ଭୁବନେଶ୍ୱର: ରାଜ୍ୟ ସରକାର କରୋନା ବିରୋଧରେ ଲଢ଼େଇ ଜାରି ରଖିଛନ୍ତି । ଏଥିରେ ଜନସାଧାରଣ ସହଯୋଗ କରୁଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁବେଳେ କହି ଆସିଛନ୍ତି ଯେ, ପ୍ରତିଟି ଜୀବନ ଆମ ପାଇଁ ମୂଲ୍ୟବାନ । ରାଜ୍ୟ ସରକାର ରାଜ୍ୟବାସୀଙ୍କ ସ୍ୱାସ୍ଥ୍ୟ ଓ ସୁରକ୍ଷାକୁ ଅଧିକ ଗୁରୁତ୍ୱ ଦେଉଛନ୍ତି ବୋଲି ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର କହିଛନ୍ତି ।
Sambad is now on WhatsApp
Join and get latest news updates delivered to you via WhatsApp
କୋଭିଡ ସଚେତନା ମୂଳକ ସାମ୍ବାଦିକ ସମ୍ମିଳନୀରେ ମୁଖ୍ୟ ଶାସନ ସଚିବ କହିଛନ୍ତି ଯେ, ଗତ କିଛି ଦିନ ପୂର୍ବରୁ ରାଜ୍ୟ କ୍ୟାବିନେଟରେ କରୋନା ଟିକା ନେଇ ଗ୍ଲୋବାଲ ଟେଣ୍ଡର ପାଇଁ ଅନୁମୋଦନ କରାଯାଇଥିଲା । ଏହାରି ମାଧ୍ୟମରେ ଆମେ ଯଥା ସମ୍ଭବ ରାଜ୍ୟବାସୀଙ୍କୁ ଟିକା ଯୋଗାଇ ଦେଇପାରିବା ଏବଂ ଲୋକଙ୍କର ଜୀବନ ବଂଚାଇ ପାରିବା । ଗତକାଲି ଗ୍ଲୋବାଲ ଟେଣ୍ଡର ଆହ୍ୱାନ କରାଯାଇଛି । ଓଡ଼ିଶା ମେଡିକାଲ କର୍ପୋରେସନ ତରଫରୁ ଏହି ଟେଣ୍ଡର ଆହ୍ୱାନ କରାଯାଇଛି । ଆସନ୍ତା ୧୯ ତାରିଖରେ ପ୍ରିବିଡି ପାଇଁ ଆଲୋଚନା ହେବ । ୨୮ ତାରିଖ ସୁଦ୍ଧା କଂପାନିମାନେ ଟେଣ୍ଡରରେ ସାମିଲ ହେବେ । ଯେତେ ଶୀଘ୍ର ସମ୍ଭବ ୩କୋଟି ୮୦ ଲକ୍ଷ ଟିକା କିଣିବା ପାଇଁ ଗ୍ଲୋବାଲ ଟେଣ୍ଡର କରାଯାଇଛି । ୪ ମାସ ଭିତରେ ଏହି ଟିକା କିଣାଯିବ । କମ ସମୟ ମଧ୍ୟରେ ଗ୍ଲୋବାଲ ଟେଣ୍ଡର ଡାକିବାରେ ଓଡ଼ିଶା ପ୍ରଥମ ରାଜ୍ୟ ବୋଲି ଶ୍ରୀ ମହାପାତ୍ର କହିଛନ୍ତି ।
କରୋନାର ଆଗାମୀ ଲହର ପାଇଁ ରାଜ୍ୟ ସରକାର ପୂର୍ବ ପ୍ରସ୍ତୁତି ଆରମ୍ଭ କରି ଦେଇଛନ୍ତି । ଏଥି ପାଇଁ ଉଚ୍ଚ କ୍ଷମତା ସମ୍ପନ୍ନ ପରାମର୍ଶଦାତା କମିଟି ଗଠନ କରିଛନ୍ତି । ଏହି କମିଟିରେ ଜଣାଶୁଣା ବୈଜ୍ଞାନିକ ଓ ଡାକ୍ତର ଅଛନ୍ତି । ଖୁବ ଶୀଘ୍ର ଟିକାକରଣ କେମିତି ହୋଇପାରିବ, ଏହି କମିଟି ତାହା ପରାମର୍ଶ ଦେବ । ଡାକ୍ତର ଓ ସ୍ୱାସ୍ଥ୍ୟ କର୍ମୀମାନେ ମଧ୍ୟ କମିଟିରେ ରହିବେ । ହସ୍ପିଟାଲରେ କେମିତି ଭିତ୍ତିଭୂମି ବିକାଶ କରାଯିବ, ସେ ନେଇ କମିଟି ନିଷ୍ପତ୍ତି ନେବ । ଛୋଟ ପିଲାମାନଙ୍କର ପାଇଁ ଭିତ୍ତିଭୂମି ପାଇଁ ଏହି କମିଟି ପରାମର୍ଶ ଦେବ ।
