ଗତକାଲି ବିଳମ୍ବିତ ରାତିରେ କୁହୁଡି ନିକଟରେ ଏହି ଦୁର୍ଘଟଣା ଘଟିଛି।

ମିଳିଥିବା ସୂଚନା ଅନୁଯାୟୀ ଗତକାଲି ବିଳମ୍ବିତ ରାତିରେ ପ୍ରବାସୀ ଓଡ଼ିଆଙ୍କୁ ନେଇ ଆସୁଥିବା ବସ୍‌ ଜାତୀୟ ରାଜପଥ-୧୬ କୁହୁଡି ନିକଟରେ ଦୁର୍ଘଟଣାର ସମ୍ମୁଖୀନ ହୋଇଥିଲା। ବସ୍‌ଟି ଏକ ଆମ୍ବ ବୋଝେଇ ଟ୍ରକ୍‌କୁ ଧକ୍କା ଦେଇ ରାସ୍ତାକଡକୁ ଢ଼ଳି ପଡିଥିଲା। ଫଳରେ ଘଟଣାସ୍ଥଳରେ ବସ୍‌ର ଡ୍ରାଇଭର ମୃତ୍ୟୁବରଣ କରିଥିବା ବେଳେ ୨ ଜଣ ଆହତ ହୋଇଛନ୍ତି। ବସ୍‌ରେ ପ୍ରାୟ ୪୦ ଜଣ ପ୍ରବାସୀ ଓଡ଼ିଆ ହାଇଦ୍ରାବାଦରୁ ବାଙ୍କୀ ଅଭିମୁଖେ ଆସୁଥିଲେ। ଏଥିରେ ବସ୍‌ର ସମ୍ମୁଖ ଭାଗଟି କ୍ଷତିଗ୍ରସ୍ତ ହୋଇଛି।

ଖବର ପାଇଁ ଟାଙ୍ଗୀ ଅଗ୍ନିଶମ କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ସମସ୍ତଙ୍କୁ ଉଦ୍ଧାର କରିବା ସହ ଆହତମାନଙ୍କୁ ଟାଙ୍ଗୀ ମେଡିକାଲରେ ଭର୍ତ୍ତି କରିଛନ୍ତି। ଏଥିସହିତ ଯାତ୍ରୀମାନଙ୍କୁ ଅନ୍ୟ ଏକ ବସ୍‌ରେ ପଠାଇବା ପାଇଁ ପ୍ରଶାସନ ବନ୍ଦୋବସ୍ତ କରୁଥିବା ସୂଚନା ମିଳିଛି।