ମୁଖ୍ୟ ଶାସନ ସଚିବ କହିଛନ୍ତି ଯେ, ସାରା ରାଜ୍ୟକୁ ଲକଡାଉନ କରାଯାଇଛି । ଗତ ୫ ତାରିଖ ଠାରୁ ଆମେ ଏପର୍ଯ୍ୟନ୍ତ ଲକଡାଉନ ସ୍ଥିତିରେ ଅଛୁ । ପ୍ରତ୍ୟେକ ଜିଲ୍ଲାରେ କୋଭିଡ ସଂକମ୍ରଣ ଉପରେ ରାଜ୍ୟ ସରକାର ନଜର ରଖିଛନ୍ତି । ଗତ ୨ ସପ୍ତାହ ମଧ୍ୟରେ ୧୦ଟି ଜିଲ୍ଲାରେ ସଂକ୍ରମଣ ସମାନ ସ୍ତରରେ ଅଛି । କିଛି ଜିଲ୍ଲାରେ ଧୀରେ ଧୀରେ ହ୍ରାସ ପାଉଛି । ପଶ୍ଚିମାଂଚଳ ଜିଲ୍ଲାରେ ସଂକ୍ରମଣ ହାର ହ୍ରାସ ପାଇବାରେ ଲାଗିଛି । ଭଦ୍ରକ, ଝାରସୁଗୁଡ଼ା, ନବରଂଗପୁର, ନୂଆପଡ଼ା, ସମ୍ବଲପୁର, ସୁନ୍ଦରଗଡ଼, ଦେବଗଡ଼ ଆଦି ଜିଲ୍ଲାରେ ସମାନ ଅଥବା ଧୀରେ ଧୀରେ ହ୍ରାସ ପାଇବାରେ ଲାଗିଛି । ୧୦ ଦିନ ଲକଡାଉନ ହେବା ପରେ ବି ଦୈନିକ ୧୦ରୁ ୧୨ ହଜାର ମଧ୍ୟରେ ରହୁଛି । ଏହାର ଅର୍ଥ ନାହିଁ ଯେ, ଆମେ ହାଲୁକା ଭାବରେ ନେବା ।
ମୁଖ୍ୟମନ୍ତ୍ରୀ ଅନେକ ଥର ଅନୁରୋଧ କରିଛନ୍ତି ଯେ, କୋଭିଡ ନିୟମ ପାଳନ କରନ୍ତୁ । ଯେତେବେଳେ ବାହାରକୁ ଯାଉଛନ୍ତି ସେହି ସମୟରେ ମୁହଁ ଓ ନାକକୁ ଘୋଡେଇ ରଖିବା ପାଇଁ ମାସ୍କ ପିନ୍ଧନ୍ତୁ । ଆଶା କରୁଛି ଓଡ଼ିଶାର ଜନସାଧାରଣ ରାଜ୍ୟ ସରକାରଙ୍କୁ ସହଯୋଗ କରିବେ । ତା’ହେଲେ ଭବିଷ୍ୟତରେ ଆମେ କୋଭିଡ ସଂକ୍ରମଣକୁ ଏଡେଇ ଦେଇପାରିବା ।
ଶ୍ରୀ ମହାପାତ୍ର କହିଛନ୍ତି ଯେ, ଗତବର୍ଷ ଯେତେବେଳେ କୋଭିଡ ପିକ୍ ସ୍ତରରେ ଥିଲା, ସେହି ସମୟରେ ପ୍ରାୟ ୮ ହଜାର ଆକ୍ରାନ୍ତ କୋଭିଡ ହସ୍ପିଟାଲରେ ଚିକିତ୍ସିତ ହେଉଥିଲେ । ଏବେ ଏହି ସଂଖ୍ୟା ଏବେ ପ୍ରାୟ ୧୫ ହଜାରରେ ପହଂଚିଛି । ତେଣୁ କୋଭିଡ ସମୟରେ ରାଜ୍ୟ ସରକାର ଯେଉଁ ଗାଇଡଲାଇନ ଜାରି କରିଛନ୍ତି, ତାହାକୁ ପାଳନ କରନ୍ତୁ । ବାହାରକୁ କମ ଯିବା ଆସିବା କରନ୍ତୁ । ଘର ଭିତରେ ବୁଲାବୁଲି କରନ୍ତୁ । ଛାତ ଉପରେ ଯାଇ ବୁଲନ୍ତୁ । ବାହାର ଲୋକଙ୍କ ସହିତ ମିଳାମିଶା କମ କଲେ କୋଭିଡ ନିୟନ୍ତ୍ରଣ ହୋଇପାରିବ । ଗତ ବର୍ଷ ଆମେ କେରାନା ଯୁଦ୍ଧରେ ଲଢ଼େଇ କରି କମ ଦିନ ମଧ୍ୟରେ ନିୟନ୍ତ୍ରଣ କରିପାରିଥିଲେ । ଅନ୍ୟ ରାଜ୍ୟ ତୁଳନାରେ ଆମ ରାଜ୍ୟର ସ୍ଥିତି ନିୟନ୍ତ୍ରଣରେ ଅଛି ।